ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ តំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា អញ្ជើញជាអធិបតីក្នុងពិធីបិទកិច្ចប្រជុំបូកសរុបការងារកៅស៊ូប្រចាំឆ្នាំ២០២៤ និងទិសដៅអនុវត្តឆ្នាំ២០២៥
ចេញផ្សាយ ២៤ ធ្នូ ២០២៤ 1150
នៅព្រឹកថ្ងៃទី២៤ ខែធ្នូ ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា បានអញ្ជើញជាអធិបតីក្នុងពិធីបិទកិច្ចប្រជុំបូកសរុបការងារកៅស៊ូប្រចាំឆ្នាំ២០២៤ និងទិសដៅអនុវត្តឆ្នាំ២០២៥ នៅអគ្គនាយកដ្ឋានកៅស៊ូ។
ថ្លែងទៅកាន់អង្គពិធី ឯកឧត្តមរដ្ឋលេខាធិការ ចាត់ទុកកិច្ចប្រជុំពិភាក្សារួមគ្នារវាងគ្រប់ភាគីពាក់ព័ន្ធទាំងអស់ ទាំងរដ្ឋ និងឯកជន ថាជាឱកាសដ៏ល្អមួយដេីម្បីស្វែងរកមធ្យោបាយដោះស្រាយបញ្ហាប្រឈមទាំងអស់គ្នាក្នុងវិស័យកៅស៊ូកម្ពុជា។ លេីសពីនេះ ឯកឧត្តមរដ្ឋលេខាធិការ បានវាយតម្លៃខ្ពស់នូវការខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានកៅស៊ូក្នុងការបំពេញតួនាទីភារកិច្ចបានល្អ ក្នុងស្មារតីទទួលខុសត្រូវខ្ពស់។
ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់អង្គពិធី ត្រូវចូលរួមជំរុញអភិវឌ្ឍខ្សែចង្វាក់តម្លៃកៅស៊ូ ដែលត្រូវការការចូលរួមគ្រប់ភាគីពាក់ព័ន្ធទាំងអស់ ទាំងរដ្ឋ វិស័យឯកជន បណ្តាក្រុមហ៊ុនកែច្នៃនានា ចាប់តាំងពីការដាំដុះ ថែទាំ ប្រមូលផល ឈានទៅដល់ការកែច្នៃផលិតផលសម្រេចក្នុងស្រុកឱ្យបានច្រេីន និងអាចនាំទៅកាន់ទីផ្សារអន្តរជាតិ។
ទន្ទឹមនឹងនេះ ឯកឧត្តមរដ្ឋលេខាធិការ បានសង្កត់ធ្ងន់ថា ការកសាងទំនុកចិត្តរវាងគ្នា គឺជាប្រការដ៏សំខាន់មួយក្នុងការងារកៅស៊ូនេះដែលត្រូវយកចិត្តទុកដាក់ និងសហការធ្វេីការជាមួយគ្នាចាប់ផ្តេីមពីកសិករ អ្នកប្រមូលទិញ និងបណ្តាក្រុមហ៊ុននានា ដេីម្បីទទួលបានផលប្រយោជន៍រួមគ្នា និងមានលក្ខណៈយូរអង្វែង។
ស្របពេលជាមួយគ្នានេះដែរ ឯកឧត្តមរដ្ឋលេខាធិការ បានថ្លែងអំណរគុណដល់ក្រុមហ៊ុនសុភ័ក្ត្រនីកា ដែលបានចូលរួមក្នុងការផ្តល់ដេីមកៅស៊ូសម្រាប់ការប្រលងប្រណាំងចៀរជ័រកៅស៊ូថ្នាក់ជាតិកន្លងមក និងការប្រារព្ធពិធីខួប ១០០ឆ្នាំចម្ការកៅស៊ូចាស់ជាងគេនៅកម្ពុជា និងសម្ពាធ "ឧទ្យានបេតិកភណ្ឌកៅស៊ូ តេជោ ធិបតី" ប្រកបដោយភាពជោគជ័យ និងមានការផ្សព្វផ្សាយទូលំទូលាយដល់សាធារណជន។
សម្រាប់ការរួមចំណែកអនុវត្តគោលនយោបាយ ឯកឧត្តមរដ្ឋលេខាធិការ បានលេីកទឹកចិត្តដល់អង្គពិធីត្រូវជំរុញការងារសហគមន៍កសិកម្មទំនេីបក្នុងវិស័យកៅស៊ូនេះ ដែលអាចប្រមូលផ្តុំនូវអ្នកដាំកៅស៊ូទាំងអស់ឱ្យមានភាពរឹងមាំ មានឱកាសទីផ្សារ និងអាចជួយដល់ការអភិវឌ្ឍខ្សែចង្វាក់តម្លៃបានយ៉ាងពិតប្រាកដ៕
