កម្លាំងចម្រុះខេត្តស្ទឹងត្រែង កៀងនិងព្រលែងសត្វទន្សោងចំនួន៩ក្បាលនៅជម្រកសត្វព្រៃសៀមប៉ាង

ចេញ​ផ្សាយ​ ៥ កុម្ភៈ ២០២៦ 2972

កាលពីថ្ងៃទី២ ដល់ថ្ងៃទី៤ ខែកុម្ភៈ ឆ្នាំ២០២៦ ក្រុមការងារចម្រុះនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង មន្ទីរបរិស្ថានខេត្ត កងរាជអាវុធហត្ថ និងរដ្ឋបាលខេត្ត-ស្រុក ដោយមានកិច្ចសហការពីអង្គការអភិរក្សសៀមប៉ាង និងក្រុមហ៊ុនរ៉ាយហ្សីងហ្វូនិក បានធ្វើប្រតិបត្តិការកៀងចាប់សត្វទន្សោងចំនួន ៩ ក្បាលចេញពីតំបន់ហានិភ័យខ្ពស់ ហើយយកទៅព្រលែងនៅដែនជម្រកសត្វព្រៃសៀមប៉ាង ដោយសុវត្ថិភាព។ សត្វទន្សោងគឺជាពូជគោព្រៃដ៏ស្រស់ស្អាតមួយ ហើយត្រូវបានគេចាត់ទុកជាបុព្វបុរសរបស់ពូជគោស្រុកប្រចាំតំបន់អាស៊ីអាគ្នេយ៍។ ដោយមើលឃើញការគំរាមកំហែងពីការប្រមាញ់ដោយជនខិលខូច ក្រុមការងារនេះត្រូវបានបង្កើតឡើង ដើម្បីល្បាតការពារ និងរៀបចំប្រតិបត្តិការជម្លៀសចេញពីតំបន់ហានិភ័យទៅជម្រកសត្វព្រៃវិញ។ គួរបញ្ជាក់ផងដែរថានៅឆ្នាំ ២០២៥ ក្រុមការងារបានអនុវត្តប្រតិបត្តិការកៀងចាប់និងព្រលែងសត្វទន្សោងចំនួន ១៦ ក្បាល ដោយជោគជ័យ ហើយប្រតិបត្តិការឆ្នាំ២០២៦ នឹងបន្តដល់ថ្ងៃទី៧ កុម្ភៈ ដើម្បីកៀងចាប់សត្វទន្សោងនៅសេសសល់។ រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខប្រមាញ់ និងនេសាទ ព្រមទាំងគ្រប់ស្ថាប័នពាក់ព័ន្ធជាសេនាធិការ បានប្តេជ្ញាចិត្តបន្តការការពារធនធានសត្វព្រៃនៅកម្ពុជា ដូចជាសត្វទន្សោង ឱ្យមាននិរន្តរភាពសម្រាប់ជំនាន់ក្រោយ៕