ឯកឧត្តមរដ្ឋមន្ត្រី វេង សាខុន អមដំណើរជាមួយដោយឯកឧត្តមរដ្ឋលេខាធិការ ឯកឧត្តមប្រតិភូរាជរដ្ឋាភិបាលទទួលជាប្រធានរដ្ឋបាលជលផល និងមន្រ្តីជំនាញមួយចំនួនទៀត បានអញ្ជើញចុះមកសួរសុខទុក្ខក្រុមអន្តរាគមន៍ថ្នាក់ជាតិបង្គ្រាបបទល្មើសជលផល និងពិនិត្យទីតាំងបញ្ជាការដ្ឋានឈរជើងក្រុមអន្តរាគមន៍ជ្រោយស្គី (ខេត្តពោធិ៍សាត់)

ចេញ​ផ្សាយ​ ០៣ មេសា ២០២២ 3019

នៅថ្ងៃសៅរ៍ ១កើត ខែចេត្រ ឆ្នាំឆ្លូវត្រីស័ក ព. ស. ២៥៦៥ ត្រូវនឹងថ្ងៃទី២ ខែមេសា ឆ្នាំ២០២២ ឯកឧត្តមរដ្ឋមន្ត្រី វេង សាខុន អមដំណើរជាមួយដោយឯកឧត្តមរដ្ឋលេខាធិការ ណៅ ធួក ឯកឧត្តម អ៊ុង សំអាត ឯកឧត្តម ហាស់ សារ៉េត ឯកឧត្តមអនុរដ្ឋលេខាធិការ និងឯកឧត្តម ពុំ សុថា ប្រតិភូរាជរដ្ឋាភិបាលទទួលជាប្រធានរដ្ឋបាលជលផល និងមន្រ្តីជំនាញមួយចំនួនទៀត បានអញ្ជើញចុះមកសួរសុខទុក្ខក្រុមអន្តរាគមន៍ថ្នាក់ជាតិបង្គ្រាបបទល្មើសជលផលដែលកំពុងបំពេញបេសកកម្មឈរជើងនៅតាមតំបន់សំខាន់ៗដែលបានកំណត់តាមស្មារតីនៃកិច្ចប្រជុំអន្តរ ក្រសួងកាលពីថ្ងៃទី២៦ ខែមីនាកន្លងមក និងចុះពិនិត្យស្ថានភាពបទល្មើសជលផលជាក់ស្តែង ក្នុងខេត្តពោធិ៍សាត់ និងខេត្តសៀមរាប។ កម្មវិធីទី១ ៖ ធ្វើដំណើរដោយកាណូត ពីកំពង់លួង មកជ្រោយស្តី ឯកឧត្តមរដ្ឋមន្ត្រី និងសហការី បានអញ្ជើញចុះមកពិនិត្យទីតាំងបញ្ហាការដ្ឋានឈរជើងក្រុមអន្តរាគមន៍ជ្រោយស្គី (ខេត្តពោធិ៍សាត់)។ បន្ទាប់ពីបានស្តាប់របាយការណ៍របស់ ឯកឧត្តម ម៉ៅ ពៅ ប្រធានក្រុមអន្តរាគមន៍រួចមក ឯកឧត្តមរដ្ឋមន្ត្រីបានកោតសរសើរ និងវាយតម្លៃខ្ពស់ចំពោះស្មារតីតស៊ូលះបងរបស់សមាជិកក្រុមអន្តរាគមន៍ទាំងអស់ដែលកំពុងបំពេញបេសកកម្មជូនជាតិ និងប្រជាជនក្នុងបុព្វហេតុការពារធនធានធម្មជាតិ (មច្ចជាតិ និងព្រៃលិចទឹក) និងសហការ បង្រ្គាបបទល្មើសជលផលក្នុងបឹង ទន្លេសាប។ សកម្មភាពនេះ បានបង្ហាញពីសុឆន្ទ:ពុះពារ ជំនះរាល់ឧបសគ្គអនុវត្តឲ្យទទួលបានជោគជ័យនូវបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តី កាលពីថ្ងៃទី២៣ ខែមីនាកន្លងមក។ យកពេលជួបសំណេះសំណាល លោកបានផ្តាំផ្ញើឲ្យក្រុមកំលាំងអន្តរាគមន៍ ថែរក្សាឲ្យបាននូវសុខភាព បរិភោគអាហារសុវត្ថិភាព និងទទួលទានទឹកស្អាត ដើម្បីចៀសវាងបញ្ហាប្រឈមនឹងសុខភាព។ គួរដាក់វេនធ្វើការល្បាត ជាប់ជាប្រចាំនៅតាមតំបន់ការពារ និងតំបន់អភិរក្សរបស់រដ្ឋបាលជលផល។ រាល់ឧបករណ៍ដែលអាចយកមកប្រើប្រាស់ធ្វើជាមធ្យោបាយប្រព្រឹត្តបទល្មើស និងឧបករណ៍ល្មើសផ្សេងៗ គួរតែរឹបអូស រួចបំផ្លាញចោល និងជំរុញការផ្សព្វផ្សាយបន្ថែមទៀត។ រដ្ឋបាលជលផល ជួយពិនិត្យលើការផ្គត់ផ្គង់ស្បៀងប្រចាំថ្ងៃឲ្យបានគ្រប់គ្រាន់ រួមទាំងថ្នាំសង្កូវផងដែរ។ ឯកឧត្តមរដ្ឋមន្ត្រីបានស្នើសុំឲ្យគណ:បញ្ជាការកងឯកភាពខេត្តនៃខេត្តគោលដៅទាំង៦ មេត្តាជួយពង្រឹង ការងារបង្គ្រាបបទល្មើសជលផលក្នុងដែនសមត្ថកិច្ចរបស់ខ្លួនឲ្យបានទាន់ពេលវេលា និងមាន ប្រសិទ្ធភាព។ លោកបានលើកទឹកចិត្តដល់កងកំលាំងអន្តរាគមន៍ និងមន្រ្តីរដ្ឋបាលជលផលមេត្តាបន្តពង្រឹងកិច្ចសហការឲ្យកាន់តែរឹងមាំទាំងកាយ និងចិត្តដើម្បីសម្រេចឲ្យបាននូវបទបញ្ជាដ៏ខ្ពង់ខ្ពស់របស់សម្តេចតេជោ។ ឆ្លៀតយកឱកាសនេះ នៅចំពោះមុខកងកំលាំងអន្តរាគមន៍ ឯកឧត្តមរដ្ឋមន្រ្តីបានថ្លែងអំណរគុណយ៉ាងជ្រាលជ្រៅជូនចំពោះឯកឧត្តមនាយឧត្តមសេនីយ៍សន្តិបណ្ឌិត នេត សាវឿន ឯកឧត្តមនាយឧត្តមសេនីយ៍ សៅ សុខ ឯកឧត្តមនាយឧត្តមសេនីយ៍ វង្ស ពិសេន និង ឯកឧត្តម ជាវ តាយ អភិបាលនៃគណ:អភិបាលខេត្តពោធិ៍សាត់ ដែលបានផ្តល់កិច្ចសហការគ្រប់បែបយ៉ាងធ្វើឲ្យបេសកកម្មដែលកំពុងតែមានសកម្មភាពយ៉ាងសស្រាក់សស្រាំងនឹងទទួលបានជោគជ័យ។ ក្នុងឱកាសនេះចុះសួរសុខទុក្ខកងកំលាំងអន្តរាគមន៍នេះ ឯកឧត្តមរដ្ឋមន្ត្រីបាននាំយកស្បៀងមួយចំនួនសម្រាប់ដោះស្រាយបញ្ហាជីវភាពប្រចាំថ្ងៃមកជូន និងប្រេងចំនួន ១០០០លីត្រ និងថវិកាចំនួន៥ លានរៀលក្នុងមួយគោលដៅ ផងដែរ។