ព័ត៌មានផ្សេងៗទៀត
ឯកឧត្តមរដ្ឋមន្ត្រីដឹកនាំកិច្ចប្រជុំវាយតម្លៃពីលទ្ធផលនៃការបង្ក្រាបបទល្មើសជលផល
ចេញផ្សាយ ២៣ មករា ២០១៨ 3674
កាលពីថ្ងៃទី១២ ខែកុម្ភៈ នៅទីស្តីការក្រសួងកសិកម្ម រុក្ខាប្រមាញ់ និងនេសាទ មានកិច្ចប្រជុំពិភាក្សា និងវាយតម្លៃពីលទ្ធផលនៃការបង្ក្រាបបទល្មើសជលផលក្នុងរយៈពេលកន្លងមក ក្រោមអធិបតីភាពឯកឧត្តមរដ្ឋមន្ត្រី និងមានការចូលរួមពីអាជ្ញាធរខេត្តពាក់ព័ន្ធដូចជាខេត្តតាកែវ កណ្តាល បន្ទាយមានជ័យ បាត់ដំបង កំពង់ធំ សៀមរាប និងព្រៃវែង រដ្ឋលេខាធិការ អនុរដ្ឋលេខាធិការ ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល និងមន្ត្រីជំនាញក្រោមឱវាទមួយចំនួនទៀត។
នាឱកាសនោះឯកឧត្តម ណៅ ធួក បានរាយការណ៍ជូនប្រជុំជ្រាបពីលទ្ធផលនៃការបង្ត្រាបបទល្មើសតាប់តាំងពីដើមខែមីនាឆ្នាំ ២០១២ បន្ទាប់ពីរាជរដ្ឋាភិបាលបានប្រកាសធ្វើកំណែទម្រង់វិស័យជលផលស៊ីជម្រៅរួមមក ក្រសួងកសិកម្ម រុក្ខាប្រមាញ់ និងនេសាទ មានរដ្ឋបាលជលផលជាសេនាធិការបានសហការជាមួយអាជ្ញាធរថ្នាក់ក្រោមជាតិ កងកម្លាមងប្រដាប់អាវុអគ្រប់លំដាប់ថ្នាក់ បានចុះបង្ក្រាបបទល្មើសជាបន្តបន្ទាប់។
លទ្ធផលទទួលបានគឺបង្ក្រាបបទល្មើសបាន ៥៣០៧ ករណី រឹបអូសវត្ថុតាងរបាំងសាច់អួនជាង ១លានម៉ែត្រ របាំងព្រួលជាង ៤២ ពាន់ម៉ែត្រ លូសាច់អួនជាង ២០ ពាន់ម៉ែត្រ មងជាង ៣២០ ពាន់ម៉ែត្រ ឧបករណ៍ឆក់ត្រី ៧២០គ្រឿង និងឧបករណ៍ផ្សេងៗទៀត។
ទន្ទឹមនឹងនោះក្រុមបង្ក្រាបប្រឈមនឹងបញ្ហាមួយចំនួន ដូចជាខ្វះទូក កាណូតសម្រាប់ប្រតិបត្តិការ ខ្វះថវិកាសម្រាប់ចំណាយក្នុងការបង្ក្រាប ការយល់ដឹងរបស់សហគមន៍ នេសាទនៅមានកម្រិត ខ្វះការចូលរួមពីគ្រប់សមាសភាពពាក់ព័ន្ធ។ លទ្ធផលនៃការបង្ក្រាប និងអ្វីដែលឯកឧត្តមប្រតិភូបានលើកឡើងត្រូវបានអាជ្ញាធរខេត្តទាំង ៧ គាំទ្រនិងឯកភាពទាំងស្រុង។
លទ្ធផលនេះត្រូវបានការគាំទ្រ និងវាយតម្លៃជាវិជ្ជមានយ៉ាងខ្ពស់ពីឯកឧត្តរដ្ឋមន្ត្រី ហើយនេះគឺសមិទ្ធផលដែលក្រសួងសម្រេចបាន។ លទ្ធផលជាវិជ្ជមាននេះបានមកពីការយកចិត្តទុកដាក់ជួយសហការ គាំទ្រទាំងកម្លាំងកាយ ចិត្ត សម្ភារៈ និងថវិកាគ្រប់បេសកកម្មបង្ក្រាបបទល្មើស ពីអាជ្ញាធរថ្នាក់ក្រោមជាតិគ្រប់លំដាប់ថ្នាក់ តាងនាមឲ្យក្រសួង ក៏ដូចជារដ្ឋបាលជលផល សូមថ្លែងអំណរគុណយ៉ាងជ្រាលជ្រៅដល់ឯកឧត្តមអភិបាល អភិបាលរងខេត្ត មន្ត្រីពាក់ព័ន្ធ និងកងកម្លាំងប្រដាប់អាវុធគ្រប់លំដាប់ថ្នាក់ ហើយសង្ឃឹមនិងជឿជាក់យ៉ាងមុតមាំថាសកម្មភាពនេះនឹងបន្តរហូរ ដើម្បីឲ្យធនធានមច្ឆជាតិរបស់យើងស្ថិតស្ថេរបានគង់វង្ស ទុកជាផលប្រយោជន៍សម្រាប់ជាតិ និងប្រជាជនយើងនាពេលអនាគត ពិសេសកូនចៅយើងជំនាន់ក្រោម។
ជាលទ្ធផលអង្គប្រជុំបានសម្រេចលើចំណុច០៤ សំខាន់ៗ មានទី១-ធ្វើកំណែទម្រង់សហគមន៍នេសាទស៊ីជម្រៅទាំងរចនាសម្ព័ន្ធរដ្ឋបាល ការ គ្រប់គ្រង ការងារបច្ចេកទេស ការងារបណ្តុះបណ្តាល ផ្សព្វផ្សាយ និងអភិរក្ស ធ្វើយ៉ាងណាជុំរុញ និងលើទឹកចិត្ត ឲ្យសមាជិកបានចូលរួមគ្រប់ៗរាល់សកម្មភាពបង្ក្រាបបទល្មើស ការការពារ និងអភិរក្ស ធ្វើយ៉ាងណាឲ្យពួកគាត់មាន ភាពទទួលខុសត្រូវខ្ពស់លើដែនសមត្ថកិច្ចរបស់ខ្លួន។
ទី២-រដ្ឋបាលជលផលត្រូវធ្វើជំរឿនអ្នកនេសាទ និងឧបករណ៍នេសាទនៅទូទាំងប្រទេសឡើងវិញឲ្យបានច្បាស់លាស់ ធ្វើការផ្សព្វផ្សាយឲ្យបានស៊ីជុំរៅពីច្បាប់ស្តីពីជលផល លិខិតបទដ្ឋានគតិយុត្តមួយជំនួយទៀត ជាពិសេសឧបករណ៍ណាត្រូវច្បាប់ និងឧបករណ៍ណាហាមឃាត់ ដើម្បីជាប្រយោជន៍ដល់អ្នកនេសាទ។ ទី៣-ថវិកាសម្រាប់បេសកកម្មបង្ក្រាបបទល្មើសនៅមានកម្រិត ហេតុនេះសុំឲ្យប្រើប្រាស់ឲ្យមានប្រសិទ្ធភាពបំផុត ត្រង់ចំណុចនេះក៏សូមថ្លែងអំណរគុណចំពោះអាជ្ញាធរខេត្តពាក់ព័ន្ធទាំងអស់ដែល បានជួយជ្រោមជ្រែងអស់ពីចិត្តពីផ្លើមដើម្បីឲ្យបេសកកម្មសម្រេចបានជោគជ័យ។
ទី៤-ដោយយោងលើ សជណ លេខ១៤១ សជណ កស ចុះថ្ងៃទី២៥ ខែមករា ឆ្នាំ២០១៣ ស្តីពីករណីសុំអនុញ្ញាតធ្វើនេសាទដោយឧបករណ៍នាម និងចៃរ៉ាភ្ជាប់ម៉ាស៊ីនខ្យល់សម្រាប់មុជទឹក ដោយរួមផ្សំកម្លាំងម៉ាស៊ីនមិនលើសពី ១៥ សេះ ធ្វើក្នុងដែននេសាទទឹកសាបនៃព្រះរាជាណាចក្រកម្ពុជា សម្រាប់ឆ្នាំ២០១២-២០១៣ និងសម្រាប់ឆ្នាំខាងមុខ ត្រង់ចំណុច ៦ ក្រសួងសុំឲ្យរដ្ឋបាលជលផលយកសំណើរបស់ប្រជានេសាទនៅភូមិកំពង់ចម្លង កោះតាពៅ នាងសាវ ទួលនាងសាវ និងភូមិផាត់សណ្តាយ ឃុំផាត់សណ្តាយ ស្រុកកំពង់ ស្វាយខេត្តកំពង់ធំ សុំប្រើប្រាស់ឧបករណ៍នេសាទ លបឡុក ទៅពិនិត្យ ពិចារណាឲ្យបានល្អិតល្អន់ទាំងលក្ខណៈបច្ចេកទេស និងច្បាប់ជាមុនសិនមុនធ្វើការសម្រេច ដោយហេតុថាការប្រើឧបករណ៍នេសាទ លបឡុក នេះមានផលអវិជ្ជមានច្រើនជាងផលវិជ្ជមាន។
