ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ សៀក ឡេង បានអញ្ជើញបើកវគ្គបណ្តុះបណ្តាលស្តីពី «ការប្រើប្រាស់ថ្នាល go.gov.kh និងថ្នាល form.gov.kh»
ចេញផ្សាយ ២៤ ធ្នូ ២០២៤ 2332
នៅថ្ងៃទី២៣ ខែធ្នូ ឆ្នាំ២០២៤ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ជាង វុត្ថា ទីប្រឹក្សាក្រសួងប្រៃសណីយ៍ និងទូរគមនាគមន៍ បានអញ្ជើញជាគណៈអធិបតីបើកវគ្គបណ្តុះបណ្តាលស្តីពី«ការប្រើប្រាស់ថ្នាល go.gov.kh និងថ្នាល form.gov.kh» ដែលមានសិក្ខាកាមចូលរួមចំនួន៤៣នាក់ មកពីអង្គភាពអមទីស្តីការក្រសួងកសិកម្ម រុក្ខាប្រមាញ់ និងនេសាទ។
វគ្គបណ្តុះបណ្តាលនេះ ធ្វើឡើងក្នុងគោលបំណង គាំទ្រ និងជំរុញដល់ការប្រើប្រាស់បច្ចេកវិទ្យាដែលខិតខំបង្កើតឡើងដោយរដ្ឋាភិបាល សំដៅបង្កើនសុវត្ថិភាព ប្រសិទ្ធភាព និងប្រសិទ្ធផលការងាររបស់ក្រសួង ស្ថាប័ន។ ឯកឧត្តមក៏បានវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅចំពោះក្រសួងប្រៃសណីយ៍ និងទូរគមនាគមន៍ដែលបាន និងបន្តផ្តល់កិច្ចសហប្រតិបត្តិការយ៉ាងល្អ និងគ្រប់ជ្រុងជ្រោយមកក្រសួងកសិកម្ម រុក្ខាប្រមាញ់ និងនេសាទ ទាំងសម្ភារព័ត៌មានវិទ្យា ទាំងការងារតភ្ជាប់បណ្តាញហេដ្ឋារចនាសម្ព័ន្ធអ៊ីនធឺណិត ការងារ Hosting ប្រព័ន្ធព័ត៌មាននិងទិន្នន័យសំខាន់ៗមួយចំនួនរបស់ក្រសួងនៅលើ Server របស់ក្រសួងប្រៃសណីយ៍ និងទូរគមនាគមន៍ ដើម្បីធានាដល់សុវត្ថិភាពនិងសន្តិសុខឌីជីថល ការប្រើប្រាស់ថ្នាលបច្ចេកវិទ្យា verify.gov.kh និងពិសេសការលើកកម្ពស់ និងពង្រឹងសមត្ថភាពធនធានឌីជីថលជូនមន្ត្រីក្រសួង និងមន្ត្រីកសិកម្មឃុំ សរុបបានជាង៤០០នាក់ កន្លងមកនេះ។
លើសពីនេះ ឯកឧត្តមគូសបញ្ជាក់ថា មន្ត្រីក្រសួងចំនួន១៥០នាក់ និងមន្ត្រីកសិកម្មឃុំថ្មីដែលទើបតែត្រូវបានជ្រើសរើសចំនួន១ ០០០ នាក់ នឹងទៅទទួលការបណ្តុះបណ្តាលផ្នែកឌីជីថលក្នុងដើមឆ្នាំ២០២៥ និង៣៥០នាក់ បន្ថែមទៀតនៅឆ្នាំ២០២៥ខាងមុខនេះ ដើម្បីជួយពន្លឿនដល់ការធ្វើឌីជីថលតូបនីយកម្មរបស់ក្រសួង ពិសេសចូលរួមជាមួយរាជរដ្ឋាភិបាលក្នុងការជំរុញបរិវត្តកម្មឌីជីថល ដោយផ្តើមចេញពីការកសាងមូលដ្ឋានគ្រឹះឌីជីថល និងការចាប់យកឌីជីថល។
ជាទីបញ្ចប់ ឯកឧត្តមបានជំរុញ និងលើកទឹកចិត្តដល់សិក្ខាកាមទាំងអស់ បន្ទាប់ពីបានស្វែងយល់ និងចេះនូវរបៀបប្រើប្រាស់ថ្នាលទាំងពីរនេះ ត្រូវយកទៅអនុវត្តតាមអង្គភាពរបស់ខ្លួនឱ្យបានសកម្ម និងទូលំទូលាយ៕
