ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញចុះពិនិត្យវឌ្ឍនភាពគម្រោង PADEE និងគម្រោង CAVAC និងជួបសំណេះសំណាលជាមួយបងប្អូនប្រជាកសិករ និងសហគមន៍កសិកម្ម

ចេញ​ផ្សាយ​ ១៣ កុម្ភៈ ២០១៨ 2566

នៅព្រឹកថ្ងៃទី ២៣ ខែមិថុនា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រម៉ាញ់ និងនេសាទ អញ្ជើញចុះពិនិត្យវឌ្ឍនភាពគម្រោង PADEE និងគម្រោង CAVAC និងជួបសំណេះសំណាល ជាមួយបងប្អូនប្រជាកសិករ និងសហគមន៍កសិកម្ម ដែលស្ថិតនៅក្នុងឃុំចំប៉ា ស្រុកព្រៃកប្បាស ខេត្តតាកែវ។ ចូលរួមក្នុងដំណើរពិនិត្យវឌ្ឍនភាពនោះរួមមាន ឯកឧត្តម ឡាយ វណ្ណៈ អភិបាល នៃគណៈអភិបាលខេត្តតាកែវ ឯកឧត្តម រដ្ឋលេខាធិការ និងអនុរដ្ឋលេខាធិការ នៃក្រសួង ថ្នាក់ដឹកនាំអង្គភាពជំនាញក្រសួង និងថ្នាក់ដឹកនាំ និងមន្ត្រី នៃមន្ទីរកសិកម្មខេត្តតាកែវ។

ឆ្លៀតក្នុងពេលនោះ ឯកឧត្តមរដ្ឋមន្រ្តី បានធ្វើការវាយតម្លៃខ្ពស់ចំពោះលទ្ធផលនៃការអនុវត្តគម្រោងទាំងពីរ ដែលបានធ្វើអោយជីវភាពរបស់ប្រជាកសិករមានភាពប្រសើរឡើង។ ទន្ទឹមនឹងនេះ ឯកឧត្តមរដ្ឋមន្រ្តី បានណែនាំអោយប្រជាពលរដ្ឋ យកចិត្តទុកដាក់ពង្រីកការដាំដុះបន្លែ អោយបានកាន់តែច្រើន និងពង្រីកការចិញ្ចឹមសត្វផងដែរ ដើម្បីចូលរួមចំណែកកាត់បន្ថយការនាំចូលពីប្រទេសជិតខាង។ ឯកឧត្តមរដ្ឋមន្ត្រី បានណែនាំបន្ថែមថា រាល់កសិករ ឬសហគមន៍ណាដែលបានចំណាយថវិកាសម្រាប់បម្រើដល់ការងារកសិកម្ម គួររៀបចំជាសំណើមកកាន់ក្រសួង តាមរយៈមន្ទីរខេត្ត ដើម្បីពិនិត្យលទ្ធភាពរកមធ្យោបាយកាត់បន្ថយតម្លៃភ្លើង។