ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាអធិបតីក្នុងកិច្ចប្រជុំបូកសរុបវឌ្ឍនភាពការងាររយៈពេល៩ខែ ឆ្នាំ២០២៥ និងរៀបចំផែនការសកម្មភាពថវិកាឆ្នាំ២០២៦ របស់គម្រោង LASED III នៅខេត្តកំពត

ចេញ​ផ្សាយ​ ២ តុលា ២០២៥ 518

នៅថ្ងៃទី២ ខែតុលា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  និងជាអនុប្រធានគណៈកម្មការដឹកនាំគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) បានអញ្ជើញធ្វើជាអធិបតីក្នុងកិច្ចបូកសរុបវឌ្ឍនភាពការងាររយៈពេល៩ខែ ឆ្នាំ២០២៥ និងរៀបចំផែនការសកម្មភាពថវិកាឆ្នាំ២០២៦ របស់គម្រោង LASED III នៅមន្ទីរកសិកម្ម រុក្ខាប្រមាញ់ និងនេសាទ ខេត្តកំពត។ 
កិច្ចប្រជុំបូកសរុបវឌ្ឍនភាពការងាររយៈពេល៩ខែ ឆ្នាំ២០២៥ និងរៀបចំផែនការសកម្មភាពថវិកាឆ្នាំ២០២៦ នេះ ប្រព្រឹត្តិទៅរយៈពេល ២ថ្ងៃ ចាប់ពីថ្ងៃទី២ ដល់ ៣ ខែតុលា ឆ្នាំ២០២៥ ដោយមានការចូលរួមពីឯកឧត្តម ឃី កុសល អនុរដ្ឋលេខាធិការ និងជានាយកគម្រោង LASED III ថ្នាក់ដឹកនាំ និងមន្រ្តីអនុវត្តគម្រោងថ្នាក់ជាតិ ថ្នាក់កណ្ដាល ថ្នាក់ខេត្ដនៃគោលដៅគម្រោង និងមន្ត្រី ADFs។ 
កិច្ចប្រជុំនេះ រៀបចំឡើងក្នុងគោលបំណងតាមដានវឌ្ឍនភាពការងារគម្រោងអនុវត្ត០៩ខែកន្លងមក ពិនិត្យលើបញ្ហាប្រឈម និងសំណូមពរ ការរៀបចំផែនការសកម្មភាព និងផែនការថវិកាសម្រាប់អនុវត្តឆ្នាំ២០២៦ និងការលើកទិសដៅអនុវត្តបន្តសម្រាប់អនុវត្ត ឆ្នាំ២០២៦។ បន្ថែមទៀតនោះ កិច្ចប្រជុំនឹងកំណត់បាននូវផែនការសកម្មភាពអាទិភាព បញ្ហាប្រឈម និងដំណោះស្រាយ ដើម្បីអនុវត្តសកម្មភាពឱ្យសម្រេចលទ្ធផលតាមផែនការសកម្មភាព និងថវិកាឆ្នាំ២០២៦ ដែលបានគ្រោងទុក។ 
ឯកឧត្តមរដ្ឋលេខាធិការ បានគូសបញ្ជាក់ថា លទ្ធផលដែលសម្រេចបានចំនួន៩ខែនេះ រួមមាន ទី១.គ្រួសារដែលទទួលបានសម្ភារៈកសិកម្ម និងស្រូវពូជចំនួន ២០៧ នៃ ២០៧គ្រួសារ ទី២.គ្រួសារដែលទទួលបានតែសម្ភារៈកសិកម្មសុទ្ធចំនួន ២៤ នៃ២៤ គ្រួសារ ទី៣.គ្រួសារដែលទទួលបានតែស្រូវពូជសុទ្ធចំនួន១៨ នៃ១៨គ្រួសារ  ទី៤.គ្រួសារដែលទទួលបានកូនមាន់ចំនួន ១៤២ នៃ២៣១ គ្រួសារ នៅសល់ ៨៩គ្រួសារ និងទី៥.គ្រួសារដែលទទួលបានកូនឈើហូបផ្លែចំនួន ២៤៩ នៃ ២៤៩ គ្រួសារ។ 
ទន្ទឹមនឹងនេះ គម្រោង LASED III  ក៏បានពិនិត្យជាក់ស្តែងលើបញ្ជីស្នាមក្រុមទុនបង្វិល និងបានដំឡើងផ្លាកក្រុមផលិតបានចំនួន ១៤ផ្លាក ស្មើ១០០ភាគរយ។ ក្នុងនោះដែរ ការសាងសង់ផ្ទះសំណាញ់វគ្គ០១ បានបញ្ចប់ទាំង ៦៥គ្រួសារ ដោយក្រុមការងារបន្ដដឹកជញ្ជូនដែកចំនួន ១៧៧ គ្រួសារទៀតសម្រាប់វគ្គ០២។ ការប្រើប្រាស់ដីសម្បទានិកដែលមកស្នាក់នៅអចិន្ត្រៃយ៍មានចំនួន ១៦៧គ្រួសារ សម្បទានិកដែល ចេញ-ចូល ប្រើប្រាស់ដីមានចំនួន ១៦២គ្រួសារ និងសម្បទានិកដែលមិនទាន់មកប្រើប្រាស់ដីមានចំនួន ០២គ្រួសារ ក្នុងនោះសម្បទានិកដែលបានប្រើប្រាស់ដីកសិកម្មមានចំនួន ២០៩ នៃ ២២៥ គ្រួសារ និង ១៤២ គ្រួសារបានសាងសង់ទ្រុងមាន់រួចរាល់។ បន្ថែមពីនេះទៀត សម្បទានិកបានទទួលការបណ្តុះបណ្តាលស្តីពីបច្ចេកទេសកសិកម្ម និងអាហារូបត្ថម្ភលើវគ្គបណ្តុះបណ្តាល NSA វគ្គផលិតកម្មដំណាំស្រូវ វគ្គផលិតកម្មដំណាំបន្លែ និងវគ្គផលិតកម្មមាន់៕