ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យលោកបណ្ឌិត Nigel Brett នាយកប្រតិបត្តិការថ្មីនៃអង្គការ IFAD ប្រចាំអាស៊ីប៉ាស៊ីហ្វិក ចូលជួបសម្តែងការគួរសម និង ពិភាក្សាការងារ

ចេញ​ផ្សាយ​ ២៩ ឧសភា ២០១៨ 2844

រសៀលថ្ងៃចន្ទ ១៤កើត ខែជេស្ឋ ឆ្នាំច សំរឹទ្ធិស័ក២៥៦២ ត្រូវនឹងថ្ងៃទី២៨ ខែឧសភា ឆ្នាំ២០១៨ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានអនុញ្ញាតឲ្យលោកបណ្ឌិត Nigel Brett នាយកប្រតិបត្តិការថ្មីនៃអង្គការ IFAD ប្រចាំអាស៊ីប៉ាស៊ីហ្វិក និងសហការីចូលសម្តែងការគួរសម ណែនាំអ្នកគ្រប់គ្រងកម្មវិធីថ្មីប្រចាំព្រះរាជាណាចក្រកម្ពុជា និងជម្រាបជូនជ្រាបនូវបច្ចុប្បន្នភាព ក៏ដូចជាស្នើសុំអនុសាសន៍ដើម្បីតម្រង់ទិសនៃការអនុវត្តកម្មវិធី The Agriculture Services Program for Innovation, Resilience and Extension (ASPIRE) គម្រោង The Project for Agriculture Development and Economic Empowerment (PADEE) និងគម្រោង Scaling-up of Renewable Energy Technologies in Rural Cambodia (SRET) ឲ្យទទួលបានលទ្ធផលកាន់តែល្អប្រសើរ។

ជាកិច្ចស្វាគមន៍ ឯកឧត្តមរដ្ឋមន្ត្រីបានសម្តែងនូវសេចក្តីរីករាយ និងអរគុណដល់អង្គការ IFAD ដែលបន្តគាំទ្រនិងផ្តល់កិច្ចសហប្រតិបត្តិការយ៉ាងល្អជាមួយរាជរដ្ឋាភិបាលក្នុងការអភិវឌ្ឍប្រទេសកម្ពុជា ជាពិសេសក្នុងវិស័យកសិកម្មនេះតែម្តង។ ឯកឧត្តមរដ្ឋមន្ត្រីបានគូសបញ្ជាក់អំពីវឌ្ឍនភាពនៃកំណើនក្នុងវិស័យកសិកម្មទទួលបានប្រមាណជា ២% ក្នុងឆ្នាំ២០១៧ ដែលក្នុងនោះអង្គការ IFAD បានចូលរួមយ៉ាងសកម្ម និងមានប្រសិទ្ធភាពតាមរយៈបង្កើនផលិតភាពផលិតកម្ម បង្កើនសមត្ថភាពទាំងផ្នែកដាំដុះ និងបច្ចេកទេស និងបានលើកកម្ពស់ប្រាក់ចំណូលគ្រួសារស្របតាមកំណើនសេដ្ឋកិច្ចជាតិ។

ឯកឧត្តមរដ្ឋមន្ត្រីសង្ឃឹមថាអង្គការ IFAD និងបន្តកិច្ចសហប្រតិបត្តិការគ្រប់ជ្រុងជ្រោយនេះដើម្បីជួយដល់រាជរដ្ឋាភិបាលសម្រេចនូវគោលនយោបាយក្នុងការប្រែក្លាយប្រទេសជាតិទៅជាប្រទេសដែលមានចំណូលមធ្យមកម្រិតខ្ពស់ក្នុងឆ្នាំ២០៣០។ លោកបណ្ឌិត Nigel Brett បានធ្វើការកោតសរសើរចំពោះសន្ទុះនៃការអភិវឌ្ឍរបស់ប្រទេសកម្ពុជា ហើយលោកក៏បានវាយតម្លៃខ្ពស់ចំពោះការសហការពីក្រសួងកសិកម្ម រុក្ខាប្រមាញ់ និងនេសាទ រួមគ្នាអនុវត្តគម្រោង PADEE និង SRET ជាពិសេសកម្មវិធី ASPIRE ទទួលបានលទ្ធផលគួរជាទីមោទនៈ។

សូមបញ្ជាក់ផងដែរថាកម្មវិធី ASPIRE នេះបានទទួលលទ្ធផលយ៉ាងល្អប្រសើរដែលបានធ្វើឲ្យអង្គការ IFAD មានគម្រោងបន្ថែមទុនឧបត្ថម្ភជាង ១២លានដុល្លារអាមេរិកបន្ថែមទៀតដើម្បីជំរុញកម្មវិធីនេះឲ្យគ្របដណ្តប់ទូទាំងប្រទេស។

នាឱកាសដ៏ប្រពៃនេះ ឯកឧត្តមរដ្ឋមន្ត្រីបានឯកភាពលើគម្រោងបន្ថែមទុនឧបត្ថម្ភរបស់អង្គការ IFAD ហើយឯកឧត្តមរដ្ឋមន្ត្រីក៏បានណែនាំឲ្យមានការរៀបចំជាសិក្ខាសាលា ឬកិច្ចប្រជុំមួយដើម្បីបង្ហាញពីវឌ្ឍនភាព និងលទ្ធផលដែលទទួលបានពីកម្មវិធីនេះផងដែរ។

ទន្ទឹមនឹងនេះ ឯកឧត្តមរដ្ឋមន្ត្រីបានផ្តល់អនុសាសន៍មួយចំនួនបន្ថែមទៀតដើម្បីជាស្នូលតម្រង់ទិសនៃការអនុវត្តឲ្យទទួលបានជោគជ័យបន្ថែមទៀត ដោយ

ទី១ ត្រូវគិតគូរដល់ការបម្រែបម្រួលអាកាសធាតុ

ទី២ ការគ្រប់គ្រង និងប្រើប្រាស់ធារាសាស្ត្រកសិកម្មប្រកបដោយប្រសិទ្ធភាព និងនិរន្តភាព

ទី៣ ការកំណត់តំបន់ដាំដុះស្របតាមគុណភាពដី បរិមាណទឹកដែលមាន និងអាកាសធាតុ

ទី៤ ជំរុញការធ្វើទំនើបកម្មកសិកម្ម

ទី៥ លើកស្ទួយអាហាររូបត្ថម្ភដល់ប្រជាជន។ ជំនួបពិភាក្សាត្រូវបានបញ្ចប់ក្នុងបរិយាកាសស្និទ្ធស្នាល ប្រកបដោយមិត្តភាព កិច្ចសហប្រតិបត្តិការខ្ពស់បំផុត។