ព័ត៌មានផ្សេងៗទៀត
ពូជស្រូវចំនួន១០ដែលកសិករត្រូវតែយកចិត្ដទុកដាក់
ចេញផ្សាយ ១៧ មករា ២០១៨ 3542
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់កសិករ ឱ្យចាប់អារម្មណ៏ ទៅដល់ការប្រើប្រាស់ពូជស្រូវ ចំនួន១០ដើម ដើម្បីផលិតអង្ករសម្រាប់នាំចេញនាពេលខាងមុខ ។
ខណៈនៃការចុះពិនិត្យមើលស្ថានភាពលូតលាស់ របស់ស្រូវ នៅក្រុងដូនកែវ កាលពីពេលថ្មីៗនេះ ឯកឧត្ដមបណ្ឌិត ច័ន្ទសារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ដល់កសិករនៅទីនោះ ក៏ដូចជាសារទៅកាន់កសិករនៅទីកន្លែងផ្សេងទៀត ឱ្យយកចិត្ដទុកដាក់ ដោយប្រើប្រាស់ពូជស្រូវចំនួន១០មុខ ដែលពូជស្រូវទាំងនេះ ជាតម្រូវការរបស់ទីផ្សារ នៅក្នុងស្រុក និងក្រៅប្រទេស ។
ពូជស្រូវទាំង១០នេះ ជាពូជដែលផលិតអង្ករ ដើម្បីនាំចេញស្រប ទៅតាមគោលនយោបាយនាំចេញអង្កររបស់រាជរដ្ឋាភិបាល ។
ពូជស្រូវទាំង១០មុខ ដែលឯកឧត្ដមរដ្ឋមន្ដ្រី បានបញ្ជាក់នោះ គឺមានស្រូវស្រាល មិនប្រកាន់រដូវចំនួន៣មុខក្នុងនោះអ៊ីអ៊ែរ៦៦សែនពិដោរ និងផលសា ។ ស្រូវកណ្ដាល មាន៤មុខ ក្នុងនៅផ្ការំដួល ផ្ការមៀត ផ្ការំដេង និងផ្កាចន្ទន៏សែនស និងពូជស្រូវធ្ងន់ចំនួន៣មុខ ក្នុងនោះមាន រាំងជ័យ ខា៤ និងខា៦ ។
ឯកឧត្ដមរដ្ឋមន្ដ្រី បានបញ្ជាក់ និងណែនាំមន្ទីរកសិកម្ម មន្ដ្រីជំនាញកសិកម្ម ការិយាល័យកសិកម្ម ត្រូវសកម្ម ក្នុងការផ្សព្វផ្សាយពូជស្រូវ ខាងលើនេះ ឱ្យបានដល់កសិករដែលជាអ្នកផលិតផ្ទាល់ និងផ្ដល់ព័ត៌មាន ដល់កសិករអំពីទីផ្សារតម្លៃស្រូវ ដល់កសិករជាប់ជាប្រចាំ ។
ឯកឧត្ដមរដ្ឋមន្ដ្រី បានប្រាប់ដល់កសិករនៅទីនោះផងដែរ អំពីស្ថានភាពកសិកម្ម នៅក្នុងប្រទេស និងលើពិភពលោក ក្រោមបម្រែបម្រួលអាកាសធាតុ ។ ឯកឧត្ដមបញ្ជាក់ថា នេះជាឱកាសមាស របស់កសិករកម្ពុជាយើង ដើម្បីផលិតស្រូវអង្ករ ទៅកាន់ទីផ្សារពិភពលោកដែលកំពុងតែបានថ្លៃ ។
ឯកឧត្ដមសំណូមពរ ឱ្យកសិករ កាន់តែព្យាយាមផ្លាស់ប្ដូរទម្លាប់ និងយកចិត្ដទុកដាក់កាន់តែខ្លាំងថែមទៀត ក្នុងការធ្វើកសិកម្មរបស់ខ្លួន៕
