ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន អញ្ជើញជួបសំណេះសំណាល ពិនិត្យសក្តានុពលដើម្បីផ្តល់ជំនួយគាំទ្រ ដល់សហគមន៍កសិកម្មទំនើប ក្រោមក្របខណ្ឌកិច្ចអន្តរាគមន៍អន្តរវិស័យកសិកម្ម-ទឹក-ជនបទ នៅខេត្តបាត់ដំបង

ចេញ​ផ្សាយ​ ២៤ តុលា ២០២៥ 768

នៅថ្ងៃទី២៤ ខែតុលា ឆ្នាំ២០២៥ ដោយមានការចូលរួមពីសហប្រធាន ទាំង៣រូប នៃក្រុមការងារត្រី-វិស័យ មានឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និង ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ បានអញ្ជើញ បន្ត ដឹកនាំសមាជិក និងក្រុមលេខាធិការដ្ឋានក្រសួងទាំង៣ ជួបប្រជុំ ជាមួយ ប្រធាន អនុប្រធាន និងសមាជិកសមាជិកា នៃសហគមន៍ទំនើបស្រូវ អង្ករ សុវត្ថិភាពស្រុកឯកភ្នំ ស្ថិតនៅភូមិរហាលសួង ឃុំព្រែកនរិន្ទ ស្រុកឯកភ្នំ ខេត្ដបាត់ដំបង។ 
ជំនួបនេះ ធ្វើឡើងដើម្បីពិនិត្យ និងវាយតម្លៃលើលក្ខណៈសម្បត្តិរបស់ សហគមន៍ទំនើបនេះ សម្រាប់ការត្រៀមដាក់បញ្ចូលក្នុងក្របខណ្ឌ សហគមន៍កសិកម្មទំនើបត្រី-វិស័យ នៅឆ្នាំ២០២៦ ខាងមុខ។ ការបញ្ចូលក្នុងក្របខណ្ឌថ្មីនេះ សហគមន៍នឹងទទួលបានការគាំទ្របន្ថែមពីក្រសួងទាំង៣ លើការជំរុញកំណើនផលិតភាពដំណាំកសិកម្ម ការប្រើប្រាស់ធនធានទឹកពហុបំណងប្រកបដោយប្រសិទ្ធភាព និងការគាំទ្រលើហេដ្ឋារចនាសម្ព័ន្ធបំពេញបន្ថែមផ្សេងៗ។ 
សូមបញ្ជាក់ថា ការចុះពិនិត្យ និងវាយតម្លៃ វឌ្ឍនភាពការងារសហគមន៍កសិកម្ម ចំនួន៥ថ្ងៃ (ពីថ្ងៃទី២០ ដល់ ២៤ ខែតុលា ឆ្នាំ២០២៥) បានធ្វើលើសហគមន៍ចំនួន៧រួចហើយ ដើម្បីរៀបចំជាបេក្ខភាពសហគមន៍ត្រី-វិស័យ សម្រាប់ឆ្នាំ២០២៦ ដែលក្នុងនោះស្ថិតនៅខេត្តកំពង់ធំ ៣សហគមន៍  ខេត្តបន្ទាយមានជ័យ ១សហគមន៍ ខេត្តសៀមរាប ១សហគមន៍ ខេត្តកណ្តាល ១សហគមន៍ និងខេត្តបាត់ដំបង ១សហគមន៍៕