ឯកឧត្តមរដ្ឋមន្ត្រី ឌិត ទីណា បានចុះពិនិត្យទីសត្តឃាតដ្ឋានទំនើបរបស់ក្រុមហ៊ុន CP Cambodia

ចេញ​ផ្សាយ​ ២៤ វិច្ឆិកា ២០២២ 5101

កម្មវិធីទី១៖២៣-វិច្ឆិកា ឆ្នាំ២០២២ (ឃុំជម្ពូវ័ន្ត ស្រុកជុំគិរី ខេត្តកំពត)៖ ឯកឧត្តមរដ្ឋមន្ត្រី ឌិត ទីណា បានចុះពិនិត្យទីសត្តឃាតដ្ឋានទំនើបរបស់ក្រុមហ៊ុន CP Cambodia --------------------------------------------- នាព្រឹកថ្ងៃទី២៣ ខែវិច្ឆិកា ឆ្នាំ២០២២ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តមថ្នាក់ដឹកនាំ និងមន្រ្តីជំនាញ បានចុះពិនិត្យរោងចក្រផលិតចំណីអាហារ របស់ក្រុមហ៊ុន CP CAMBODIA ដែលមានទីតាំងនៅឃុំជម្ពូវ័ន្ត ស្រុក ជុំគិរី ខេត្តកំពត ក្នុងគោលបំណងបង្ហាញពីការយកចិត្តទុកដាក់របស់ក្រសួងជាមួយការវិនិយោគរបស់វិស័យឯកជន លើការពង្រឹងគុណភាពផលិតកម្ម ដើម្បីផ្គត់ផ្គង់សាច់សត្វនៅលើទីផ្សារតាមតម្រូវការ។ បន្ទាប់ពីបានចុះទស្សនា និងស្តាប់ការបង្ហាញរបស់តំណាងក្រុមហ៊ុន CP Cambodia ឯកឧត្តមរដ្ឋមន្ត្រី បានស្នើឱ្យក្រុមហ៊ុននេះផ្សព្វផ្សាយដល់កសិដ្ឋានចិញ្ចឹមជ្រូក និងមាន់ទាំងអស់អំពីគោលនយោបាយអនុគ្រោះថ្លៃភ្លើងដែលរាជរដ្ឋាភិបាលបានអនុម័តសម្រាប់ការងារកសិកម្ម និងការប្រើប្រាស់ភ្លើងនៅពេលយប់។ ឯកឧត្តមបានបន្ថែមទៀតថា កិច្ចសហការរវាងក្រុមហ៊ុន និងសមាគមន៍អ្នកចិញ្ចឹមសត្វ មានភាពចាំបាច់ណាស់ ដើម្បីវាយតម្លៃទីផ្សារ និងរៀបចំផែនការផលិត ទាំងតម្រូវការ និងការផ្គត់ផ្គង់សាច់សត្វនៅលើទីផ្សារ។ អគ្គនាយកដ្ឋានសុខភាពសត្វ និងផលិតកម្មសត្វ ត្រូវចូលរួមពិនិត្យមើលលើការងារនេះឱ្យបានល្អប្រសើរ ជាពិសេសក្នុងខ្សែច្រវ៉ាក់ផលិតកម្ម និងគុណភាពនៃសាច់សត្វ។ ក្នុងស្ថានភាពបច្ចុប្បន្ន ក្រុមហ៊ុនគួរណែនាំដល់កសិដ្ឋានដែលបានចុះកិច្ចសន្យាចិញ្ចឹមជាមួយគ្នា គួរកុំទាន់ឱ្យបង្កើនរោងចក្រថ្មី ដើម្បីបញ្ចៀសឱ្យបាននូវការផ្គត់ផ្គង់លើសសតម្រូវការទីផ្សារ។ ឯកឧត្តមបានបញ្ជាក់បន្ថែមទៀតថា ទាក់ទងទៅនឹងសាច់ជ្រូក ដែលចេញពីទីសត្តឃាតរបស់ក្រុមហ៊ុនCP ក្រុមហ៊ុនគួរតែធ្វើទំនាក់ទំនងជាមួយ ផ្សារទំនើប ភោជនីយដ្ឋាន ដើម្បីធានានូវទីផ្សារផ្គត់ផ្គង់ដែលមាននិរន្ដរភាព៕