ព័ត៌មានផ្សេងៗទៀត
ឯកឧត្តមរដ្ឋលេខាធិការ យ៉ង សាំងកុមារ អញ្ជើញជាអធិបតីបើកវគ្គបណ្តុះបណ្តាលស្តីពី «ការប្រមូល និងការធានាគុណភាពទិន្នន័យកសិកម្ម» ដល់មន្រ្តីកសិកម្មឃុំ សង្កាត់ ជាជនបង្គោល នៅខេត្តក្រចេះ
ចេញផ្សាយ ៩ កក្កដា ២០២៦ 2621
នាថ្ងៃទី៨ ខែកក្កដា ឆ្នាំ២០២៦ ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីបើកវគ្គបណ្តុះបណ្តាលស្តីពី «ការប្រមូល និងការធានាគុណភាពទិន្នន័យកសិកម្ម» ដល់មន្រ្តីកសិកម្មឃុំ សង្កាត់ ជាជនបង្គោល នៅខេត្តក្រចេះ ដែលមានអ្នកចូលរួមសរុបចំនួន ៨៣នាក់។
វគ្គបណ្តុះបណ្តាលនេះ រៀបចំឡើងដោយនាយកដ្ឋានផ្សព្វផ្សាយកសិកម្ម នាយកដ្ឋានផែនការ និងស្ថិតិ និងនាយកដ្ឋានបរិវត្តកម្មឌីជីថល និងមានការគាំទ្រដោយទីភ្នាក់ងារសហប្រតិបត្តិការអន្តរជាតិអាល្លឺម៉ង់(GIZ) និងមានគោលបំណង ទី១.ពង្រឹងសមត្ថភាពបន្ថែមដល់ជនបង្គោលតាមបណ្តាស្រុកលើការប្រើប្រាស់ CAOs Farmbook App ទី២.បង្កើនប្រសិទ្ធភាពនៃការប្រមូល និងការធានាគុណភាពទិន្នន័យ ទី៣.ផ្តល់ការណែនាំ ការគ្រប់គ្រងទិន្នន័យអាទិភាពដែលក្រសួងត្រូវការតាមរដូវកាលនីមួយៗ ទី៤.កំណត់លើប្រតិបត្តិការស្តង់ដារនៃតម្រូវការទិន្នន័យ និងទី៥ បញ្ហាប្រឈមផ្សេងៗ។
ឯកឧត្តមរដ្ឋលេខាធិការ បានផ្តល់អនុសាសន៍ណែនាំឱ្យមន្រ្តីកសិកម្មឃុំ-សង្កាត់ត្រូវពង្រឹងសមត្ថភាព និងអាចប្រើប្រាស់ប្រព័ន្ធ Farmbook App បានជាផ្លូវការនៅឆ្នាំ២០២៧ ជាពិសេសត្រូវសហការជាមួយអង្គភាពពាក់ព័ន្ធ ក្នុងកិច្ចការប្រមូល និងគ្រប់គ្រង់ទិន្នន័យក្នុងវិស័យកសិកម្ម ប្រកបដោយសុក្រឹតភាព គុណភាព និងគ្រប់ជ្រុងជ្រោយ ដើម្បីធ្វើជាមូលដ្ឋានគ្រឹះដ៏រឹងមាំក្នុងការរៀបចំផែនការគោលនយោបាយអភិវឌ្ឍវិស័យកសិកម្មជាតិ៕
