ឯកឧត្តម អ៊ួង កុសល រដ្ឋលេខាធិការក្រសួងកសិកម្ម បានអញ្ជើញជាអធិបតីប្រគល់ពានរង្វាន់ជ័យលាភី ដល់ក្រុមហ៊ុន សហគ្រាស និងអ្នកកែច្នៃស្វាយចន្ទីឆ្នើម ឆ្នាំ២០២៤

ចេញ​ផ្សាយ​ ៦ មិថុនា ២០២៤ 2999

នៅថ្ងៃទី៦ ខែមិថុនា ឆ្នាំ២០២៤ ឯកឧត្តម អ៊ួង កុសល រដ្ឋលេខាធិការក្រសួងកសិកម្ម ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីចូលរួមប្រគល់ពានរង្វាន់ជ័យលាភីសរុបចំនួន៨ ដល់ក្រុមហ៊ុន សហគ្រាស និងអ្នកកែច្នៃស្វាយចន្ទីឆ្នើម ឆ្នាំ២០២៤ ទីស្តីការក្រសួងកសិកម្ម រុក្ខាប្រមាញ់ និងនេសាទ។

លទ្ធផលអ្នកឈ្នះពានរង្វាន់សម្រាប់ជ័យលាភីត្រូវបានកំណត់តាមលំដាប់ដូចខាងក្រោមដូចជា ពានកិត្តិយសសម្រាប់ ក្រុមហ៊ុនកែច្នៃគ្រាប់ស្វាយចន្ទីឆ្នើម ឆ្នំា ២០២៤ ចំនួន ៣ រួមមាន៖ ទី១.ក្រុមហ៊ុន សានតាណា អាហ្រ្គោ ប្រដាក់ ឯ.ក មកពីខេត្តព្រះវិហារ ទី២.ក្រុមហ៊ុន Mirarth Agri Tech Co.Ltd  មកពីខេត្តកំពង់ធំ ទី៣.សហគ្រាស កម្ពុណាត់ អាហ្រ្គោ ប្រដាក់ ឯ.ក មកពីខេត្តកំពង់ធំ។

ចំណែក ពានកិត្តិយសម្រាប់ អ្នកកែច្នៃគ្រាប់ស្វាយចន្ទីឆ្នើម ឆ្នំា២០២៤ ចំនួន ២ រួមមាន ទី១.សហគ្រាស សុវណ្ណៈមូជិន អាហ្រ្គូ ឯ.ក  មកពីខេត្តកំពង់ស្ពឺ និងទី២.សហគ្រាស វេហាស៍ ជូស៍ ឯ.ក មកពីខេត្តបន្ទាយមានជ័យ។ រីឯ ជ័យលោភីលេខ១ លេខ២ និងលេខ៣ សម្រាប់អ្នកកែច្នៃស្វាយចន្ទីឆ្នើម ឆ្នាំ២០២៤ គឺអ្នកកែច្នៃស្វាយចន្ទីឆ្នើម ២០២៤ ទទួលបានជ័យលាភីលេខ ៣គឺ សិប្បកម្មកែច្នៃគ្រាប់ស្វាយចន្ទី ជ័យ សំបូរ មកពីខេត្តកំពង់ធំ ទី២.អ្នកកែច្នៃស្វាយចន្ទីឆ្នើម ២០២៤ ទទួលបានជ័យលាភីលេខ ២គឺ សហគ្រាស ៣កូអេកូ មកពីខេត្តកំពង់ធំ និងទី៣. អ្នកកែច្នៃស្វាយចន្ទីឆ្នើម ២០២៤ ទទួលបានជ័យលាភីលេខ ១គឺ សិប្បកម្មគ្រាប់ស្វាយចន្ទី ចំការលើ ឡឹង ម៉ានុត មកពីចំការលើខេត្តកំពង់ចាម។

ក្នុងឱកាសបិទ “កម្មវិធីប្រឡងប្រជែងអ្នកកែច្នៃគ្រាប់ស្វាយចន្ទីឆ្នើម ឆ្នាំ២០២៤” ឯកឧត្តម ឯកឧត្តម អ៊ួង កុសល  មានប្រសាសន៍ថា ការប្រឡងប្រជែងអ្នកកែច្នៃគ្រាប់ស្វាយចន្ទីឆ្នើម ឆ្នាំ២០២៤ គឺជាព្រឹត្តការណ៍ដ៏សំខាន់មួយដែលបានបង្កើតនូវឱកាសសម្រាប់សហគ្រាស សិប្បករ រោងចក្រ អ្នកកែច្នៃទាំងអស់ឱ្យបានចូលរួមប្រគួតប្រជែង ដោយបានជំរុញ និងលើកកម្ពស់ការអភិវឌ្ឍវិស័យស្វាយចន្ទី តាមរយៈបច្ចេទេសកែច្នៃគ្រាប់ស្វាយចន្ទី ការប្រកួត ប្រជែងទីផ្សារ និងការបន្ថែមរសជាតិ លើផលិតផលគ្រាប់ស្វាយចន្ទីជាដើម។

ឯកឧត្តមរដ្ឋលេខាធិការ ក៏បានលើកទឹកចិត្តដល់អ្នកកែច្នៃ សិប្បកម្ម រោងចក្រ សហគ្រាសកែច្នៃទាំងអស់ ដែលមិនបានជាប់ជ័យលាភី កុំមានការអាក់អន់ចិត្ត តែសូមខិតខំប្រឹងប្រែងបន្ថែមទៀត។ ស្របជាមួយគ្នានេះដែរ នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ ក្នុងនាមជាអង្គភាពជំនាញទទួលបន្ទុក នឹងខិតខំប្រឹងប្រែងក្នុងការសហការសម្របម្រួលផ្នែកបច្ចេកទេសទៅតាមតម្រូវការជាក់ស្តែង។ 

បន្ថែមពីនេះឯកឧត្តម បានថ្លែងអំណរគុណ និងកោតសរសើរខ្ពស់ចំពោះកិច្ចខិតខំប្រឹងប្រែងយកចិត្ត ទុកដាក់របស់ថ្នាក់ដឹកនាំ និងមន្ត្រីរាជការនៃនាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទទាំងអស់ ដែលបានសម្របសម្រួលរៀបចំកម្មវិធីប្រឡងប្រជែង វគ្គផ្តាច់ព័្រតនេះឡើង ឱ្យមានដំណើរការប្រព្រឹត្តទៅបានល្អប្រសើរក្រៃលែងតាមការរំពឹងទុក។ ជាងនេះទៅទៀត ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះអង្គការ GIZ-CRAS, ក្រុមហ៊ុនហានរី វី ភី បាយអូថេកណូឡូជី, ក្រុមហ៊ុន CSNS Agricultural Co.,Ltd, ក្រុមហ៊ុន Tropicam Fruit and Vegetable, ក្រុមហ៊ុន MIRARTH Agri Tech Co., Ltd និងក្រុមហ៊ុន Future Sense រួមទាំងដៃគួរសហការណ៍គាំទ្រទាំងអស់ដែលបាន សហការ ឧបត្ថម្ភគាំទ្រយ៉ាងពេញទំហឹង ក្នុងដំណើរការរៀបចំកម្មវិធីតាំងពីជុំទី១ រហូតដល់វគ្គផ្តាច់ព្រ័តនេះផងដែរ។

គួររំលឹកថា កម្មវិធីប្រឡងប្រជែងអ្នកកែច្នៃគ្រាប់ស្វាយចន្ទីឆ្នើម ឆ្នាំ២០២៤ ធ្វើឡើងក្នុងគោលបំណង ផ្សព្វផ្សាយ ស្វែងរកសហគ្រាសកែច្នៃផលិតផលគ្រាប់ស្វាយចន្ទីឆ្នើមបំផុត និងជំរុញ លើកកម្ពស់ការអភិវឌ្ឍន៍វិស័យស្វាយចន្ទី តាមរយៈយន្តការអនុវត្តផលិតកម្មកសិកម្មតាមកិច្ចសន្យា បច្ចេកទេសការកែច្នៃគ្រាប់ស្វាយចន្ទី ការវិភាគសេដ្ឋកិច្ចការកែច្នៃគ្រាប់ស្វាយចន្ទី ការប្រកួតប្រជែងទីផ្សារ និងការបន្ថែមរស់ជាតិលើផលិតផលគ្រាប់ស្វាយចន្ទី។ កម្មវិធីនេះ បានចាប់ ផ្តើមនៅថ្ងៃទី៩ ខែឧសភា រហូតដល់ថ្ងៃទី៦ ខែមិថុនា ឆ្នាំ២០២៤ ដោយមានអ្នកចូលរួមប្រឡងមានចំនួនសរុប២០សិប្បករ៕