ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមពិធីប្រគល់ជីសរីរាង្គ គ្រាប់ពូជបន្លែ និងផ្ទះសំណាញ់ដល់សហគមន៍កសិកម្ម នៅមន្ទីរកសិកម្ម រុក្ខាប្រមាញ់ និងនេសាទខេត្តតាកែវ

ចេញ​ផ្សាយ​ ១៩ មករា ២០២៤ 2843

នៅថ្ងៃទី១៩ ខែមករា ឆ្នាំ២០២៤ ឯកឧត្តមបណ្ឌិត យ៉ង សាំង កុមារ  រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងអង្គការជាតិ អន្តរជាតិពាក់ព័ន្ធ និងតំណាងសហគមន៍កសិកម្មចំនួន៤០ បានអញ្ជើញចូលរួមពិធីប្រគល់ជីសរីរាង្គ គ្រាប់ពូជបន្លែ និងផ្ទះសំណាញ់ដល់សហគមន៍កសិកម្ម ក្រោមគម្រោង៖ «លើកកម្ពស់សន្តិសុខស្បៀង អាហារូបត្ថម្ភ និងជីវភាពដល់គ្រួសារកសិករក្រីក្រ» ដែលពិធីនេះរៀបចំឡើងដោយអង្គការ Helen Keller សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តតាកែវ និងគាំទ្រដោយមូលនិធិ ពីរដ្ឋាភិបាលអាល្លឺម៉ង់តាមរយ:គម្រោង MUSEFO នៃអង្គការ GIZ ។

ពិធីប្រគល់ជីសរីរាង្គ គ្រាប់ពូជបន្លែ និងផ្ទះសំណាញ់នោះ ធ្វើឡើងសម្រាប់បែងចែកបន្តជូនទៅដល់ប្រជាកសិករចំនួន ១ ៦០០ គ្រួសារ នៅខេត្តតាកែវ។

ក្នុងឱកាសនោះ ឯកឧត្តមបណ្ឌិត យ៉ង សាំង កុមារ បានផ្តល់អនុសាសន៍ទាក់ទងទៅនឹងសារ:សំខាន់ នៃជីធម្មជាតិដើម្បីជួយដល់និរន្តរភាពជីជាតិដី ការបង្កើនការដាំបន្លែតាមគ្រួសារដើម្បីបង្កើតអាហារូបត្ថម្ភ និងការស្តុកស្រូវទុកតាមផ្ទះដើម្បីសន្តិសុខស្បៀងគ្រួសារ។

ឯកឧត្តមបណ្ឌិត ក៏បានពន្យល់អំពីកម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាលទាក់ទងទៅនឹងវិស័យកសិកម្ម ដូចជាគោលនយោបាយទីផ្សារ និងរក្សាលំនឹងថ្លៃកសិផល គោលនយោបាយមន្រ្តីកសិកម្មឃុំ និងសហគមន៍កសិកម្មទំនើបផងដែរ ។

គួរកត់សម្គាល់ថា មន្រ្តីកសិកម្មឃុំនៅខេត្តតាកែវដែលទើបប្រឡងជាប់ ក៏បានចូលរួមក្នុងពិធីនេះ ដែលជាការចាប់ផ្តើមទំនាក់ទំនងដំបូង រវាងសហគមន៍កសិកម្មនិងមន្រ្តីកសិកម្មឃុំ។

ប្រជាសហគមន៍កសិកម្មទាំងអស់ដែលបានចូលរួម បានសម្តែងនូវការរីករាយគាំទ្រដល់វត្តមានមន្រ្តីកសិកម្មឃុំ ហើយក៏មានសហគមន៍កសិកម្មមួយចំនួន បានសម្រេចចិត្តចង់ចាប់ផ្តើមកសាងសហគមន៍ទំនើប ដោយធ្វើលើផលិតកម្មស្រូវមុន៕