ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម អញ្ជើញចុះសួរសុខទុក្ខកងអន្តរាគមន៍បង្រ្កាបបទល្មើសជលផល ដែលឈរជើងនៅអាងត្រពាំងថ្ម ក្នុងស្រុកភ្នំស្រុក ខេត្តបន្ទាយមានជ័យ

ចេញ​ផ្សាយ​ ៧ មេសា ២០២៤ 3301

នៅថ្ងៃសៅរ៍ ទី0៦ ខែមេសា ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ សហការជាមួយនាយខណ្ឌរដ្ឋបាលជលផលខេត្តបន្ទាយមានជ័យ បានអញ្ជើញចុះសួរសុខទុក្ខ និងត្រួតពិនិត្យ កងអន្តរាគមន៍ថ្នាក់ខេត្ត រួមមានកងរាជអាវុធហត្ថ នគរបាល យោធា បរិស្ថាន ដែលឈរជើងនៅលើតំបន់អាងត្រពាំងថ្ម ក្នុងស្រុកភ្នំស្រុក ខេត្តបន្ទាយមានជ័យ។

ក្នុងដំណើរទស្សនកិច្ចនោះ ឯកឧត្តម ប៉ែន ផល្លីកា បានពាំនាំនូវការផ្តាំផ្ញើសួរសុខទុក្ខពី ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ស្តីពីការខិតខំបំពេញការងារទប់ស្កាត់ និងបង្រ្កាបបទល្មើសជលផល ដែលធ្វើឲ្យមហន្តរាយដល់ ជីវចម្រុះធម្មជាតិជាច្រើននៅក្នុងអាងនេះ ពិសេសគឺការប្រើឧបករណ៍ឆក់ ដែលជាបញ្ហាធំមួយចាំបាច់ត្រូវតែបង្រ្កាប។

ក្នុងឱកាសនោះដែរ ឯកឧត្តមបានស្ដាប់របាយការណ៍ពីកងកម្លាំងពាក់ព័ន្ធ និងបានសន្យាជួយពាំនាំសំណូមពរ និងសំណើមួយចំនួនជូនថ្នាក់ដឹកនាំ ដើម្បីជួយដោះស្រាយបញ្ហាឱ្យចំគោលដៅ ប្រកបដោយប្រសិទ្ធភាព និងប្រសិទ្ធផលខ្ពស់។

ឯកឧត្តមបានសរសើរ និងថ្លែងអំណរគុណដល់ក្រុមអន្តរាគមន៍ដែលបានខិតខំ និងសហការគ្នាបានល្អក្នុងការចុះបំពេញការងារ។ ក្រោយមកកងអន្តរាគមន៍បានបង្ហាញនូវឧបករណ៍ខុសច្បាប់មួយចំនួនដែលរឹបអូសបាន មានដូចជា៖ កាណូត១គ្រឿង អាំងវែកទ័រ អាគុយ កាំភ្លើងច្នៃសម្រាប់បាញ់ត្រី និងសត្វ និងដងឆក់ជាច្រើនគូទៀតផង៕