ក្រុមការងារក្រសួងកសិកម្ម រុក្ខាប្រមាញ់ និងនេសាទ ចុះត្រួតពិនិត្យការធ្វើអាជីវកម្មជីនិងថ្នាំកសិកម្ម ក្នុងខេត្តស្វាយរៀង និងខេត្តព្រៃវែង

ចេញ​ផ្សាយ​ ២៣ សីហា ២០២៤ 3127

នៅថ្ងៃទី២២ ខែសីហា ឆ្នាំ២០២៤ ក្រុមការងារក្រសួងកសិកម្ម រុក្ខាប្រមាញ់ និងនេសាទ ដឹកនាំដោយឯកឧត្តមរដ្ឋលេខាធិការ គង់ ច័ន្ទវាសនា បានចុះត្រួតពិនិត្យការធ្វើអាជីវកម្មជីនិងថ្នាំកសិកម្ម ក្នុងខេត្តស្វាយរៀង និងខេត្តព្រៃវែង។

ឯកឧត្តមបានជួបពិភាក្សាការងារជាមួយថ្នាក់ដឹកនាំនៃខេត្តទាំងពីរ ដើម្បីបង្កើន និងពង្រឹងកិច្ចសហការកាន់តែជិតស្និទ្ធ និងស្អិតរមួតថែមទៀតលើវិស័យកសិកម្ម ដោយផ្តោតលើការគ្រប់គ្រងអាជីវកម្មជីនិងថ្នាំកសិកម្ម សំដៅការពារផលប្រយោជន៍ប្រជាកសិករ​ និងគាំទ្រការធ្វើអាជីវកម្មជីនិងថ្នាំកសិកម្មស្របច្បាប់ ដេីម្បីជំរុញការអភិវឌ្ឍវិស័យកសិកម្ម។ ជាការឆ្លេីយតប​ ថ្នាក់ដឹកនាំខេត្តទាំងពីរបានស្វាគមន៍យ៉ាងកក់ក្តៅ និងរីករាយចូលរួមសហការយ៉ាងពេញលេញជាមួយក្រសួងកសិកម្មលើការងារគ្រប់គ្រង និងបង្កើនការទប់ស្កាត់ការនាំចូល​និងចរាចរណ៍ជីនិងថ្នាំកសិកម្មខុសច្បាប់​ ដោយណែនាំដល់អង្គភាព​ និងអាជ្ញាធរពាក់ព័ន្ធក្នុងដែនសមត្ថកិច្ចខេត្ត​ ឱ្យចូលរួមអនុវត្តការងារនេះឱ្យកាន់តែសកម្មថែមទៀត។

ទន្ទឹមនេះ ឯកឧត្តមរដ្ឋលេខាធិការបានណែនាំឱ្យមន្ទីរកសិកម្មនៃខេត្តទាំងពីរបន្តចុះពិនិត្យតាមដេប៉ូជី និងថ្នាំកសិកម្ម និងណែនាំបងប្អូនអាជីវករឱ្យទៅចុះឈ្មោះចូលរៀនវគ្គអប់រំបណ្តុះបណ្តាលវិជ្ជាជីវ:ស្តីពីការគ្រប់គ្រងជី និងថ្នាំកសិកម្ម ដើម្បីទទួលបានចំណេះដឹងជាមូលដ្ឋានអាចជួយដល់ប្រជាកសិករក្នុងការប្រើប្រាស់និងទុកដាក់ជីនិងថ្នាំកសិកម្មឱ្យបានត្រឹមត្រូវ ទទួលបានទិន្នផលល្អ កាត់បន្ថយចំណាយថ្លៃដើម និងចូលរួមការពារបរិស្ថានបានល្អប្រសើរ។

ឯកឧត្តម និងថ្នាក់ដឹកនាំខេត្ត​ រួមទាំងក្រុមការងារក៏បានចុះពិនិត្យដល់ច្រករបៀង និងដេប៉ូមួយចំនួនក្នុងខេត្តទាំងពីរ ដើម្បីស្វែងយល់ពីស្ថានភាពនៃការធ្វើអាជីវកម្ម និងផ្តល់ការណែនាំបន្ថែមដល់ភាគីពាក់ព័ន្ធអំពីការគ្រប់គ្រងអាជីវកម្មជី និងថ្នាំកសិកម្ម ស្របតាមច្បាប់ និងលិខិតបទដ្ឋានគតិយុត្តជាធរមានផងដែរ៕