ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យ លោក Dazhu Yang អគ្គនាយករងនៃទីភ្នាក់ងារ ថាមពលអាតូមិកអន្តរជាតិចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ១៩ កុម្ភៈ ២០១៨ 2730

នៅវេលាម៉ោង ៣រសៀល ថ្ងៃទី២៤ ខែវិច្ឆិកា ឆ្នាំ២០១៦ នៅទីស្តីការក្រសួង ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យ លោក Dazhu Yang អគ្គនាយករងនៃទីភ្នាក់ងារថាមពលអាតូមិកអន្តរជាតិ ចូលជួបសម្តែងការគួរសម និងពិភាក្សាការងារលើការពង្រឹងកិច្ចសហប្រតិបត្តិការលើវិស័យកសិកម្ម ជាពិសេសលើការ គ្រប់គ្រងសុខភាពសត្វ និងសុវត្ថិភាពចំណីអាហារ តាមរយៈការប្រើប្រាស់បច្ចេកទេសនុយក្លេអ៊ែរ។ ឯកឧត្តមរដ្ឋមន្រ្តី បានមានមតិស្វាគមន៏ ចំពោះទស្សនកិច្ចរបស់ លោក Dazhu Yang លើកដំបូងមកកាន់ប្រទេសកម្ពុជា ព្រមទាំងបានថ្លែងអំណរគុណដល់ ទីភ្នាក់ងារថាមពល អាតូមិកអន្តរជាតិ ដែលបានផ្តល់កិច្ចសហប្រតិបត្តិការជាមួយក្រសួងកសិកម្ម រុក្ខាប្រមាញ់ និងនេសាទ នាពេលកន្លងមក ជាពិសេសការផ្តល់នូវការបណ្តុះបណ្តាល ដល់មន្រ្តីក្រសួងទាំងក្នុង និងក្រៅប្រទេស។ ឯកឧត្តមរដ្ឋមន្រ្តី ក៏បានលើកទឹកចិត្តដល់ទីភ្នាក់ងារ ពង្រីកបន្ថែមនូវការគាំទ្របច្ចេកទេសដល់មន្រ្តីរបស់ក្រសួង នៅកម្រិតថ្នាក់ខេត្ត ដើម្បីអាចឲ្យក្រសួងមានលទ្ធភាពផ្ទេរចំណេះដឹងពីការប្រើប្រាស់បច្ចេកទេសនុយក្លេអ៊ែរនេះ ទៅកាន់ប្រជាកសិករដោយផ្ទាល់បានឆាប់រហ័ស។ លោក Dazhu Yang បានបញ្ជាក់ថាកន្លងមក ទីភ្នាក់ងាររបស់លោកបានផ្តល់នូវកិច្ចសហប្រតិបត្តិការជាមួយក្រសួងកសិកម្ម រុក្ខាប្រមាញ់ និងនេសាទ តាមរយៈការផ្តល់នូវការគាំទ្រ បច្ចេកទេស ដោយបានបញ្ជូនមន្រ្តីទទួលបន្ទុកការងារបុសព្យាបាល និងការងារកសិកម្ម ទៅកាន់ក្រៅប្រទេសដើម្បីទទួលការបណ្តុះបណ្តាល និងផ្ទេរចំណេះដឹងពីការ ប្រើប្រាស់បច្ចេកទេសនុយក្លេអ៊ែរ នៅក្នុងការគ្រប់គ្រងសុខភាពសត្វ និងសុវត្ថិភាពចំណីអាហារ ដើម្បីជំរុញការអភិវឌ្ឍន៏វិស័យកសិកម្មនៅកម្ពុជាប្រកបដោយចីរភាព។ លោកអគ្គនាយករង ក៏បានជម្រាបថា ក្រសួងកសិកម្ម រុក្ខាប្រមាញ់ និងនេសាទ អាចរៀបចំជាសំណើបន្ថែមទៀត និងធ្វើអាទិភាព ដើម្បីពង្រីកកិច្ចសហប្រតិបត្តិ ការរវាងស្ថាប័នទាំងពីរ។ ឆ្លៀតក្នុងឱកាសនេះ លោក Dazhu Yang ក៏បានគោរពអញ្ជើញ ឯកឧត្តមរដ្ឋមន្រ្តី ដើម្បីចូលរួមក្នុងសន្និសិទអន្តរជាតិស្តីពីកម្មវិធី កិច្ច សហប្រតិបត្តិការ បច្ចេកទេស ដែលនឹងរៀបចំឡើងដោយទីភ្នាក់ងារថាមពលអាតូមិកអន្តរជាតិ នៅឯប្រទេសអូទ្រីស នៅថ្ងៃទី៣០ ខែឧសភា ដល់ ថ្ងៃទី ០១ ខែមិថុនា ឆ្នាំ២០១៧ ខាងមុខនេះ។