ឯកឧត្តមរដ្ឋមន្ត្រី និងអភិបាលរងខេត្ត បានបន្តមកភូមិថ្នាល់ សង្កាត់ចេក ក្រុងស្វាយរៀង មកពិនិត្យការភ្ញាស់ត្រីអណ្តែងរបស់កសិរ ម៉ៅ សំអាន

ចេញ​ផ្សាយ​ ២៦ សីហា ២០១៩ 4142

-កម្មវិធីទី០៣: 
ចេញពីស្រុករមាសហែក ឯកឧត្តមរដ្ឋមន្ត្រី និងអភិបាលរងខេត្ត បានបន្តមកភូមិថ្នាល់ សង្កាត់ចេក ក្រុងស្វាយរៀង មកពិនិត្យការភ្ញាស់ត្រីអណ្តែងរបស់កសិរ ម៉ៅ សំអាន។ លោកសំអាន បានរៀប រាប់ថា គាត់ភ្ញាស់កូនត្រីអណ្តែង និងទីឡាព្យាលក់ចែកចាយឲ្យអ្នកចិញ្ចឹមក្នុងតំបន់នេះជាង ១០ឆ្នាំមកហើយតាំងពីគម្រោងប្រាសាក់។ ដោយសារមានបទពិសោធន៍ និងកំណើននៃសេចក្តីត្រូវការកូនត្រីសព្វថ្ងៃលោកបង្កើនការផលិតកូនត្រីបាន ១៧០ពាន់ក្បាល ហើយក្នុង១ក្បាលតម្លៃ ២០០ រៀល ក្នុងឆ្នាំអាចរកចំណូលបានជាង ៣០លានរៀល។ ចំណូលរឹងមាំនេះហើយ ធ្វើឲ្យសេដ្ឋកិច្ច គ្រួសាររបស់លោកសំអាត មានការរីកចម្រើនជាបន្តបន្ទាប់។

ឯកឧត្ដមរដ្ឋមន្ត្រីបានលើកទឹកចិត្តឲ្យលោកសំអានខិតខំស្រាវជ្រាវផលិតកូនត្រីផ្សេងៗទៀតឲ្យ បានច្រើន ដោយសហការជាមួយរដ្ឋបាលជលផល និងមន្ទីរធ្វើយ៉ាងណាធានាបរិមាណកូនត្រី សម្រាប់ផ្គត់ផ្គង់ឲ្យទីផ្សារក្នុងតំបន់នេះ បំណងពង្រីកបរិមាណផលចាប់ត្រីពីវារីវប្បកម្ម កាត់បន្ថយ ផលចាប់ពីប្រភពធម្មជាតិដើម្បីរក្សាតុល្យភាពពូជត្រីក្នុងបឹងស្ទឹងធម្មជាតិឲ្យបានគង់វង្សល្អ និងជាពិសេសចូលរួមកាត់បន្ថយការនាំចូល។