ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចុះពិនិត្យ និងស្វែងយល់កសិដ្ឋានចិញ្ចឹមត្រី និងទីតាំងកែច្នៃត្រីរ៉សងៀត នៅសង្កាត់ស្វាយដង្គុំ ក្រុងសៀមរាប ខេត្តសៀមរាប
ចេញផ្សាយ ១២ សីហា ២០២៥ 965
នៅថ្ងៃទី១១ ខែសីហា ឆ្នាំ២០២៥ ឯកឧត្តម ឃុន សាវឿន អញ្ជើញដឹកនាំក្រុមការងារចុះពិនិត្យ និងស្វែងយល់កសិដ្ឋានចិញ្ចឹមត្រីទីឡាព្យា ឡៃហោ ហ្វាម (Lighthouse Farm) របស់លោក Darren Polischuk ជនជាតិកាណាដា និងទីតាំងកែច្នៃត្រីងៀត របស់អ្នកស្រី គឹម សុភ័ស្ស នៅសង្កាត់ស្វាយដង្គុំ ក្រុងសៀមរាប ខេត្តសៀមរាប។ ដំណើរបេសកកម្មនេះមានការចូលរួមពី លោក អ៊ឹង គឹមលាង អភិបាលរង នៃគណៈអភិបាលខេត្តសៀមរាប លោកប្រធានមន្ទីរកសិកម្ម រុក្ខាប្រមាញ់ និងនេសាទសៀមរាប លោកនាយខណ្ឌរដ្ឋបាលជលផល។
នាដំណើរនោះ ឯកឧត្តម ឃុន សាវឿន បានគូសបញ្ជាក់អំពីគោលនយោបាយកសិកម្ម ព្រមទាំងគាំទ្រលើកទឹកចិត្តឱ្យម្ចាស់កសិដ្ឋានចិញ្ចឹមត្រី និងកែច្នៃត្រីរ៉ស់ងៀតបង្កើននូវការផលិតកម្ម ដែលផ្តល់ប្រាក់ចំណូលសម្រាប់ផ្គត់ផ្គង់គ្រួសារប្រកបដោយនិរន្តរភាព។ បន្ថែមលើសពីនេះឯកឧត្តមរដ្ឋលេខាធិការ និងមន្ត្រីជំនាញ បានណែនាំអំពីបច្ចេកទេសចិញ្ចឹមត្រី តាមលក្ខណៈបច្ចេកទេស និងបង្ហាញអំពីខ្សែច្រវាក់ផលិតកម្ម លើដំណើរការកាត់បន្ថយថ្លៃដើមផលិត។
ជាចុងបញ្ចប់ ឯកឧត្តមរដ្ឋលេខាធិការ បានណែនាំឱ្យមន្ត្រីជំនាញបន្តផ្តល់ការគាំទ្របច្ចេកទេស ជួយសម្របសម្រួលដោះស្រាយរាល់បញ្ហា និងសំណូមពរនានារបស់វារីវប្បករជាម្ចាស់កសិដ្ឋាន និងម្ចាស់ទីតាំងកែច្នៃត្រីងៀត ឱ្យបានទាន់ពេលវេលា ប្រកបដោយប្រសិទ្ធភាព និងប្រសិទ្ធផលខ្ពស់៕
