ឯកឧត្តម សៀក ឡេង អនុរដ្ឋលេខាធិការ ទទួលបន្ទុកការងារឌីជីថលក្រសួងកសិកម្ម រុក្ខាប្រមាញ់ និងនេសាទ បានជួបប្រជុំជាមួយលោក Young Kim នាយកប្រតិបត្តិនៃក្រុមហ៊ុន Digital Harvest មកពីសហរដ្ឋអាមេរិក ដើម្បីពិភាក្សា និងស្វែងយល់ពីការប្រើប្រាស់បច្ចេកវិទ្យាឌីជីថលនិងផ្កាយរណបសម្រាប់គ្រប់គ្រងនិងវិភាគទិន្នន័យកសិកម្ម

ចេញ​ផ្សាយ​ ៣០ មេសា ២០២៦ 3619

នារសៀលថ្ងៃទី២៨  ខែមេសា ឆ្នាំ២០២៦ ឯកឧត្តម សៀក ឡេង អនុរដ្ឋលេខាធិការ ទទួលបន្ទុកការងារឌីជីថលក្រសួងកសិកម្ម រុក្ខាប្រមាញ់ និងនេសាទ បានជួបប្រជុំជាមួយលោក Young Kim នាយកប្រតិបត្តិនៃក្រុមហ៊ុន Digital Harvest មកពីសហរដ្ឋអាមេរិក ដើម្បីពិភាក្សា និងស្វែងយល់ពីការប្រើប្រាស់បច្ចេកវិទ្យាឌីជីថលនិងផ្កាយរណបសម្រាប់គ្រប់គ្រងនិងវិភាគទិន្នន័យកសិកម្ម។
សូមជម្រាបជូនថា នៅក្នុងកិច្ចប្រជុំនេះ ភាគីទាំង២ បានពិភាក្សានិងផ្តល់ធាតុចូលសំខាន់ៗដើម្បីគ្រប់គ្រងនិងវិភាគទិន្នន័យកសិកម្មវៃឆ្លាតរួមមាន៖ 
- យន្តការសម្រាប់ប្រមូលទិន្នន័យតូចៗផ្លូវការដើម្បីបង្កើតទិន្នន័យធំសម្រាប់ធ្វើការវិភាគពេញលេញ
- ភាពចាំបាច់នៃការប្រមូលទិន្នន័យជាក់លាក់នីមួយៗដូចជាព្រំប្រទល់ក្បាលដីកសិកម្ម (Field Boundary), សុខភាពដំណាំនិងដី (Field Health Over Time), ស្ថានភាពធាតុអាកាស (Field Level Weather), ការប្រើប្រាស់ជី (Fertilization Application), កំណត់ត្រាការប្រមូលផល និងផលិតកម្ម (Harvest and Production Logs), ទិន្នន័យពូជដំណាំ (Crop Variety Data), ទិន្នន័យដី (Soil Data field) និងទិន្នន័យផ្សេងៗទៀតដែលចាំបាច់៕