ឯកឧត្តមរដ្ឋលេខាធិការ ប្រាក់ ដាវីដ អញ្ជើញដឹកនាំប្រជុំជាមួយរដ្ឋបាលជលផលនិងជំនាញការអង្គការ​ FAO ពិនិត្យវឌ្ឍនភាពការអនុវត្តកម្មវិធី CAPFISH

ចេញ​ផ្សាយ​ ៥ ធ្នូ ២០២៤ 2442

នាថ្ងៃទី៤ ខែធ្នូ ឆ្នាំ២០២៤ នៅរដ្ឋបាលជលផល ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំប្រជុំពិនិត្យវឌ្ឍនភាពការអនុវត្តកម្មវិធីជំរុញកំណើនវិស័យជលផលប្រកបដោយចីរភាពនិងបរិយាប័ន្ន (CAPFISH) ដើម្បីរៀបចំរបាយការណ៍ និងត្រៀមរៀបចំប្រជុំជាមួយក្រុមការងារអគ្គនាយកដ្ឋានកិច្ចការសមុទ្រនិងជលផល (DG MARE)​ នៃសហភាពអឺរ៉ុប។

កិច្ចប្រជុំនេះ មានការអញ្ជើញចូលរួមផងដែរ ពីសំណាក់លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំនិងមន្ត្រីជំនាញនៃរដ្ឋបាលជលផល និងជំនាញការនៃអង្គការស្បៀងនិងកសិកម្មនៃសហប្រជាជាតិ (FAO)។

សូមជម្រាបថា រដ្ឋបាលជលផល សហការជាមួយអង្គការ FAO រដ្ឋបាលថ្នាក់ក្រោមជាតិ និងដៃគូពាក់ព័ន្ធ បាននិងកំពុងអនុវត្តកម្មវិធី CAPFISH ចាប់ពីឆ្នាំ២០១៩ មកទល់បច្ចុប្បន្ន ក្រោមជំនួយឧបត្ថម្ភថវិកាពីសហភាពអឺរ៉ុប (EU) ដោយសម្រេចបាននូវលទ្ធផលជាច្រើន ជាពិសេសលើការពង្រឹងការគ្រប់គ្រងជលផលសមុទ្រ រួមមាន ការគ្រប់គ្រងនាវានេសាទនិងផែនេសាទ តាមរយៈការចុះបញ្ជីទូកនេសាទ ការត្រួតពិនិត្យតាមដាននៅផែនេសាទ និងការបំពាក់ប្រព័ន្ធតាមដាននាវានេសាទ, ការចូលរួមទប់ស្កាត់ការនេសាទខុសច្បាប់ គ្មានរបាយកាណ៍ និងគ្មានបញ្ញត្តិ (IUU) នៅថ្នាក់ជាតិ តំបន់ និងអន្តរជាតិ, ការការពារនិងអភិរក្សធនធានជលផលនៅតំបន់ក្បែរឆ្នេរ ការ​ពង្រឹង​សមត្ថភាពសហគមន៍នេសាទនិងលើកកម្ពស់ជីវភាពរស់នៅរបស់ប្រជានេសាទ និងការពង្រឹងការងារល្បាត ទប់ស្កាត់ និងបង្ក្រាបបទល្មើសជលផល៕