ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំតម្រង់ទិសការអនុវត្តគម្រោង CREA នៅទីស្តីការក្រសួង

ចេញ​ផ្សាយ​ ១១ ធ្នូ ២០២៥ 2602

នៅថ្ងៃទី១១ ខែធ្នូ ឆ្នាំ ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង “ បង្កើនភាពធន់នឹង អាកាសធាតុ ក្នុងខ្សែច្រវាក់តម្លៃកសិកម្ម នៅកម្ពុជា (Climate Resilience Enhancement for Building Adaptive Capacity in Agri-Value Chains in Cambodia, គម្រោង CREA) ” បានអញ្ជើញជាអធិបតី និងដឹកនាំកិច្ចប្រជុំខាងលើ ។ កិច្ចប្រជុំនេះត្រូវបានចូលរួមដោយថ្នាក់ដឹកនាំ និងមន្ត្រីពាក់ព័ន្ធនៃមន្ទីរកសិកម្ម រុក្ខាប្រមាញ់ និងនេសាទ មន្ទីរបរិស្ថាន និងមន្ទីរកិច្ចការនារី ខេត្តព្រៃវែង និងខេត្តតាកែវ មន្ត្រីធនាគារវីង មន្ត្រីគ្រឹះស្ថានមីក្រូហិរញ្ញវត្ថុចម្រើន មន្ត្រីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ព្រមទាំងមន្ត្រី និងទីប្រឹក្សានៃគម្រោង CREA និងកម្មវិធី “ គាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ” សរុបចំនួន ៤៤ នាក់ (ក្នុងនោះ មានស្ត្រី ៧ នាក់) ។ គួរបញ្ជាក់ថា គម្រោង CREA ជាផ្នែកមួយនៃកម្មវិធី ASPIRE-AT ។
កិច្ចប្រជុំ ដែលរួមមានការបកស្រាយបទបង្ហាញ ការសួរ និងឆ្លើយ ព្រមទាំងការពិភាក្សាយ៉ាងសកម្ម និងប្រកបដោយការយកចិត្តទុកដាក់ខ្ពស់នេះ បានផ្តោតជាសំខាន់ដើម្បីធ្វើឱ្យសិក្ខាកាម ដែលជាតួអង្គរបស់គម្រោង យល់ដឹងកាន់តែច្បាស់អំពីបញ្ហាសំខាន់ៗនៅក្នុងវិស័យកសិកម្ម ការប្រឹងប្រែងរបស់រាជរដ្ឋាភិបាល និងក្រសួងកសិកម្ម រុក្ខាប្រមាញ់ និងនេសាទ ក្នុងការដោះស្រាយបញ្ហាទាំងនោះ ព្រមទាំងកិច្ចអន្តរាគមន៍ដែលគម្រោងត្រូវធ្វើ ដើម្បីរួមចំណែក។  ជាក់ស្តែង គម្រោង CREA ដែលជាយន្តការមួយរបស់ជាតិ និងរបស់ក្រសួងកសិកម្ម រុក្ខាប្រមាញ់ និងនេសាទ និងដែលប្រើប្រាស់ថវិកាជំនួយរបស់មូលនិធិបរិស្ថានសាកល (GEF) តាមរយៈ IFAD នេះ មានបំណងរួមចំណែកបង្កើនការប្រើប្រាស់បច្ចេកវិទ្យាដែលមានភាពសមស្របនឹងការប្រែប្រួលអាកាសធាតុ ពោលគឺ ៖ ១) មានភាពធន់ ពោលគឺមិនងាយខូច ២) ធ្វើឱ្យផលិតកម្មកសិកម្ម ព្រមទាំងការគ្រប់គ្រង និងកែច្នៃកសិផល កាន់តែធន់ និង ៣) មិនបង្កឱ្យមានការប្រែប្រួលអាកាសធាតុ ។ ជាងនោះទៅទៀត បច្ចេកវិទ្យាទាំងនោះក៏រួមចំណែកកាត់បន្ថយថ្លៃដើមសម្រាប់ផលិតកម្ម និងការកែច្នៃផងដែរ ។ បន្ថែមលើការស្រាវជ្រាវរកបច្ចេកវិទ្យាសមស្របសម្រាប់ផ្សព្វផ្សាយជូនកសិករ សហគមន៍កសិកម្ម និងក្រុមហ៊ុនកសិកម្ម គម្រោងក៏សហការជាមួយធនាគារវីង និងមីក្រូហិរញ្ញវត្ថុចម្រើន ដើម្បីផ្តល់ប្រាក់កម្ចីដែលមានអត្រាការប្រាក់សមរម្យ និងដែលមិនមានតម្រូវការខ្ពស់ ពាក់ព័ន្ធនឹងការដាក់ទ្រព្យបញ្ចាំ៕