ឯកឧត្តមរដ្ឋលេខាធិការ ប្រាក់ ដាវីដ បានចុះពិនិត្យវឌ្ឍនភាពក្រុមហ៊ុនចម្ការកៅស៊ូមេមត់ ស្ថិតនៅក្នុងឃុំត្រមូង ខេត្តត្បូងឃ្មុំ

ចេញ​ផ្សាយ​ ១៥ កញ្ញា ២០២៤ 2640

នៅថ្ងៃទី១២ ខែកញ្ញា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការី បានប្រជុំពិភាក្សាការងារនៅក្រុមហ៊ុនចម្ការកៅស៊ូមេមត់ ស្ថិតក្នុងឃុំទ្រមូង ស្រុកមេមត់ ខេត្ដត្បូងឃ្មុំ ដើម្បីស្វែងយល់បន្ថែមពីគម្រោងរបស់ក្រុមហ៊ុនដែលប្រមូលទិញជ័រទឹក និងជ័រកៅស៊ូកកពីសហគមន៍កៅស៊ូគ្រួសារនៅតំបន់ជុំវិញ ដើម្បីកែច្នៃបម្រើទីផ្សារក្នុងស្រុក និងនាំចេញទៅទីផ្សារអឺរ៉ុប។

ក្រុមហ៊ុនចម្ការមេមត់ បច្ចុប្បន្ននេះ កំពុងអនុវត្តគម្រោងប្រមូលទិញជ័រកៅស៊ូទឹក (Latex) ពីសហគមន៍កសិកម្មចំនួន៣ ក្នុងខេត្តត្បូងឃ្មុំ ដើម្បីផលិតជាកៅស៊ូដុំប្រភេទ TSR នាំចេញទៅអឺរ៉ុប។ ជាមួយគ្នានេះក្រុមហ៊ុននឹងពង្រីកវិសាលភាពក្នុងការប្រមូលទិញជ័រចានពីសហគមន៍បន្ថែមទៀតសម្រាប់ផលិត CSR 10 សម្រាប់ផ្គត់ផ្គង់ឱ្យក្រុមហ៊ុនផលិតសំបកកង់យានយន្តក្នុងស្រុក។

ជាការឆ្លើយតបទៅនឹងបទប្បញ្ញត្តិ EUDR ក្រុមហ៊ុនកំពុងសហការជាមួយក្រុមហ៊ុនឯកជនរៀបចំស្នើសុំវិញ្ញាបនបត្របញ្ជាក់ ដែលទទួលស្គាល់ដោយសហគមន៍អឺរ៉ុប ដែលនឹងទទួលបាននៅក្នុងខែវិច្និកាឆ្នាំនេះ ក្រុមហ៊ុនក៏មានផែនការបញ្ចូលសហគមន៍កៅស៊ូគ្រួសារទៅក្នុងសំណើ EUDR ដើម្បីទទួលបានអត្ថប្រយោជន៍ផងដែរ។

តំណាងសហគមន៍កៅស៊ូគ្រួសារទាំង៣ បានសំដែងចំណាប់អារម្មណ៍សប្បាយរីករាយចំពោះក្រុមហ៊ុនដែលប្រមូលទិញទឹកជ័រដោយតម្លៃសមស្រប និងសំណូមពរជួយទិញជ័រកៅស៊ូបង្កងផងដែរ។

ជាការឆ្លើយតប ឯកឧត្តម ប្រាក់ ដាវីដ បានលើកទឹកចិត្តឱ្យសហគមន៍បន្តលក់ជ័រឲ្យក្រុមហ៊ុនបានកាន់តែច្រើន ពង្រឹងគុណភាពអនាម័យប្រមូលជ័រឱ្យបានស្អាត និងថែរក្សាដើមកៅស៊ូអោយចៀរជ័រយកផលឱ្យបានយូរឆ្នាំ។ បន្ថែមពីនេះ ឯកឧត្តមរដ្ឋលេខាធិការបានឱ្យអគ្គនាយកដ្ឋានកៅស៊ូសហការជាមួយក្រុមហ៊ុនចម្ការកៅស៊ូមេមត់សិក្សាបន្ថែមម៉ូដែលនៃការប្រមូលទិញជ័រពីសហគមន៍កៅស៊ូគ្រួសារ ដើម្បីរៀបចំយន្តការសម្រាប់អនុវត្តនៅតាមបណ្តាក្រុមហ៊ុនដទៃទៀត និងស្វែងយល់បន្ថែមអំពីការរៀបចំយន្តការឆ្លើយតបទៅនឹងបទប្បញ្ញត្តិ EUDR នាពេលខាងមុខ។

បន្ទាប់មក គណ:ប្រតិភូបានចុះពិនិត្យរោងសិប្បកម្មកែច្នៃជ័រកៅស៊ូឈ្មោះ Kamrubber ដែលបង្កើតឡើយក្នុងខែកញ្ញា ឆ្នាំ២០២៣ ស្ថិតនៅឃុំទមូង ស្រុកមេមត់។ រោងចក្រនេះបានប្រមូលទិញជ័រចានពីកសិករកៅស៊ូគ្រួសារមកកែច្នៃជាប្រភេទ CSR 10 ដោយមានសមត្ថភាពផលិតពី ២ - ២,៥តោន /ម៉ោង។ បច្ចុប្បន្ន រោងចក្រនេះអាចផលិតជ័រប្រភេទលេខ១០ បានចំនួនប្រហែល ៦៥០តោន/ខែ សម្រាប់លក់ឲ្យសហគ្រាសផលិតសំបក់កង់យានយន្តទាំង៣ នៅកម្ពុជា៕