ឯកឧត្តមសហប្រធាន៣រូប នៃក្រុមការងារត្រី-វិស័យ អញ្ជើញជួប​សំណេះ​សំណាល និងពិនិត្យសក្តានុពលសហគមន៍កសិករប្រើប្រាស់​ទឹកប្រព័ន្ធធារាសាស្ត្រតាំងក្រសាំង នៅស្រុកសន្ទុក ខេត្តកំពង់ធំ

ចេញ​ផ្សាយ​ ២១ តុលា ២០២៥ 431

នៅថ្ងៃទី២០ ខែតុលា ឆ្នាំ២០២៥ ដោយមានការចូលរួមពីសហប្រធាន​ទាំង៣រូប នៃក្រុមការងារត្រី-វិស័យ មានឯកឧត្តម ហ៊ាន វណ្ណហន រដ្ឋលេខា​ធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និង​ឯកឧត្តម អ៉ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ អមដោយមន្ត្រី​ជំនាញ​នៃក្រសួងទាំង៣ មន្ត្រីក្រុមលេខាធិការដ្ឋាន បានអញ្ជើញ​ជួបប្រជុំ​ពិភាក្សា​ជាមួយប្រធាន អនុប្រធាន សមាជិកសមាជិកាសហគមន៍​កសិករ​ប្រើ​ប្រាស់ទឹកប្រព័ន្ធធារាសាស្ត្រតាំងក្រសាំង នៅក្នុងឃុំកកោះ ស្រុកសន្ទុក ខេត្តកំពង់ធំ។
ថ្លែងក្នុងពិធីសំណេះសំណាល ឯកឧត្ដមសហប្រធានទាំងបី បានគូស​បញ្ជាក់​ពីគោលបំណងរួមរបស់ក្រសួងទាំងបី  ដើម្បីពិនិត្យពីសក្តានុពល និង​លទ្ធភាព ជួយបង្កើនសមត្ថភាពផលិតកម្ម បង្កើនចំណូលសេដ្ឋកិច្ច និងសុខុមាលភាព។ ក្នុងនោះនឹងពិនិត្យលក្ខណៈសម្បត្តិរបស់សហគមន៍ ដែលអាចបង្កើតសហគមន៍កសិកម្មទំនើប ជាគោលដៅក្នុងក្របខ័ណ្ឌត្រី-វិស័យ ឆ្នាំ២០២៦។ សហគមន៍នឹងទទួលបានការបង្កើនផលិតភាព​ផលិត​កម្ម​កសិកម្ម ការប្រើប្រាស់ធនធានទឹកពហុបំណងប្រកប​ដោយ​ប្រសិទ្ធភាព ការគាំទ្រលើហេដ្ឋារចនាសម្ព័ន្ធ រួមមាន៖ ប្រព័ន្ធធារាសាស្រ្ដ ផ្លូវថ្នល់ ផ្សារសហគមន៍ជាដើម។ ឯកឧត្ដមទាំងបី បានបញ្ជាក់បន្ថែម​ទៀតថា ភាពខ្លាំងរបស់សហគមន៍ កើតចេញពីខាងក្នុងសហគមន៍ផ្ទាល់ ដោយត្រូវមានប្រធានខ្លាំង និងការចូលរួម បេ្ដជ្ញាពីសមាជិក សមាជិកា និង​ការគាំទ្រពីអាជ្ញាធរពាក់ព័ន្ធផងដែរ។
សូមបញ្ជាក់ជូនថា សហគមន៍កសិករប្រើប្រាស់ទឹកប្រព័ន្ធ​ធារាសាស្ត្រ​តាំងក្រសាំង បានចុះបញ្ជីដាក់ឱ្យប្រើប្រាស់នៅថ្ងៃទី១១ ខែឧសភា ឆ្នាំ២០១៨ គ្របដណ្តប់មានចំនួន ០៤ឃុំ (ទីពោ តាំងក្រសាំង ឃុំជ្រាប់ និងឃុំកកោះ និងមាន១៨ភូមិ មានផ្ទៃដីសរុបដីស្រែចំនួន ១០.៩៦១ ហិកតា ក្នុងនោះមានផ្ទៃដីស្រូវប្រាំងមានចំនួន ៤.៧៧៨ហិកតា សមាជិក​ចំនួន ៤.៨៩២គ្រួសារ និងប្រជាពលរដ្ឋ ដែលទទួលផល​ពីប្រព័ន្ធធារា​សាស្ត្រ មានចំនួនសរុប៣០.៥៤៧នាក់។ ប្រព័ន្ធធារាសាស្ត្រ​តាំងក្រសាំង ដំណើរការ គ្រប់គ្រងថែទាំ ដោយសហគមន៍កសិករប្រើប្រាស់ទឹក តាំង​ក្រសាំង និងគាំទ្រដោយមន្ទីរធនធានទឹក និងឧតុនិយមខេត្តកំពង់ធំ លើកិច្ច​ដំណើរការ និងការថែទាំ (O&M) ក្នុងឆ្នាំ២០២៥ ដោយមានការ​សហការ​ពីអាជ្ញាធរឃុំ ស្រុក៕