ព័ត៌មានផ្សេងៗទៀត
លោកជំទាវ អ៊ឹម រចនា៖ ការទម្លាក់ប្រអប់ជម្រកត្រីសិប្បនិម្មិត គឺជាបេសកកម្មអភិរក្សជីវៈចម្រុះកម្រិតអន្ដរជាតិ និងជាយុទ្ធសាស្ត្រ «របាំងការពារបាតសមុទ្រ» ដ៏មានប្រសិទ្ធភាព
ចេញផ្សាយ ២៦ មេសា ២០២៦ 2770
នៅថ្ងៃទី២៥ ខែមេសា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាព ក្នុងកម្មវិធីប្រកាសការទម្លាក់ប្រអប់ជម្រកត្រីសិប្បនិម្មិតនៅប្រជុំកោះស្តេច ដើម្បីការពារធនធានជីវៈចម្រុះ ដែលកម្មវិធីប្រព្រឹត្តទៅនៅ Royal Beach Resort & Residence ក្នុងខេត្តកោះកុង។
កម្មវិធីរៀបចំឡើងដោយអង្គការសត្វព្រៃ និងរុក្ខជាតិ (Fauna & Flora) សហការជាមួយនាយកដ្ឋានអភិរក្សជលផល នៃអគ្គនាយកដ្ឋានជលផល នៃក្រសួងកសិកម្ម រុក្ខាប្រមាញ់ និងនេសាទ មានការចូលរួមពីលោក គិត សុផា អភិបាលរង នៃគណៈអភិបាលខេត្តកោះកុង លោក អ៊ុក វិបុល ប្រធាននាយកដ្ឋានអភិរក្សជលផល នៃអគ្គនាយកដ្ឋានជលផល លោកបណ្ឌិត ហម ច័ន្ទដេត នាយកអង្គការសត្វព្រៃ និងរុក្ខជាតិ ប្រចាំកម្ពុជា លោកស្រី អែម សុធារ៉ា ប្រធានមន្ទីរកសិកម្មខេត្តកោះកុង ខណ្ឌរដ្ឋបាលជលផល មេបញ្ជាការ អធិការ អាជ្ញាធរមូលដ្ឋានស្រុក ឃុំ និងសមាជិកសហគមន៍នេសាទ សរុបអ្នកចូលរួមប្រមាណ ៤០រូប។
ថ្លែងក្នុងពិធីប្រកាសបើកកម្មវិធី លោកជំទាវ អ៊ឹម រចនា បានគូសបញ្ជាក់ថា ការទម្លាក់ប្រអប់ជម្រកត្រីសិប្បនិម្មិតចំនួន ១២បន្ថែមទៀត នៅតំបន់កោះស្ដេចនេះ គឺជាបេសកកម្មអភិរក្សជីវៈចម្រុះកម្រិតអន្ដរជាតិ និងជាយុទ្ធសាស្ត្រ «របាំងការពារបាតសមុទ្រ» ដ៏មានប្រសិទ្ធភាព។ កាលពីឆ្នាំ២០២៣ ប្រអប់ជម្រកត្រីសិប្បនិម្មិតចំនួន១៤ ដែលបានទម្លាក់រួចរាល់ បានដើរតួនាទីយ៉ាងសំខាន់ក្នុងការទប់ស្កាត់ការនេសាទខុសច្បាប់ ជាពិសេសការប្រើអួនអូសនៅក្នុងដែនសហគមន៍នេសាទ ដែលជាសត្រូវដ៏គ្រោះថ្នាក់បំផុតចំពោះប្រភេទសត្វកម្រមាន៖ អេប៉ុង Neptune’s cup សេះសមុទ្រ និងស្មៅសមុទ្រ និងផ្កាថ្មជាដើម។
បើតាមលោកជំទាវអនុរដ្ឋលេខាធិការ យើងមិនអាចបណ្ដែតបណ្តោយឱ្យការនេសាទដ៏បំផ្លិចបំផ្លាញនេះ បន្ត «ប្លន់» យកធនធានធម្មជាតិពីយើងតទៅទៀតបានឡើយ។ និងថា ការទម្លាក់ប្រអប់ជម្រកត្រីសិប្បនិម្មិត មិនមែនគ្រាន់តែជាការងារបច្ចេកទេសធម្មតានោះទេ ប៉ុន្តែឆ្លុះបញ្ចាំងយ៉ាងច្បាស់ពីចក្ខុវិស័យ និងយុទ្ធសាស្ត្ររបស់រាជរដ្ឋាភិបាលកម្ពុជាអាណត្តិទី៧ ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ អភិក្រមទី៤ ផ្តោតលើ «ការអភិវឌ្ឍប្រកបដោយចីរភាព និងបរិយាបន្ន»។
នៅចុងបញ្ចប់ លោកជំទាវ អ៊ឹម រចនា បានអំពាវនាវដល់សហគមន៍នេសាទ សហគមន៍មូលដ្ឋាន អាជ្ញាធរគ្រប់លំដាប់ថ្នាក់ និងកងកម្លាំងសមត្ថកិច្ច បន្តសហការគ្នា ដើម្បីការពារប្រអប់ជម្រកត្រីទាំងនេះ។ ការអនុវត្តច្បាប់យ៉ាងតឹងរ៉ឹង រួមផ្សំនឹងដាក់ពង្រាយប្រអប់ជម្រកត្រីសិប្បនិម្មិតនេះ នឹងអាចឈានទៅធានាសន្តិសុខស្បៀង និងសេដ្ឋកិច្ចរបស់ប្រជាជននៅតំបន់កោះស្ដេចបាន។ ធានាបាន ព្រោះនៅពេលដែលផ្កាថ្ម និងស្មៅសមុទ្រអាចរក្សាបានគង់វង្ស នោះផលនេសាទនឹងកើនឡើង ដោយប្រកែកមិនបាន។
សូមជម្រាបថា ក្រោមកិច្ចខិតខំប្រឹងប្រែងរបស់អគ្គនាយកដ្ឋានជលផល សហការជាមួយអង្គការដៃគូនានា បានទម្លាក់ប្រអប់ជម្រកត្រីសិប្បនិម្មិតបានសរុបចំនួន ២ ១៥២ប្រអប់ ក្នុងខេត្តជាប់តំបន់ឆ្នេរទាំង៤ នៅទូទាំងប្រទេសកម្ពុជា៕
