ព័ត៌មានផ្សេងៗទៀត
ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារជួបប្រជុំជាមួយសហគមន៍កសិកម្មជ័យជំនះ នៅឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង
ចេញផ្សាយ ១៨ មីនា ២០២៤ 3285
នៅថ្ងៃទី១៨ ខែមីនា ឆ្នាំ២០២៤ ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារ រួមមាន៖ ទីប្រឹក្សាក្រសួងកសិកម្ម រុក្ខាប្រមាញ់ និងនេសាទ មន្រ្តីកសិកម្មឃុំ មន្រ្តីមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ចុះជួបពិភាក្សាការងារជាមួយសមាជិកសហគមន៍កសិកម្មជ័យជំនះ ស្ថិតនៅឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។
កិច្ចប្រជុំក្រុមការងារនេះ ធ្វើឡើងដើម្បីស្វែងយល់អំពីស្ថានភាពមុខរបរ និងសកម្មភាពសហគមន៍ ណែនាំឲ្យសហគមន៍បានស្គាល់មន្រ្តីកសិកម្មឃុំ ព្រមទាំងណែនាំអំពីគោលនយោបាយ គោលការណ៍ និងផលប្រយោជន៍សហគមន៍កសិកម្មទំនើប ដែលអាចដោះស្រាយបញ្ហាប្រឈមរបស់សហគមន៍ ដូចជាការកាត់បន្ថយថ្លៃដើមផលិត ទីផ្សារនិងថ្លៃស្រូវ។
ក្នុងឱកាសនៃកិច្ចប្រជុំនោះ ក្រុមការងារក៏បានអញ្ជើញពិនិត្យ និងពិភាក្សាអំពីសក្តានុពល ព្រមទាំងការប្រឈមក្នុងការពង្រីកប្រព័ន្ធស្រោចស្រពនៅតំបន់ដាំដុះស្រូវរបស់សមាជិកសហគមន៍។
សម្រាប់ផែនការបន្ទាប់ ឯកឧត្តមបណ្ឌិត យ៉ង សាំង កុមារ បានផ្តល់ការណែនាំដល់មន្រ្តីកសិកម្មឃុំជួយស្រង់ទិន្នន័យ សមាជិកសហគមន៍ ទាក់ទងផលិតកម្មស្រូវដើម្បី រៀបចំផែនការផលិតស្រូវផ្សារភ្ជាប់ជាមួយទីផ្សារតាមយន្តការកិច្ច សន្យាផលិតកម្មកសិកម្ម៕
