ឯកឧត្ដមអនុរដ្ឋលេខាធិការ ប៉ែន ផល្លីកា អញ្ជើញចុះពិនិត្យការប្រើឧបករណ៍នេសាទក្នុងរដូវបើកនេសាទ ស្ថិតនៅភូមិសាស្ត្របឹងទន្លេសាប ក្នុងខេត្តចំនួនពីរ

ចេញ​ផ្សាយ​ ១០ កុម្ភៈ ២០២៦ 1068

នៅថ្ងៃទី១០ ខែកុម្ភៈ ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្រ្តី ឌិត ទីណា បានអញ្ជើញដឹកនាំក្រុមការងារជំនាញចុះប្រតិបត្តិការទប់ស្កាត់ និងបង្រ្កាបបទល្មើសជលផល ចាប់ពីចំណុចមាត់ពាមចុងឃ្នៀស  លំហថ្គោល អូរប្រតប់ សង្កាត់ចុងឃ្នៀស ក្រុងសៀមរាប រហូតដល់ចំណុចពាមមេជ្រៃ ក្នុងភូមិសាស្រ្តឃុំកែវពណ៌ ស្រុកពួក ខេត្តសៀមរាប និងបន្តដល់ចំណុចព្រែកទាល់ ស្ថិតក្នុងភូមិសាស្រ្ត ឃុំកោះជីវាំង ស្រុកឯកភ្នំ ខេត្តបាត់ដំបង។ 
ប្រតិបត្តិការនេះ មានការអមដំណើរដោយ លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោកអនុសេនីយ៍ឯក ណី វណ្ណៈ តំណាងកងរាជអាវុធហត្ថខេត្តសៀមរាប ក្រុមអន្តរាគមន៍ថ្នាក់ជាតិទប់ស្កាត់និងបង្រ្កាបបទល្មើសជលផលបឹងទន្លេសាប ប្រចាំស្នាក់ការកំពង់ភ្លុក កម្លាំងខណ្ឌរដ្ឋបាលជលផលសៀមរាបនិងសហការី ដឹកដោយលោក ពត វណ្ណដេត ជានាយរងខណ្ឌ កម្លាំងកងទ័ពយោធភូមិភាគទី៥ ប្រចាំខេត្តសៀមរាប កម្លាំងផ្នែករដ្ឋបាលជលផលព្រែកទាល់ សង្កាត់រដ្ឋបាលជលផលកំពង់ប្រហុក សង្កាត់រដ្ឋបាលជលផលក្បាលតោល ដឹកនាំដោយលោក ចេវ ជឿន ជានាយរងផ្នែក សហគមន៍នេសាទចុងឃ្នៀស សហគមន៍នេសាទកែវពណ៌ សហគមន៍នេសាទខ្នាត សហគមន៍នេសាទថ្វាង សហគមន៍នេសាទកំពង់ប្រហុក សហគមន៍នេសាទអន្លង់តាអួរ សហគមន៍នេសាទព្រែកទាល់ សហគមន៍នេសាទក្បាលតោល កម្លាំងសរុបចំនួន ៤៥នាក់ មធ្យោបាយកាណូតចំនួន ៧គ្រឿង ។ 
ក្នុងដំណើរនេះ ឯកឧត្តមអនុរដ្ឋលេខាធិការ និងក្រុមការងារបានពិនិត្យមើលការធ្វើនេសាទដោយឧបករណ៍ លបរ៉ាវ ចំនួន២០របាំង សង្កេតឃើញថាប្រជានេសាទ បានអនុវត្តន៍ត្រឹមត្រូវទៅតាមច្បាប់កំណត់។ ជាមួយគ្នានេះដែរ ឯកឧត្តមមានប្រសាសន៍សំណេះសំណាលជាមួយប្រជានេសាទប្រមាណ ៣០នាក់ និងបានណែនាំឱ្យប្រជានេសាទអនុវត្តន៍ឱ្យបានត្រឹមត្រូវតាមច្បាប់ជលផលបានកំណត់បន្តទៀត និងសូមចូលរួមទាំងអស់គ្នាក្នុងកិច្ចការការពារ និងអភិរក្សធនធានជលផលបន្តទៀត។
ជាចុងបញ្ចប់ ឯកឧត្តមបានកោតសរសើរ ថ្លែងអំណរគុណ និងសំណូមពរដល់ក្រុមការងារចម្រុះ ត្រូវខិតខំជួយបន្តណែនាំ និងផ្សព្វផ្សាយបន្ថែម ដើម្បីឱ្យប្រជានេសាទគោរពគោលការណ៍នេះឱ្យបានគ្រប់ៗគ្នាជៀសវាងមានការរុះរើដោយកម្លាំងចម្រុះដែលនាំឱ្យមានការខូចខាត និងខាតបង់ថវិការបស់ពួកគាត់៕