លោកជំទាវអនុរដ្ឋលេខាធិការ អ៊ឹម រចនា អញ្ជើញជាអធិបតីភាពក្នុង​ពិធី​សំណេះសំណាលជាមួយមន្ត្រីឆ្មាំទន្លេ និងពិនិត្យទីតាំងរៀបចំ​បំពាក់​ឧបករណ៍ត្រួតពិនិត្យ និងដ្រូនថតពីចម្ងាយការពារផ្សោត​ទន្លេមេគង្គ

ចេញ​ផ្សាយ​ ៤ កុម្ភៈ ២០២៦ 1975

នៅរសៀលថ្ងៃទី៣ ខែកុម្ភៈ ឆ្នាំ២០២៦ លោកជំទាវ អ៊ឹម រចនា អនុរដ្ឋ​លេខា​ធិការ​ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជា​អធិបតីភាព​ក្នុងពិធី ជួបសំណេះសំណាលជាមួយ​មន្ត្រីឆ្មាំទន្លេនៅ​តំបន់​កាំពី និងពិនិត្យមើលទីតាំងនៃការរៀបចំកន្លែងបំពាក់ឧបករណ៍​ប្រព័ន្ធត្រួតពិនិត្យ និងដ្រូនថតពីចម្ងាយ ក្នុងការការពារផ្សោត​ទន្លេ​មេគង្គ និងធនធានជីវចម្រុះ។ កិច្ចប្រជុំនេះធ្វើឡើងនៅទីស្នាក់ការ​អភិរក្សសត្វផ្សោត ស្ថិតនៅឃុំសំបុក ស្រុកចិត្របុរី ខេត្តក្រចេះ។
ជំនួបសំណេះសំណាលមានការចូលរួមពី ឯកឧត្តម ដួង ពៅ អភិបាល​រងនៃគណៈអភិបាលខេត្តក្រចេះ លោកបណ្ឌិត អ៊ុក វិបុល ប្រធាន​នាយកដ្ឋានអភិរក្សជលផល នៃរដ្ឋបាលជលផល លោក ផៃ សុមានី អនុប្រធាន​នាយកដ្ឋានអភិរក្សជលផល លោក ម៉ៅ វិចិត្រ  អនុប្រធាន​មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ លោក ភួង ទីណា នាយរងអធិការដ្ឋានរដ្ឋបាលជលផលមេគង្គ លោក ម៉ុក ពន្លក នាយ​ខណ្ឌ​រដ្ឋបាលជលផលក្រចេះ និងលោក យិន វណ្ណៈ លោកអភិបាល​ស្រុកចិត្របុរី លោកអភិបាលរងស្រុកព្រែកប្រសព្វ តំណាងពីស្រុក​សំបូរ និងមន្រ្តីឆ្មាំទន្លេ សរុបអ្នកចូលរួមប្រមាណជាង៥០នាក់។
ក្នុងពិធីសំណេះសំណាល លោកជំទាវអនុរដ្ឋលេខាធិការ បានពាំនាំ​នូវការផ្តាំផ្ញើសួរសុខទុក្ខពីសំណាក់ឯកឧត្តមរដ្ឋមន្រ្តី ឌិត ទីណា ជូន​ដល់​ឆ្មាំទន្លេទាំងអស់ ដែលបានបំពេញភារកិច្ចអភិរក្សសត្វផ្សោត​ទន្លេមេគង្គ ជារតនសម្បត្តិរបស់ជាតិ។ លោកជំទាវបានគូសបញ្ជាក់ថា ឆន្ទៈ ការទទួលខុសត្រូវ និងភាពស្មោះត្រង់របស់មន្រ្តីឆ្មាំទន្លេ គឺជា​កាតាលីករដ៏សំខាន់ក្នុងការបំពេញកិច្ចការនេះ មិនអនុញ្ញាតឱ្យមាន​មន្រ្តីឆ្មាំទន្លេណាប្រព្រឹត្តល្មើស បើកដៃឱ្យមានការនេសាទខុសច្បាប់ នៅតំបន់អភិរក្សផ្សោតនោះទេ។
លោកជំទាវ អ៊ឹម រចនា បានបញ្ជាក់ទៀតថា ការរៀបចំការិយាល័យថ្មី​ដើម្បីដាក់ឧបករណ៍ប្រព័ន្ធត្រួតពិនិត្យ និងដ្រូនថតពីចម្ងាយ ធ្វើឡើង​ក្នុងគោលដៅឃ្លាំមើលសកម្មភាពផ្សេងៗ ប្រចាំថ្ងៃរបស់សត្វផ្សោត តាមដងទន្លេ។ បើតាមលោកជំទាវ បើទោះបីជាបុស្តិ៍កាំពីដែលធ្វើ​ទំនើប​​កម្មបំពាក់បច្ចេកវិទ្យាទំនើបជាងមុន ប៉ុន្តែមិនបណ្តាលឱ្យឆ្មាំ​បាត់​បង់ការងារនោះទេ ថែមទាំងផ្តល់ឱកាសរៀនសូត្រចំណេះ​ជំនាញ​ថ្មីៗបន្ថែម ដើម្បីបំពេញការងារនេះ។ 
ដោយឡែកមន្រ្តីឆ្មាំណា​ដែលចង់​បន្តធ្វើការនៅទន្លេ នឹងបង្វែរទៅជាក្រុមអន្តរាគមន៍ដែលចុះបង្រ្កាបបទ​ល្មើសនៅពេលប្រព័ន្ធត្រួតពិនិត្យ ចាប់បានរូបភាពនៃបទល្មើស​នេសាទ​​ផ្សេងៗ ប្រសិនបើកើតមានឡើង ដូច្នេះលោកជំទាវជឿជាក់ថា មន្រ្តីឆ្មាំបន្តបំពេញតួនាទីភារកិច្ចរបស់ខ្លួន ការពារ​អភិរក្សធនធានជល​ផលកម្រ ជាពិសេសសត្វផ្សោតទន្លេមេគង្គនៅកម្ពុជាឱ្យកើនឡើង​បន្ថែមទៀត៕