លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម បានដឹកនាំអ្នកសារព័ត៌មានចំនួនជាង៤០នាក់ ដើម្បីទៅធ្វើទស្សនកិច្ចសិក្សា និងផ្សព្វផ្សាយអំពីសហគ្រាសជលផលក្រោយប្រមូលផល តាមបណ្ដាខេត្តជាប់មាត់សមុទ្ររបស់កម្ពុជា

ចេញ​ផ្សាយ​ ១៥ កក្កដា ២០២៤ 2998

នៅថ្ងៃទី១៥ ខែកក្កដា ឆ្នាំ២០២៤នេះ លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំជាមួយអ្នកសារព័ត៌មានជាង៤០នាក់ មកពី ២១ស្ថាប័ន មុននឹងចេញដំណើរទៅធ្វើទស្សនកិច្ចសិក្សា និងផ្សព្វផ្សាយអំពីសហគ្រាសជលផលក្រោយប្រមូលផល តាមបណ្ដាខេត្តជាប់មាត់សមុទ្ររបស់កម្ពុជា ទទួលបានការគាំទ្រពីគម្រោង CAPFish-Capture ក្រោមសហហិរញ្ញប្បទានពីសហភាពអឺរ៉ុប។

ដំណើរទស្សនកិច្ចនេះ ដឹកនាំ និងសម្របសម្រួលដោយលោកជំទាវ អ៊ឹម រចនា ដើម្បីផ្សព្វផ្សាយសមិទ្ធផលគម្រោងក្រោមប្រធានបទ «ការទទួលស្គាល់ក្នុងស្រុក និងជាសកលសម្រាប់ផលិតផលជលផល៖ ផលិតអាហារមានសុវត្ថិភាព ដើម្បីពន្លឿនភាពជោជ័យ»។ ដំណើរទស្សនកិច្ចនេះ ធ្វើឡើងនៅរាជធានីភ្នំពេញ ខេត្តកោះកុង និងខេត្តព្រះសីហនុ ចាប់ពីថ្ងៃទី១៥ ដល់ថ្ងៃទី១៨ ខែកក្កដា ឆ្នាំ២០២៤ ដោយមានសមាសភាពចូលរួមសរុប៦៨នាក់ ក្នុងនោះមាន តំណាងក្រសួងកសិកម្ម រដ្ឋបាលជលផល តំណាងសហភាពអឺរុបប្រចាំកម្ពុជា អង្គការ UNIDO និងអ្នកសារព័ត៌មានផ្សេងៗចំនួន ២១ស្ថាប័ន។

លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម នេះជាលើកទី២ហើយ ដែលក្រសួង បានសហការជាមួយសហភាពអឺរ៉ុប និងអង្គការ UNIDO រៀបចំដំណើរទស្សនកិច្ចសិក្សាសម្រាប់ និងផ្សព្វផ្សាយពីផលិតផលជលផលក្រោយប្រមូលផល បន្ទាប់ពីដំណើរទស្សនកិច្ចលើកទី១ ទទួលបានលទ្ធផលគួរឱ្យកត់សម្គាល់។

លោកជំទាវបង្ហាញសុទិដ្ឋិនិយមថា ដំណើរទស្សនកិច្ចលើកនេះ នឹងជួយជំរុញ លើកទឹកចិត្តដល់ម្ចាស់សហគ្រាសទាំងអស់ ឱ្យពង្រឹង និងពង្រីកផលិតផលជលក្រោយប្រមូលផល ទាំងទឹកសាប និងទឹកប្រៃ ដើម្បីធានាស្តង់សុវត្ថិភាពម្ហូបអាហារដល់អ្នកបរិភោគ ពង្រីកទីផ្សារក្នុងស្រុក និងឈានឆ្ពោះទៅកាន់ទីផ្សារអន្តរជាតិ៕