ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ មាស ពិសិដ្ឋ អញ្ជើញជាគណៈអធិបតី ក្នុងកិច្ចប្រជុំពិភាក្សាស្តីពី « ការបង្កើតវេទិការបស់អ្នកពាក់ព័ន្ធចម្រុះ ឬ តួអង្គនៃខ្សែច្រវាក់តម្លៃកសិកម្ម » នៅខេត្តភាគខាងជើងបឹងទន្លេសាប
ចេញផ្សាយ ២៧ ធ្នូ ២០២៤ 155
ចាប់ពីថ្ងៃទី២៤ ដល់២៧ ឆ្នាំ២០២៤ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធី គាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT)និងនាយកគម្រោង (PEARL) បានអញ្ជើញជាគណៈអធិបតី ក្នុងកិច្ចប្រជុំពិភាក្សា ស្តីពី « ការបង្កើតវេទិការបស់អ្នកពាក់ព័ន្ធចម្រុះ ឬ តួអង្គនៃខ្សែច្រវាក់តម្លៃកសិកម្ម » ដែលវេទិកាប្រជុំនោះធ្វើឡើងនៅខេត្តភាគខាងជើងបឹងទន្លេសាប រួមមាន៖ ខេត្តកំពង់ធំ ខេត្តព្រះវិហារ ខេត្តឧត្តរមានជ័យ និងខេត្តសៀមរាប។
វេទិកាមានគោលបំណងសំខាន់ៗ ដើម្បីផ្តល់ឱកាសជូនគ្រប់តួអង្គនៃខ្សែច្រវាក់តម្លៃកសិកម្ម ដែលមានអ្នកពាក់ព័ន្ធដូចជា៖ ប្រជាកសិករ អ្នកដឹកនាំសហគមន៍កសិកម្ម អ្នកដឹកនាំសហគមន៍ព្រៃឈើ អ្នកដឹកនាំសហគមន៍តំបន់ការពារធម្មជាតិ អ្នកប្រមូលទិញ អ្នកកែច្នៃ អ្នកនាំចេញផលិតផលកសិកម្ម តំណាងគ្រឹះស្ថានហិរញ្ញវត្ថុ និងតំណាងដៃគូអភិវឌ្ឍន៍ពាក់ព័ន្ធ ជួបពិភាក្សាគ្នាឱ្យបានយល់គ្នាកាន់តែច្បាស់ ដោយពិភាក្សាអំពីបញ្ហាប្រឈមសំខាន់ៗ និងចែករំលែកមេរៀន និងបទពិសោធន៍ល្អៗ ដើម្បីទទួលបានផលប្រយោជន៍ដោយសមធម៌ និងឆ្លើយតបបានល្អនឹងតម្រូវការទីផ្សារ ទន្ទឹមគ្នានឹងការថែរក្សាធនធានធម្មជាតិកសិកម្មឱ្យបានគង់វង្ស ។
នៅក្នុងអង្គវេទិកាពិភាក្សា ឯកឧត្តមរដ្ឋលេខាធិការ មាស ពិសិដ្ឋ បានលើកឡើង អំពីកម្មវិធីគោលនយោបាយអាទិភាពរបស់រាជរដ្ឋាភិបាល ព្រមទាំងយុទ្ធសាស្ត្រ ការយកចិត្តទុកដាក់ និងយន្តការផ្សេងៗរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការដោះស្រាយបញ្ហាប្រឈមសំខាន់ៗ នៅក្នុងវិស័យកសិកម្ម រុក្ខាប្រមាញ់ និងនេសាទ ៕
