ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីនៃសិក្ខាសាលាពិគ្រោះយោបល់ស្តីពី «ការងើបឡើងវិញនៃវិស័យកសិកម្មក្នុងប្រទេសកម្ពុជា»

ចេញ​ផ្សាយ​ ១៣ កុម្ភៈ ២០១៨ 3425

នៅព្រឹកថ្ងៃទី២៦ ខែកក្កដា ឆ្នាំ២០១៦នេះ នៅទីស្តីការ ក្រសួងសេដ្ឋកិច្ច និងហិរញ្ញវត្ថុ មានរៀបចំសិក្ខាសាលាពិគ្រោះយោបល់ស្តីពី "ការងើបឡើងវិញនៃវិស័យកសិកម្មក្នុងប្រទេសកម្ពុជា" ក្រោមអធិបតីភាព ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម វង្សី វិស្សុត រដ្ឋមន្រ្តីស្តីទីក្រសួងសេដ្ឋកិច្ច និងហិរញ្ញវត្ថុ និងមានការអញ្ជើញចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងអង្គការសង្គមស៊ីវិល។ 

គោលបំណងនៃកិច្ចប្រជុំអន្តរវិស័យនាពេលនេះគឺដើម្បី តំរង់ទិសដៅលើវិស័យកសិកម្ម និងពិនិត្យមើលពីលទ្ធភាពថវិការបស់ជាតិ ក្នុងការផ្តោតលើការអភិវឌ្ឍន៏វិស័យកសិកម្ម។ 

ឯកឧត្តមរដ្ឋមន្រ្តី វេង សាខុន បានបញ្ជាក់ថា សិក្ខាសាលានាពេលនេះ គឺជាឱកាសសម្រាប់ភាគីពាក់ព័ន្ធទាំងអស់រួមគ្នាពិនិត្យ វាយតម្លៃឲ្យបានស៊ីជម្រៅ និងបង្ហាញការព្រាងគោលនយោបាយនៃការអភិវឌ្ឍវិស័យកសិកម្ម សម្រាប់រយៈពេលខ្លី និងមធ្យម ដែលអាចធ្វើអោយសម្រេចបានជោគជ័យក្នុងប្រព័ន្ធនៃខ្សែចង្វាក់ផលិតកម្មកសិកម្ម ព្រមទាំងការថែរក្សា និងគ្រប់គ្រងធនធានធម្មជាតិប្រកបដោយចីរភាពដោយផ្អែកលើបទពិសោធន៏ដែលសម្រេចបានកន្លងមក ក៏ដូចជាមេរៀនល្អៗ ដែលជាបញ្ហាប្រឈម និងកាលានុវត្តភាព ដើម្បីដាក់ចេញនូវវិធានការឲ្យបានសមស្របទៅតាមគោលនយោបាយកំណែទម្រង់ស៊ីជម្រៅ និងយុទ្ធសាស្រ្តចតុកោណដំណាក់ទី៣ របស់រាជរដ្ឋាភិបាលកម្ពុជា។ 

អង្គប្រជុំបានគាំទ្រទៅលើការរៀបចំផែនការគោលនយោបាយអភិវឌ្ឍន៍វិស័យកសិកម្មរយៈពេលវែង និងការរៀបចំធ្វើបច្ចុប្បន្នភាពផែនការយុទ្ធសាស្រ្តជាតិដើម្បីអោយស្របទៅតាមរបត់នៃការវិវឌ្ឍនៃសង្គមសេដ្ឋកិច្ច។ ទន្ទឹមនឹងនេះ ក្រសួងកសិកម្ម រុក្ខាប្រមាញ់ និងនេសាទ នឹងត្រូវរៀបចំបែងចែកការគ្រប់គ្រងតំបន់ទៅតាមគុណភាពដី និងលទ្ធភាពទឹក ដែលអាចឆ្លើយ តបទៅនឹងប្រភេទដំណាំកសិកម្ម។ បន្ថែមពីនេះ ចំពោះការផ្សព្វផ្សាយកសិកម្ម ក្រសួងនឹងផ្តោតទៅលើទាំងការពង្រឹងសមត្ថភាពមន្រ្តីផ្តល់សេវាផ្សព្វផ្សាយ កសិករនិងវិស័យឯកជន ទៅតាមការវិវឌ្ឍនៅតាមទីតាំង ឬតំបន់ជាក់ស្តែង។ 

ក្រសួងសេដ្ឋកិច្ច និងហិរញវត្ថុក៏បានស្នើអោយក្រសួងកសិកម្ម រុក្ខាប្រមាញ់ និងនេសាទ សហការគ្នាជាមួយក្រសួងធនធានទឹក និងឧតុនិយម ក្នុងការរៀបចំផែនការវិនិយោគលើប្រព័ន្ធធារាសាស្រ្តដែលមានលក្ខណៈសន្សំសំចៃ និងពេញលេញ ហើយក្រសួង សេដ្ឋកិច្ចនិងហិរញ្ញវត្ថុក៏នឹងជម្រុញអោយអាជ្ញាធរអគ្គិសនីជាតិ ពង្រីកការតភ្ជាប់បណ្តាញអោយដល់គ្រប់មូលដ្ឋាន ជាពិសេសតំបន់ប្រកបបេរកសិកម្ម និងពិនិត្យពីនីតិវិធីក្នុងការបញ្ចុះថ្លៃប្រើប្រាស់អគ្គិសនីក្នុងខ្សែចង្វាក់ផលិតកម្មកសិកម្ម។ ទន្ទឹមនឹងនេះ ក្រសួង សេដ្ឋកិច្ច និងហិរញ្ញវត្ថុក៏បានស្នើអោយក្រសួងកសិកម្ម រុក្ខាប្រមាញ់ និងនេសាទ រៀបចំក្របខ័ណ្ឌផលិតកម្មជីគីមី ថ្នាំកសិកម្ម និងចំណីសត្វ ដើម្បីធ្វើការប្រៀបធៀបពីកម្រិតប្រកួតប្រជែង រវាងការផលិតក្នុងស្រុក និងការនាំចូល។