ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ុល សុផា អញ្ជើញជាអធិបតី ក្នុងពិធីបិទកិច្ចប្រជុំបូកសរុបលទ្ធផលការងារវិស័យកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ឆ្នាំ២០២៤ និងលើកទិសដៅការងារឆ្នាំ២០២៥
ចេញផ្សាយ ១៦ មករា ២០២៥ 2146
នៅថ្ងៃទី១៤ ខែមករា ឆ្នាំ២០២៥ ឯកឧត្តម ប៉ុល សុផា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតី ក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅការងារសម្រាប់អនុវត្តឆ្នាំ២០២៥ របស់មន្ទីរកសិកម្ម រុក្ខាប្រមាញ់និងនេសាទ ខេត្តបន្ទាយមានជ័យ ដែលមានការចូលរួមពីប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ និងមន្រ្តីក្រោមឱវាទ។
ក្នុងឱកាសនោះ ឯកឧត្តមអនុរដ្ឋលេខាធិការ បាននាំយកនូវសារផ្តាំផ្ញើសួរសុខទុក្ខ ពីសំណាក់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជូនដល់មន្ត្រីរាជការ នៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។ ឯកឧត្តមបានសម្តែងការកោតសរសើរ និងវាយតម្លៃខ្ពស់នូវកិច្ចខិតខំប្រឹងប្រែងរបស់ថ្នាក់ដឹកនាំមន្ទីរគ្រប់ជាន់ថ្នាក់ ក្នុងការបំពេញការងារប្រកបដោយទំនួលខុសត្រូវខ្ពស់ អនុវត្តការងារប្រកបដោយប្រសិទ្ធភាព និងប្រសិទ្ធិផល និងសូមគាំទ្រចំពោះទិសដៅការងារសម្រាប់ឆ្នាំ២០២៥។
ឯកឧត្តមបានផ្តល់អនុសាសន៍ណែនាំដល់អង្គពិធី ត្រូវបន្ត និងបង្កើនពង្រឹងសាមគ្គីភាពផ្ទៃក្នុង ឱ្យបានកាន់តែរឹងមាំថែមទៀត ចូលរួមយ៉ាងសកម្មនិងផុសផុស ក្នុងការអនុវត្តកម្មវិធីរបស់មន្ទីរឱ្យបានសម្រេចជោគជ័យ និងលើសផែនការដែលបានគ្រោងទុក។ ណែនាំប្រជាកសិករឱ្យយល់ច្បាស់ពីចំណាយថ្លៃដើមផលិតកម្ម ពន្យល់ពីប្រសិទ្ធភាពនៃសហគមន៍កសិកម្មទំនើប និងចូលរួមបានកាន់តែច្រើនតាមដែលអាចធ្វើទៅបាន ពន្យល់កសិករឱ្យយល់ពីតម្លៃទីផ្សារ ទីផ្សារសេរី តម្លៃទីផ្សារជាអ្នកកំណត់ នោះគឺអាស្រ័យលើ « តម្រូវការ និងការផ្គត់ផ្គង់ » ទាំងក្នុងស្រុក និងក្រៅស្រុក ដែលជះឥទ្ធិពលគ្នាទៅវិញទៅមក ព្រោះទីផ្សារសេរីគឺបើកចំហរជើងមេឃ។
ជាចុងបញ្ចប់ បើតាមឯកឧត្តម ដើម្បីអភិវឌ្ឍន៍វិស័យកសិកម្មឆ្ពោះទៅការរីកចម្រើន ស្របតាមចក្ខុវិស័យនៃយុទ្ធសាស្រ្តបញ្ចកោណ ដំណាក់កាលទី១របស់រាជរដ្ឋាភិបាលកម្ពុជានីតិកាលទី៧នៃរដ្ឋសភា ក្រោមការដឹកនាំដ៏ឈ្លាសវៃ របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក៏ដូចជាកម្មវិធីរបស់ក្រសួងកសិកម្ម រុក្ខាប្រមាញ់ និងនេសាទ គឺផ្តោតយកចិត្តទុកដាក់ក្នុងការបន្តធានាសន្តិសុខស្បៀងប្រកបដោយនិរន្តរភាព សេដ្ឋកិច្ច និងបរិស្ថាន និងស្របតាមគំនិតផ្ដួចផ្ដើមដ៏ប៉ិនប្រសព្វ ជាយុទ្ធសាស្រ្តរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ គឺធ្វើយ៉ាងណាឱ្យ «មានហូប មានប្រើ មានបាន និងមានរហូត »៕
