ឯកឧត្តម Xu Dazhe អភិបាលនៃគណៈអភិបាលខេត្តហ៊ូណាន បានធ្វើបដិសណ្ឋារកិច្ច និងស្វាគមន៍យ៉ាងកក់ក្តៅបំផុតជូនចំពោះឯកឧត្តមរដ្ឋមន្រ្តីនិងប្រតិភូ នៅសាលមោរី ហ៊ូណានផ្លាហ្សា សណ្ឋាគារហ្វាក់ថាន ទីក្រុងឆាងសា

ចេញ​ផ្សាយ​ ១៧ ឧសភា ២០១៨ 3557

នៅរសៀលថ្ងៃទី១៤ ខែឧសភា ឆ្នាំ២០១៨ ឯកឧត្តម Xu Dazhe អភិបាលនៃគណៈអភិបាលខេត្តហ៊ូណាន បានធ្វើបដិសណ្ឋារកិច្ច និងស្វាគមន៍យ៉ាងកក់ក្តៅបំផុតជូនចំពោះឯកឧត្តមរដ្ឋមន្រ្តីនិងប្រតិភូ នៅសាលមោរី ហ៊ូណានផ្លាហ្សា សណ្ឋាគារហ្វាក់ថាន ទីក្រុងឆាងសា ខេត្តហ៊ូណាន។

ឯកឧត្តមអភិបាលខេត្តបានជម្រាបជូនគណៈ ប្រតិភូជ្រាបអំពីវឌ្ឍនភាព និងការរីកចម្រើននៃខេត្តហ៊ូណានលើគ្រប់វិស័យ ពិសេសវិស័យកសិកម្ម ដោយឡែកផលិតកម្មស្រូវអង្ករដ៏ល្បីល្បាញពេញពិភពលោក គួរជាទីមោទនៈ។ តាមរយៈដំណើរទស្សនកិច្ចនេះ ឯកឧត្តមអភិបាលខេត្តសង្ឃឹមនិងជឿជាក់ថាចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ដែលជាមហាមិត្តនិងគ្នាជាង ៦០ឆ្នាំមកនេះ អាចបង្កើននិងពង្រឹងទ្វេឡើងថែមទៀតឲ្យកាន់តែរឹងមាំ ហើយសន្យាថាខេត្តហ៊ូណាន និងផ្តល់កិច្ចសហការយ៉ាងពេញលេញជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីពង្រឹង និងពង្រីកកិច្ចសហប្រតិបត្តិការលើវិស័យផលិតកម្មពូជស្រូវហាយប្រីដដ៏មានសារៈសំខាន់នេះ។

នាក្នុងឱកាសដ៏ប្រពៃនេះ តាងនាមឲ្យរាជរដ្ឋាភិ បាលកម្ពុជា ក្រសួងកសិកម្ម រុក្ខាប្រមាញ់ និងនេសាទ និងរូបឯកឧត្តមរដ្ឋមន្ត្រីផ្ទាល់ បានសម្តែងនូវសេចក្តីរីករាយ និងអរគុណយ៉ាងជ្រាលជ្រៅជូនចំពោះឯកឧត្តមអភិបាលខេត្ត មជ្ឈមណ្ឌលជាតិផលិតពូជស្រូវ ហូណាន និងវិស័យឯកជនដែលបានផ្តល់ឱកាសឲ្យគណៈប្រតិភូមកទស្សនកិច្ចសិក្សាស្រាវជ្រាវពីផលិតកម្មពូជស្រូវហាយប្រិដនៅខេត្តហ៊ូណានរយៈពេល ២ថ្ងៃកន្លងមកនេះ។ ឯកឧត្តមរដ្ឋមន្ត្រីក៏បានវាយតម្លៃខ្ពស់ចំពោះវឌ្ឍនភាព និងសមិទ្ធផលនានាដែលខេត្ត និងមជ្ឈមណ្ឌលសម្រេចបាន។

លទ្ធផលដែលទទួលបានពីដំណើរទស្សនកិច្ចនេះ ឯកឧត្តមរដ្ឋមន្ត្រីសង្ឃឹម និងជឿជាក់ថាខេត្តហ៊ូណាន មជ្ឈមណ្ឌល និងវិស័យឯកជននឹងខិតខំប្រឹងប្រែងអស់លទ្ធភាព ដើម្បីជួយគាំទ្រ និងអភិវឌ្ឍវិស័យកសិកម្មតាមរយៈជំរុញគម្រោងផលិតកម្មពូជស្រូវហាយប្រិដ ធ្វើដាំដុះ និងនាំចេញឲ្យទទួលបានជោគជ័យស្របតាមផែនការយុទ្ធសាស្ត្រ ផ្លូវមួយ ខ្សែក្រវាត់មួយ និងគោលនយោបាយរបស់រាជរដ្ឋាភិបាលកម្ពុជាក្នុងការជំរុញការនាំពេញស្រូវអង្ករ។

ទន្ទឹមនឹងនេះ ដំណើរទស្សនកិច្ចដ៏មានសារៈសំខាន់នេះ បានផ្តល់ពុទ្ធិ និងបទពិសោធន៍ល្អៗជាច្រើនដែលអាចយក

មកធ្វើជាមូលដ្ឋានគ្រឹះក្នុងការកសាងគោលនយោបាយ ដើម្បីអភិវឌ្ឍវិស័យកសិកម្មឲ្យកាន់តែរីកចម្រើនប្រកបដោយចីរភាព។

ជំនួបពិភាក្សាត្រូវបានបញ្ចប់ក្នុងបរិយាកាសយ៉ាងស្និទ្ធស្នាលបំផុតក្នុងស្មារតីមិត្តភាព សាមគ្គីភាព និងកិច្ចសហប្រតិបត្តិការល្អប្រសើររវាងប្រទេសទាំងពីរ។