ព័ត៌មានផ្សេងៗទៀត
សិក្ខាសាលាថ្នាក់ជាតិស្ដីពី “ការចែករំលែកចំណេះដឹង និងបទពិសោធន៍នៃការកំណត់អត្តសញ្ញាណគម្រោងក្នុងតំបន់មេគង្គ”
ចេញផ្សាយ ៣ តុលា ២០២៣ 16492
ខេត្តកំពង់ចាម ចាប់ពីថ្ងៃច័ន្ទ ៣រោច ដល់ថ្ងៃអង្គារ ៤រោច ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី០២ ដល់ថ្ងៃទី០៣ ខែតុលា ឆ្នាំ២០២៣ នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ រៀបចំសិក្ខាសាលាថ្នាក់ជាតិស្ដីពី “ការចែករំលែកចំណេះដឹង និងបទពិសោធន៍នៃការកំណត់អត្តសញ្ញាណគម្រោងក្នុងតំបន់មេគង្គ” នៅមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ដែលដឹកនាំដោយលោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម ដោយមានការអញ្ជើញចូលរួមពីលោក Robby Rosandi តំណាងវិទ្យាស្ថានមេគង្គ អតីតសិក្ខាកាមដែលធ្លាប់ចូលរួមវគ្គបណ្ដុះបណ្ដាលនៅវិទ្យាស្ថានមេគង្គដើម្បីធ្វើជាគ្រូឧទ្ទេសនាម តំណាងក្រសួងចំនួន ០៧ក្រសួង និងមន្ទីរចំនួន ៧មន្ទីរ សរុបប្រមាណ ៣០រូប ស្រីចំនួន ០៩រូប។ សិក្ខាសាលានេះមានគោលបំណង (១)ចែករំលែកអាទិភាពក្នុងវិស័យចំនួន ០៧ រួមមានវិស័យកសិកម្មនិងការអភិវឌ្ឍជនបទ ការអភិវឌ្ឍធនធានមនុស្ស បច្ចេកវិទ្យាព័ត៌មាននិងគមនាគមន៍ (ICT) វប្បធម៌និងទេសចរណ៍ បរិស្ថាន ហេដ្ឋារចនាសម្ព័ន្ធ និងការប្រឈមទៅនឹងសុខុមាលភាពសង្គម (Non-traditional Security Challenges) ដែលមានក្នុងកម្មវិធីមូលនិធិសហប្រតិបត្តិការមេគង្គ-កូរ៉េ (Mekong-Korea Cooperation Fund) គាំទ្រដល់ការដោះស្រាយក្នុងតំបន់មេគង្គ (២)ផ្ទេរ និងចែករំលែកចំណេះដឹង និងមេរៀនសំខាន់ៗនៃការកំណត់អត្តសញ្ញាណ ការធ្វើផែនការ និងការរៀបចំគម្រោងអភិវឌ្ឍន៍ក្នុងតំបន់ ដែលដោះស្រាយបញ្ហានៃវិស័យអាទិភាពទាំងប្រាំពីរនៅក្នុង តំបន់មេគង្គ និង(៣)ដើម្បីប្រមូលធាតុចូលបន្ថែមទៀតពីធនធានសំខាន់ៗនៃវិស័យអាទិភាពចំនួនប្រាំពីរ ដើម្បីបន្តគម្រោង និងការកំណត់បញ្ហាសម្រាប់កិច្ចសហប្រតិបត្តិការក្នុងតំបន់។ លើសពីនេះទៅទៀតសម្រាប់សិក្ខាកាមចូលរួមបានទទួលនូវអត្ថប្រយោជន៍ដូចជា (១) អាចសរសេរគម្រោង និងផែនការសកម្មភាពស្របតាមលក្ខខណ្ឌរបស់កម្មវិធីមូលនិធិ សហប្រតិបតិ្តការមេគង្គ-កូរ៉េ (Mekong-Korea Cooperation Fund) និង(២)បង្កើនចំណេះដឹងអំពីវិធីសាស្រ្តកំណត់អត្តសញ្ញាណគម្រោងក្នុងតំបន់មេគង្គ និងអាចស្វែងរកដៃគូអភិវឌ្ឍន៍ជួយគាំទ្រ។
