ឯកឧត្តមអនុរដ្ឋលេខាធិការ ហុង ណារិត អញ្ជើញចូលរួមកិច្ចប្រជុំដើម្បីពិនិត្យវឌ្ឍនភាពប្រចាំឆ្នាំ២០២៥ នៃការអនុវត្ត«ផែនការភាពជាដៃគូសម្រាប់ការអភិវឌ្ឍរវាងអូស្រ្តាលី និងកម្ពុជា»

ចេញ​ផ្សាយ​ ១១ មិថុនា ២០២៦ 3658

នៅថ្ងៃទី១០ ខែមិថុនា ឆ្នាំ២០២៦ ឯកឧត្តម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមកិច្ចប្រជុំរួមជាមួយតំណាងជាន់ខ្ពស់នៃក្រសួង-ស្ថាប័នពាក់ព័ន្ធដើម្បីពិនិត្យវឌ្ឍនភាពប្រចាំឆ្នាំ២០២៥ នៃការអនុវត្ត«ផែនការភាពជាដៃគូសម្រាប់ការអភិវឌ្ឍរវាងអូស្រ្តាលី និងកម្ពុជា» នៅទីស្ដីការក្រុមប្រឹក្សាអភិវឌ្ឍន៍កម្ពុជា។
កិច្ចប្រជុំនេះប្រព្រឹត្តទៅក្រោមអធិបតីភាព ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ ក្រុមប្រឹក្សាអភិវឌ្ឍន៍កម្ពុជា និងឯកឧត្តម Derek Yip ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអូស្រ្តាលីប្រចាំនៅព្រះរាជាណាចក្រកម្ពុជា។ កិច្ចប្រជុំនេះ ធ្វើឡើងក្នុងគោលបំណង ពិនិត្យវឌ្ឍនភាពផែនការដៃគូក្នុងរយៈពេលមួយឆ្នាំកន្លងមក និងបានផ្លាស់ប្តូរយោបល់ និងពិភាក្សាលើអាទិភាពចំនួន៣ រួមមាន ១.ការពង្រឹងស្ថាប័ន ២.សេវាសាធារណៈប្រកបដោយបរិយាប័ន្ន និងទី៣.សេដ្ឋកិច្ចដែលមានភាពធន់ និងចីរភាព ដើម្បីរួមចំណែកក្នុងការអភិវឌ្ឍសង្គម-សេដ្ឋកិច្ចកម្ពុជា។
ឯកឧត្តមអនុរដ្ឋលេខាធិការ បានថ្លែងអំណរគុណដល់ប្រទេសអូស្ត្រាលីដែលបាននិងកំពុងចូលរួមចំណែកដល់ការអភិវឌ្ឍវិស័យកសិកម្មកម្ពុជា និងវាយតម្លៃខ្ពស់ចំពោះសមិទ្ធផល របស់កម្មវិធី CAPRED របស់អូស្ត្រាលីក្នុងឆ្នាំកន្លងមក ដែលបានជួយជាអាទិ៍ លើកស្ទួយគុណភាព ស្ពង់ដារនិងការបំពេញលក្ខខណ្ឌតម្រូវនៃកសិផលកម្ពុជា ទៅកាន់ទីផ្សារបរទេស។ ទន្ទឹមនោះ ឯកឧត្តមអនុរដ្ឋលេខាធិការ ក៏បានលើកសំណូមពរជូនភាគីអូស្ត្រាលី ក្នុងការបន្តសហប្រតិបត្តិការភាពជាដៃគូឱ្យកាន់តែជិតស្និទ្ធ និងកាន់តែមានប្រសិទ្ធភាព៕