ឯកឧត្តមរដ្ឋលេខាធិការ រស់ សូដែន អញ្ជើញដឹកនាំកិច្ចប្រជុំអន្តរក្រសួង ដើម្បីពិនិត្យ និងស្វែងរកដំណោះស្រាយលើបញ្ហាទិន្នន័យក្នុងការកំណត់បន្ទាត់មូលដ្ឋាន និងត្រួតពិនិត្យ វាយតម្លៃការអនុវត្តយុទ្ធសាស្ត្របញ្ចកោណដំណាក់កាលទី១

ចេញ​ផ្សាយ​ ២៦ វិច្ឆិកា ២០២៥ 1162

នៅថ្ងៃទី២៦ ខែវិច្ឆិកា ឆ្នាំ២០២៥ ឯកឧត្តម រស់ សូដែន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំអន្តរក្រសួង ដើម្បីត្រួតពិនិត្យ និងស្វែងរកដំណោះស្រាយលើបញ្ហាទិន្នន័យក្នុងការកំណត់បន្ទាត់ មូលដ្ឋាន និងចំណុចដៅនៃសូចនាករសមិទ្ធកម្មគន្លឹះទី៣៥ ទី៣៦ និងទី៣៧ ក្នុងតារាងម៉ាទ្រីសវាស់វែងសិមិទ្ធកម្មនៃក្របខ័ណ្ឌតាមដានត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ ដំណាក់កាលទី១ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំនេះ មានការចូលរួមពីតំណាងទីស្តីការគណៈរដ្ឋមន្ត្រី ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ ក្រសួងផែនការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អគ្គនាយកដ្ឋានគយ និងរដ្ឋាករកម្ពុជា ជាដើម។
នៅចំពោះមុខអង្គពិធី ក្រុមការងារអន្តរក្រសួងបានលើកឡើងយ៉ាងផុសផុលពីទិន្នន័យនិងតួលេខចាស់ និងតួលេខថ្មី លើចំណុចដៅនៃសូចនាករសមិទ្ធកម្មគន្លឹះទី៣៥ ទី៣៦ និងទី៣៧ ការកែច្នៃផលិតផលកសិកម្មក្នុងស្រុក  ដូចជា ស្វាយចន្ទី ដំឡូងមី បន្លែ ត្រី សាច់ អំបិល ស្ករ ជាដើម។ 
ទន្ទឹមនឹងនេះ ឯកឧត្តមរដ្ឋលេខាធិការ បានណែនាំទៅក្រុមការងារបច្ចេកទេសដែលមកពីអន្តរក្រសួងត្រូវសហការគ្នារៀបចំទិន្នន័យ និងតួលេខចាស់និងតួលេខថ្មី លើផលិតផលកសិកម្មក្នុងស្រុក  ដូចជា ស្វាយចន្ទី ដំឡូងមី បន្លែ ត្រី សាច់ អំបិល ស្ករ ឱ្យបានច្បាស់លាស់ និងមានសុក្រិតភាព មុននឹងបញ្ជូនតួលេខទាំងនេះទៅថ្នាក់ដឹកនាំពិនិត្យ និងសម្រេច។ជាមួយគ្នានេះ បង្ហាញសុទិដ្ឋិនិយមថា ក្រុមការងារអន្តរក្រសួងនិងរៀបចំទិន្នន័យ និងតួលេខចាស់ និងតួលេខថ្មី លើផលិតផលកសិកម្មក្នុងស្រុក ឱ្យទទួលបានផលវិជ្ជមានល្អនាពេលឆាប់ៗខាងមុខនេះ។
ជាចុងបញ្ចប់ ឯកឧត្តមរដ្ឋលេខាធិការ បានថ្លែងអំណរគុណដល់ក្រុមការងារបច្ចេកទេសអន្តរក្រសួង ដែលបានពិភាក្សាគ្នា ក្នុងការផ្តល់ជាធាតុចូល ដើម្បីលើកស្ទួយវិស័យកសិកម្មនៅកម្ពុជាឱ្យកាន់តែមានភាពរីកចម្រើន ជួយដល់សេដ្ឋកិច្ចជាតិ៕