ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំក្រុមការងារ ចុះប្រតិបត្តិការទប់ស្កាត់ និងបង្ក្រាបបទល្មើសជលផលក្នុងស្រុកសូទ្រនិគម ខេត្តសៀមរាប

ចេញ​ផ្សាយ​ ៦ មករា ២០២៦ 1766

នៅថ្ងៃទី៦ ខែមករា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញដឹកនាំក្រុមការងារជំនាញ ចុះប្រតិបត្តិការទប់ស្កាត់ និងបង្ក្រាបបទល្មើសជលផល នៅក្នុងតំបន់គ្រប់គ្រងជលផល ឃុំកំពង់ភ្លុក ស្រុកប្រាសាទបាគង ដល់ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ក្នុងដំណើរនេះ មានការចូលរួមពី លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ លោក ធិននី សុទ្ធី នាយខណ្ឌរដ្ឋបាលជលផលសៀមរាប និងសហការី លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ខា អ៊ីត អនុប្រធានការិយាល័យវិវាទកម្ម បញ្ជាការដ្ឋានសឹករងសៀមរាប កងពលតូចលេខ៧០ ចំណុះឱ្យយោធភូមិភាគ៥ និងសហគមន៍នេសាទកំពង់ឃ្លាំង កម្លាំងចូលរួមសរុប ៤០នាក់ កាណូតចំនួន ៦គ្រឿង។
ឯកឧត្តមអនុរដ្ឋលេខាធិការ បានគូសបញ្ជាក់ថា ក្រុមការងារជំនាញបានត្រួតពិនិត្យការធ្វើនេសាទដោយឧបករណ៍លបរ៉ាវ បានចំនួន ៣០របាំង បន្ទាប់ពីបានពិនិត្យជាក់ស្តែង ឃើញថាប្រជាពលរដ្ឋពិតជាអនុវត្តត្រឹមត្រូវតាមច្បាប់ស្តីពីជលផល និងត្រួតពិនិត្យទូកអូសលៀសបានចំនួន ៥គ្រឿង ក្នុងនោះមានលៀសទម្ងន់ ៣ ៥០០គីឡូក្រាម ឱ្យរែងម្តងទៀត និងលៀសទម្ងន់ ១៥០០គីឡូក្រាម ព្រមទាំងព្រលែងត្រីចូលក្នុងបឹងធម្មជាតិវិញ។
ជាមួយគ្នានេះ ក្រុមការងារជំនាញក៏បានបំផ្លាញចោលឧបករណ៍នេសាទស្បៃមុងចំនួនចំនួន ៣គ្រឿង របាំងស្បៃមុងប្រវែង ៦០០ម៉ែត្របង្គោលចម្រឹងចំនួន ១៥០ដើម។
ចុងបញ្ចប់ ឯកឧត្តមអនុរដ្ឋលេខាធិការ បានសម្តែងការកោតសរសើរនិងថ្លែងអំណរគុណយ៉ាងជ្រាលជ្រៅជូនដល់មន្រ្តី អង្គភាពពាក់ព័ន្ធគ្រប់លំដាប់ថ្នាក់ អាជ្ញាធរមូលដ្ឋាន ជាពិសេសកងកម្លាំងចម្រុះនៃកងយោធពលខេមរភូមិន្ទ ដែលបានបំពេញភារកិច្ចយ៉ាងសកម្មក្នុងការបង្រ្កាប ដោយបានកត់សម្គាល់ឃើញថា ឧបករណ៍ខុសច្បាប់មានការថយចុះច្រើន និងប្រជានេសាទយល់ដឹងពីការប្រើប្រាស់ឧបករណ៍នេសាទនារដូវបើកនេសាទនេះជាដើម៕