ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញជាអធិបតី​ភាព ក្នុងវគ្គបណ្តុះបណ្តាលស្តីពី «កសិកម្មវៃឆ្លាតគិតគូរពីអាហារូបត្ថម្ភ និងរបបអាហារសុខភាព» នៅខេត្តកំពត

ចេញ​ផ្សាយ​ ២៨ កុម្ភៈ ២០២៦ 1756

នៅថ្ងៃទី២៦-២៧ ខែកុម្ភៈ ឆ្នាំ២០២៦ អង្គការហេលែខេលល័រអន្តរជាតិ គាំទ្រ​ដល់គម្រោង INAS បានបើកវគ្គបណ្តុះបណ្តាលស្តីពី «កសិកម្ម​វៃឆ្លាតគិតគូរពីអាហារូបត្ថម្ភ និងរបបអាហារសុខភាព» ដល់មន្ត្រី​កសិកម្ម​ឃុំ អាជ្ញាធរឃុំ នាយកសាលា ប្រធានមណ្ឌលសុខភាព មកពី១០ឃុំគោលដៅ នៃខេត្តតាកែវ និងកំពត ក្រោមអធិបតីភា​ព​ឯកឧត្ដមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខា​ប្រមាញ់ និងនេសាទ និងឯកឧត្តម វេជ្ជបណ្ឌិត ជា សំណាង អនុ​ប្រធាន​ក្រុមប្រឹក្សាស្ដារ អភិវឌ្ឍន៍កសិកម្ម និងជនបទ នៃទីស្តីការ​គណៈ​រដ្ឋមន្ត្រី។
វគ្គបណ្តុះបណ្តាលមានការអញ្ជើញចូលរួម ពីលោកអភិបាលរង​ខេត្ត​កំពត លោក ហ៊ូ ក្រើន នាយកអង្គការហេលែនខេល័រប្រចាំប្រទេស តំណាង​មន្រ្តីពីនាយកដ្ឋានផ្សព្វផ្សាយកសិកម្ម តំណាងមន្ទីរកសិកម្ម រុក្ខាប្រមាញ់ និងនេសាទខេត្តកំពត។
ថ្លែងក្នុងពិធីបើក ឯកឧត្តមបណ្ឌិត យ៉ង សាំង កុមារ បានគូសបញ្ជាក់​ដោយ​បានណែនាំដល់ មន្ត្រីកសិកម្មឃុំ-សង្កាត់ ដែលជាតួអង្គសំខាន់​នៃគម្រោង ត្រូវរកកសិករសហការរៀបចំសួនបន្លែតាមផ្ទះ ក៏ដូចជា​គាំទ្រ​សហការជួយរៀបចំសួនបន្លែនៅតាមសាលារៀនគោលដៅ តាមផែនការចង្អុលបង្ហាញរបស់គម្រោង។
សម្រាប់ពិធីបិទវគ្គបណ្តុះបណ្តាល ឯកឧត្តមអនុរដ្ឋលេខាធិការ ខាត់ សុធី បានអញ្ជើញបិទវគ្គបណ្តុះបណ្ដាល និងបានចង្អុលបង្ហាញថា ដើម្បី​ឱ្យគម្រោងនេះជោគជ័យ តួអង្គពាក់ព័ន្ធទាំងអស់ គឺមន្ត្រីកសិកម្ម​ឃុំ អាជ្ញាធរមូលដ្ឋាន សាលារៀន និងមណ្ឌលសុខភាព ត្រូវធ្វើការជា​មួយ​គ្នាដោយស្មារតីទទួលខុសត្រូវរួម ក្នុងការលើកកម្ពស់សុខមាល​ភាពពលរដ្ឋក្នុងសហគមន៍ ដើម្បីឈានទៅរកការកាត់បន្ថយ​ឱ្យបាន​ជាអតិបរមានូវបញ្ហាកង្វះអាហារូបត្ថម្ភសម្រាប់ពលរដ្ឋកម្ពុជា ដោយ​ផ្តោត​លើកុមារនៅជនបទជាអាទិភាព។
សូមបញ្ជាក់ថា គម្រោងINAS ជាគម្រោងមួយ ដែលជាសមាហរណ​កម្មនៃវិស័យកសិកម្ម អប់រំ និងសុខាភិបាល ដើម្បីទទួលបាន​អាហារូបត្ថម្ភ​កាន់តែប្រសើរឡើងនៅសហគមន៍។ តួអង្គអនុវត្ត​គឺមន្ត្រីកសិកម្មឃុំ សាលាបឋមសិក្សាគោលដៅ មណ្ឌលសុខភាព ដែល​សម្របសម្រួលតម្រង់ទិស សហការដោយអាជ្ញាធរឃុំ ភូមិ ដោយត្រូវគាំទ្រកសិករដែលមានកូនតូចក្រោមអាយុ៥ឆ្នាំ និងសាលា​រៀន​ឱ្យមានសួនបន្លែ ជាប្រភេទបន្លែដែលមានអាហារូបត្ថម្ភខ្ពស់ ក្នុង​គោលបំណងកាត់បន្ថយស្ថានភាពស្គមស្គាំងរបស់កុមារដោយសារកង្វះ​អាហារូបត្ថម្ភ៕