ពិធីជួបជុំពហុភាគីអ្នកពាក់ព័ន្ធ(MSP) និងចុះកិច្ចសន្យាផលិតកម្មកសិកម្ម ក្នុងការទិញលក់បន្លែរវាងបណ្តុំអាជីវកម្មបន្លែក្នុងភូមិក្រចាប់​ និងភូមិវាលវង់​ ជាមួយក្រុមហ៊ុនកសិសុវត្ថិភាព​(Agro-Nature)

ចេញ​ផ្សាយ​ ១៣ វិច្ឆិកា ២០២០ 24110

នាថ្ងៃព្រហស្បតិ៍ ១២រោច ខែកត្តិក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១២ ខែវិច្ឆិកា ឆ្នាំ២០២០ មន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន បានរៀបចំកម្មវិធីជួបជុំពហុភាគីអ្នកពាក់ព័ន្ធ(MSP) និងចុះកិច្ចសន្យាផលិតកម្មកសិកម្ម ក្នុងការទិញលក់បន្លែរវាងបណ្តុំអាជីវកម្មបន្លែក្នុងភូមិក្រចាប់​ និងភូមិវាលវង់​ ជាមួយក្រុមហ៊ុនកសិសុវត្ថិភាព​(Agro-Nature)។ នៅក្នុងកម្មវិធីនេះដែរមានការអញ្ជើញចូលរួមពីក្រុមការងារមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន និងសមាជិកបណ្តុំអាជីវកម្មបន្លែសរុបចំនួន៣៨នាក់ ស្រី១៤នាក់ (បណ្តុំបន្លែ​ភូមិក្រចាប់ចំនួន១៤នាក់ ស្រី១០នាក់ និងបណ្តុំបន្លែភូមិវាលវង់ចំនួន២៤នាក់ ស្រី៤នាក់)។ ដោយទទួលលទ្ធផលដូចខាងក្រោម÷ ១-សមាជិកបណ្តុំបន្លែភូមិ​ ក្រចាប់​ មានសមាជិកចំនួន០៨នាក់ បានចុះកិច្ចសន្យាដាំបន្លែចំនួន ០៩មុខ ក្នុងតម្លៃព្រមព្រាង និងឯកភាពគ្នារយ:ពេល០៦ខែម្តង។ ទីតាំប្រមូលផ្តុំ និងវិចខ្ចប់បន្លែសម្រាប់ផ្ញើរទៅក្រុមហ៊ុន នៅផ្ទះ​អ្នកស្រី​ ញឹម​ សារុំ​ ភូមិក្រចាប់ សង្កាត់អូរតាវ៉ៅ។ ២-សមាជិកបណ្តុំបន្លែភូមិ​ វាលវង់​ មានសមាជិកចំនួន១៧នាក់ បានជ្រើសរើសមុខបន្លែចំនួន១២មុខ ក្នុងតម្លៃព្រមព្រាងនិងឯកភាពគ្នារយ:ពេល០៦ខែម្តង។ ទីតាំប្រមូលផ្តុំនិងវិចខ្ចប់បន្លែសំរាប់ផ្ញើរទៅក្រុមហ៊ុនមានពីរទីតាំង នៅផ្ទះ​លោក​ លី​ វណ្ណ: ភូមិថ្មី​ សង្កាត់ទួលល្វា​ និងផ្ទះលោក ឃួន ប៊ុនធី ភូមិភ្នំកុយ ឃុំសាលាក្រៅ។ ៣-ក្រុមហ៊ុនទទួលទិញបន្លែសុវត្ថិភាពតាមកិច្ចសន្យា (គោលការណ៍អនុវត្តកសិកម្ម​ល្អ) ៤-ក្រុមហ៊ុនធានាទិញបន្លែទាំង១២មុខ ប្រចាំថ្ងៃ​ ក្នុងបរិមាណ១តោន/១​ថ្ងៃ​ តាមកិច្ចសន្យា។ ៥-​ ក្រុមហ៊ុនគិតតម្លៃសេវាកម្មចំនួន​ ៣០០រៀល/១គ.ក​ ដល់អ្នកប្រមូលផ្តុំបន្លែនិងវិចខ្ចប់ផ្ញើរទៅក្រុមហ៊ុន។ ៦-ក្រុមហ៊ុនចេញថ្លៃសេវាដឹកជញ្ជូនទៅភ្នំពេញ និងជួយចេញខាត៥០%ក្នុងករណីបន្លែខូចខាតដោយការដឹកជញ្ជូន។ ៧-ក្រុមហ៊ុនអាចផ្គត់ផ្គង់ពូជបន្លែដល់សមាជិក តែត្រូវទូទាត់ទៅក្រុមហ៊ុនវិញក្រោយពេលប្រមូលផលបន្លែ។