ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំងកុមារ អញ្ជើញជាអធិបតីភាពក្នុងសិក្ខាសាលា ស្តីពីការពង្រឹងយន្តការអនុវត្តការងារ និងការតាមដានវាយតម្លៃតួនាទីសូចនាករសំខាន់ៗ
ចេញផ្សាយ ២៤ មេសា ២០២៦ 3703
នាថ្ងៃទី២៣-២៤ ខែមេសា ឆ្នាំ២០២៦ នាយកដ្ឋានផ្សព្វផ្សាយកសិកម្ម សហការជាមួយទីភ្នាក់ងារសហប្រតិបត្តិការអាល្លឺម៉ង់(GIZ) រៀបចំសិក្ខាសាលា ស្តីពីការពង្រឹងយន្តការរបៀបរបបអនុវត្តការងារ និងការតាមដានវាយតម្លៃផ្អែកលើសូចនាករសំខាន់ៗ ក្រោមអធិបតីភាព ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពី ឯកឧត្តមអនុរដ្ឋលេខាធិការ ខាត់ សុធី លោកប្រធាននាយកដ្ឋានធនធានមនុស្ស លោកប្រធាននាយកដ្ឋានអភិវឌ្ឍដំណាំស្រូវ ប្រធាននាយកដ្ឋានផ្សព្វផ្សាយកសិកម្ម លោកប្រធានមន្ទីរកសិកម្មខេត្ត និងតំណាងទីភ្នាក់ងារ(GIZ)។
គោលបំណងនៃសិក្ខាសាលាគឺ៖ (១)ពិនិត្យនិងពិគ្រោះយោបល់ លើសេចក្តីព្រាងនិយាមនីតិវិធីប្រតិបត្តិការការអនុវត្តការងាររបស់មន្រ្តីកសិកម្មឃុំ-សង្កាត់(SOP) (២)ពង្រឹងការអនុវត្ត និងនីតិវិធីសម្រាប់ការត្រួតពិនិត្យនិងវាយតម្លៃ សម្រាប់ប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ និង(៣)ការពង្រឹងសមត្ថភាពលើការប្រើប្រាស់មុខងារកម្មវិធី Farmbook App។
ឯកឧត្តម យ៉ង សាំងកុមារ បានផ្តល់អនុសាសន៍ដល់អង្គសិក្ខាសាលា ពង្រឹងការគ្រប់គ្រងការអនុវត្តការងាររបស់មន្រ្តីកសិកម្មឃុំ-សង្កាត់ កែសម្រួលគោលនយោបាយផ្សព្វផ្សាយកសិកម្មឱ្យស្របតាមចក្ខុវិស័យរបស់ក្រសួង និងកំណែទម្រង់របស់រដ្ឋបាលសាធារណៈក្នុងវិស័យកសិកម្ម ពន្លឿនការរៀបចំនិយាមនីតិវិធីប្រតិបត្តិការការងារគ្រប់គ្រងការអនុវត្តការងារមន្រ្តីកសិកម្មឃុំ-សង្កាត់ ព្រមទាំងសហការជាមួយអង្គភាពជំនាញទាក់ទងនឹងការប្រមូលទិន្នន័យកសិកម្ម តាមរយៈ Farmbook App និងរៀបចំឱ្យមានគោលការណ៍រួមដើម្បីផ្តល់វគ្គបណ្តុះបណ្តាលដល់មន្រ្តីកសិកម្មឃុំ-សង្កាត់ ក្នុងស្មារតីទទួលខុសត្រូវខ្ពស់ សាមគ្គីភាព និងប្រសិទ្ធភាព ដើម្បីសម្រេចឱ្យបានតាមតួនាទីភារកិច្ច និងចក្ខុវិស័យរបស់ក្រសួង៕
