ថ្នាក់ដឹកនាំក្រសួងកសិកម្ម​ អញ្ជើញជាអធិបតីបើកសិក្ខាសាលាស្តីពី ការពង្រឹង និងត្រួតពិនិត្យការបំពេញការងាររបស់មន្ត្រីកសិកម្មឃុំ សង្កាត់ ផ្អែកលើសូចនាករសមិទ្ធកម្មគន្លឹះ (KPIs)

ចេញ​ផ្សាយ​ ៥ វិច្ឆិកា ២០២៦ 144

នៅថ្ងៃទី៤ ដល់ថ្ងៃទី៥ ខែវិច្ឆិកា ឆ្នាំ២០២៦ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតី ក្នុងសិក្ខាសាលាស្តីពី «ការពង្រឹង និងត្រួតពិនិត្យការបំពេញការងាររបស់មន្ត្រីកសិកម្មឃុំ សង្កាត់ (CAO) ផ្អែកលើសូចនាករសមិទ្ធកម្មគន្លឹះ (KPIs)» ក្រោមការគាំទ្រពីទីភ្នាក់ងារសហប្រតិបត្តិការអាល្លឺម៉ង់ (GIZ) រៀបចំធ្វើឡើងនៅខេត្តកំពត ដោយមានការចូលរួមពី ឯកឧត្តមអនុរដ្ឋលេខាធិការ​ ខាត់ សុធី មន្រ្តីជំនាញ និងមន្ត្រីកសិកម្មឃុំ សង្កាត់ សរុបអ្នកចូលរួមចំនួន ៧០នាក់។
សិក្ខាសាលានេះមានគោលបំណង ពិនិត្យស្ថានភាព បញ្ហាប្រឈម និងសមត្ថភាពក្នុងការគាំទ្រ គ្រប់គ្រង និងតាមដានការងាររបស់មន្ត្រីកសិកម្មឃុំ សង្កាត់ ព្រមទាំងពិភាក្សាកំណត់សូចនាករសមិទ្ធកម្មអាទិភាព វិធីសាស្ត្រវាស់វែង ប្រភពទិន្នន័យ និងការទទួលខុសត្រូវឱ្យបានច្បាស់លាស់។ ជាមួយគ្នានេះ ក៏ផ្តោតលើការរៀបចំយន្តការវាយតម្លៃសមិទ្ធកម្ម គោលការណ៍លើកទឹកចិត្ត និងនីតិវិធីត្រួតពិនិត្យការអនុវត្តការងារ ដើម្បីធានាបាននូវគុណភាពទិន្នន័យ ភាពពេញលេញ និងភាពទាន់ពេលវេលានៃការរាយការណ៍ជូនថ្នាក់ដឹកនាំ។
នាឱកាសនោះ ឯកឧត្តមបណ្ឌិត យ៉ង សាំង កុមារ បានផ្តល់អនុសាសន៍ស្តីពី ការវិភាគចំណេញ-ខាត និងផលចំណេញលើទុនវិនិយោគក្នុងផលិតកម្មកសិកម្ម ដើម្បីពង្រឹងសមត្ថភាពមន្ត្រីកសិកម្មឃុំ សង្កាត់ ក្នុងការណែនាំកសិករឱ្យចេះគ្រប់គ្រងចំណូល ចំណាយ និងថ្លៃដើមផលិតកម្ម ព្រមទាំងការប្រើប្រាស់កម្លាំងពលកម្មប្រកបដោយប្រសិទ្ធភាព។ ការផ្តល់ចំណេះដឹងនេះនឹងរួមចំណែកជួយកសិករកាត់បន្ថយចំណាយ បង្កើនផលចំណេញ លើកកម្ពស់ជីវភាព និងកាត់បន្ថយភាពក្រីក្រ ស្របតាមគោលនយោបាយអាទិភាពទី៥ និងទី៦ របស់រាជរដ្ឋាភិបាល៕