ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលជួបពិភាក្សាការងារជាមួយ USABC នៅទីស្តីការក្រសួងកសិកម្ម

ចេញ​ផ្សាយ​ ១ មីនា ២០២៤ 3094

នៅថ្ងៃទី២៩ ខែកុម្ភៈ ឆ្នាំ២០២៤នេះ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមទាំងសហការី បានទទួលជួបពិភាក្សាការងារជាមួយលោក Jack Myint  Country  Director (USABC) និងបណ្តាក្រុមហ៊ុនដៃគូសហការ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ជំនួបនេះធ្វើឡើងដើម្បីជំរុញទំនាក់ទំនងសេដ្ឋកិច្ចបន្ថែមទៀតរវាងសហរដ្ឋអាមេរិក និងកម្ពុជា តាមរយៈវិស័យកសិកម្ម។ ភាគីក្រុមហ៊ុនដែលជាដៃគូសហការ បានបទបង្ហាញអំពីផលិតផលរបស់ខ្លួនជូនដល់ថ្នាក់ដឹកនាំក្រសួង ក្នុងនោះ ក្រុមហ៊ុន ADM បានបង្ហាញអំពីផលិតផលចំណីសត្វ ក្រុមហ៊ុន Pfizer បង្ហាញអំពីចំណាប់អារម្មណ៍ទាក់ទងនឹងគម្រោងការលើកកម្ពស់វិស័យសុខាភិបាល និងក្រុមហ៊ុន Visa បង្ហាញអំពីការផ្តល់ហិរញ្ញប្បទានតាមបែបឌីជីថល។ 

ជាការឆ្លើយតប ឯកឧត្តម ប្រាក់ ដាវីដ បានសម្ដែងការស្វាគមន៍ និងពេញចិត្តចំពោះបច្ចេកវិទ្យារបស់ក្រុមហ៊ុនទាំងនោះ ដែលអាចចូលរួមចំណែកអភិវឌ្ឍវិស័យកសិកម្មនៅកម្ពុជា។ បន្ថែមពីនេះ ឯកឧត្តមក៏បានណែនាំទៅកាន់ក្រុមហ៊ុនឲ្យយកចិត្តទុកដាក់ទៅលើដំណើការកែច្នៃ ដោយផ្តោតទៅលើគុណភាព សុវត្ថិភាព និងយកចិត្តទុកដាក់ទៅលើកម្មវិធីគោលនយោបាយសហគមន៍កសិកម្មទំនើប រួមទាំងណែនាំបន្ថែមអំពីការនាំចូលចំណីសត្វតាមច្រកចេញចូលតែមួយផងដែរ៕