ព័ត៌មានផ្សេងៗទៀត
រៀបចំផែនការជំរុញផលិតកម្មស្រូវ និងការនាំចេញ
ចេញផ្សាយ ១៧ មករា ២០១៨ 4009
ក្រសួងកសិកម្ម រុក្ខាប្រមាញ់ និងនេសាទ បានរៀបចំសិក្ខាសាលាពិគ្រោះយោបល់ស្ដីពី ”ផែនការសកម្មភាព ដើម្បីអនុវត្ដឯកសារគោលនយោបាយ ស្ដីពីការជំរុញផលិតកម្មស្រូវ និងការនាំចេញអង្ករ” ក្រោមអធិបតីភាពឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការជំរុញការនាំចេញកសិផល។
ឯកឧត្ដមបណ្ឌិតច័ន្ទ សារុន បានមានប្រសាសន៏ថា សិក្ខាសាលាពិគ្រោះយោបល់នេះ រៀបចំឡើង ដើម្បីផ្លាស់ប្ដូរយោបល់ និងបទពិសោធន៏ទាំងឡាយ ពីគ្នាទៅវិញទៅមក សំដៅជំរុញឱ្យបានខ្លាំងក្លាថែមទៀត ក្នុងការអភិវឌ្ឍន៏វិស័យកសិកម្ម ពិសេសការជំរុញផលិតកម្មដំណាំស្រូវ និងការនាំចេញអង្ករតាមរយៈការរៀបចំផែនការសកម្មភាព សំរាប់អនុវត្ដឯកសារគោលនយោបាយ ស្ដីពីការជំរុញផលិតកម្មស្រូវ និងការនាំចេញអង្ករ ដែរនឹងត្រូវដាក់ឱ្យពិភាក្សា និងផ្ដល់យោបល់នៅក្នុងសិក្ខាសាលា។
ស្ថិតក្នុងបរិការណ៏នេះ ដើម្បីប្រែក្លាយអង្ករឱ្យទៅជាមាសស កាលពីថ្ងៃទី១៧ ខែសីហា ឆ្នាំ២០១០សម្ដេចតេជោហ៊ុន សែនបានប្រកាស ដាក់ឱ្យអនុវត្ដឯកសារគោលនយោបាយស្ដីពីការជំរុញផលិតកម្មស្រូវ និងការនាំចេញអង្ករដែលឯកសារនេះ បានគូសវាសផ្លូវដើរយ៉ាងច្បាស់លាស់ សំរាប់សំរេចឱ្យបាននូវគោលបំណងដ៏ចម្បង តាមរយៈការអនុវត្ដន៏វិធានការគោលនយោបាយធំៗ ចំនួន៤ គឺទី១-វិធានការពាក់ព័ន្ធនិងផលិតកម្មស្រូវ, ទី២-វិធានការពាក់ព័ន្ធនឹងការប្រមូលទិញនិងការកែច្នៃស្រូវ, ទី៣-វិធានការពាក់ព័ន្ធនឹងប្រព័ន្ធសំរួលការនាំចេញអង្ករនិងទី៤-វិធាការស្វែងរកទីផ្សារ។
ឯកឧត្ដមបណ្ឌិតច័ន្ទសារុន បានមានប្រសាសន៏ឱ្យដឹងទៀតថា ឯកសារនេះ គឺជាត្រីវិស័យចង្អុលផ្លូវមួយដ៏សំខាន់ ដើម្បីណែនាំតម្រង់ទិស ឱ្យគ្រប់ភាគីពាក់ព័ន្ធក្នុងផលិតកម្មនិងអាជីវកម្មស្រូវអង្ករនេះអនុវត្ដជំរុញផលិតកម្មស្រូវ និងការនាំចេញអង្ករ ឱ្យមានសន្ទុះលឿនទៅមុខ ស្របតាមនិន្នាការរីកចំរើននៃទីផ្សារសកល។
យោងតាមលិខិតលេខ៦០១៤ កសក ចុះថ្ងៃទី២៧ ខែកញ្ញា ឆ្នាំ២០១០របស់ក្រសួងកសិកម្ម និងចំណារដ៏ខ្ពង់ខ្ពស់របស់សម្ដេចតេជោហ៊ុន សែនចុះថ្ងៃទី២៨ ខែកញ្ញា ឆ្នាំ២០១០ លើរបាយការណ៏ ស្ដីពីលទ្ធផលនៃការប្រជុំគណៈកម្មការ ជំរុញការនាំចេញកសិផល និងតាមរយៈសេចក្ដីជូនដំណឹងលេខ១១៤៦សជណកស ចុះថ្ងៃទី០៥ ខែតុលា ឆ្នាំ២០១០ បានសម្រេចឯកភាពគាំទ្រ លើពូជស្រូវចំនួន១០ប្រភេទ សំរាប់ជំរុញការធ្វើផលិតកម្មដំណាំស្រូវ ឱ្យកាន់តែទទួលបាននូវទិន្នផលខ្ពស់ថែមទៀត ដែលពូជនោះ រួមមានស្រូវស្រាលមិនប្រកាន់រដូវចំនួន៣ពូជ គឺពូជសែនពិដោរ ពូជជលសារនិងពូជ IR66 ពូជស្រូវកណ្ដាលចំនួន៤ពូជ គឺពូជផ្ការំដួល ពូជផ្ការំដេង ពូជផ្ការមៀត និងពូជផ្កាច័ន្ទសែនសរ ពូជស្រូវធ្ងន់ចំនួន៣ពូជគឺពូជរាំងជ័យ ពូជខា៤និងពូជខា៦ ។
ឯកឧត្ដមបណ្ឌិតច័ន្ទ សារុន បាននិយាយថា ពូជទាំងនេះយើងបានចាប់ផ្ដើមអនុវត្ដ ចាប់ពីពេលនេះតទៅ ហើយពូជមួយចំនួនយើងបានបញ្ជ្រាបដល់កសិកររួចរាល់ហើយដែរ។ ឯកឧត្ដមរដ្ឋមន្ដ្រី បាននិយាយឱ្យដឹងទៀតថា ឯកសារគោលនយោបាយ ស្ដីពីការជំរុញផលិតកម្មស្រូវនិងការនាំចេញអង្ករនេះ យើងត្រូវការចាំបាច់នូវកំនិតយោបល់ល្អៗ ពីគ្រប់ភាគីដែលពាក់ព័ន្ធ ពិសេសពីគ្រប់ក្រសួងស្ថាប័នជំនាញនានា សំដៅធ្វើយ៉ាងណា ឱ្យផែនការសកម្មភាពនេះ មានលក្ខណៈស៊ីជំរៅ និងគ្រប់ជ្រុងជ្រោយអាចយកទៅអនុវត្ដបាន ដោយរលូននិងស៊ីសង្វាក់គ្នា ក្នុងន័យធ្វើយ៉ាងណាឱ្យផែនការសកម្មភាពនេះ អាចទាក់ទាញយកជំនួយពីដៃគូរអភិវឌ្ឍន៏នានាគួបផ្សំជាមួយថវិការជាតិ ដើម្បីរួមគ្នាអនុវត្ដឱ្យបានសំរេចជោគជ័យនាពេលខាងមុខ។
ឯកឧត្ដមបណ្ឌិតច័ន្ទ សារុន បានបញ្ជាក់ថា" ដើម្បីសំរេចនូវមហិច្ឆតានេះតួអង្គក្រសួងកសិកម្មតែមួយពុំអាចរែកពុនតែម្នាក់ឯងបានឡើយ ។ ដូចនេះតម្រូវឱ្យមានកិច្ចសហការពីគ្រប់ក្រសួងស្ថាប័នដៃគូរអភិវឌ្ឍន៏នានា អង្គការជាតិ-អន្ដរជាតិ ពិនិត្យលទ្ធភាពដើម្បីជួយគាំទ្រផ្នែកបច្ចេកទេសនិងថវិការរួមគ្នាអនុវត្ដសំរេចទិសដៅគោលនយោបាយដ៏ស៊ីជំរៅនេះឱ្យទទួលបានជោគជ័យ៕
