លោកជំទាវ អ៊ឹម រចនា អនុរដ្ឋលេខាធិការ ក្រសួង កសិកម្ម រុក្ខាប្រមាញ់ និងនេសាទ អញ្ជើញពិនិត្យលទ្ធភាពដីដាំដុះដំណាំ មន សម្រាប់ក្រុមហ៊ុនសិប្បករអង្គរ អាទីហ្សង់អង្គរ

ចេញ​ផ្សាយ​ ២០ ឧសភា ២០២៤ 1370

ដោយមានការចាត់តាំងពី ឯកឧត្តមរដ្ឋមន្ដ្រី ឌិត ទីណា នៅថ្ងៃសៅរ៍ ទី១៨ ខែឧសភា ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការ ជាអ្នកនាំពាក្យនិងទទួលបន្ទុក ការងារព័ត៌មាន និងទំនាក់ទំនងសាធារណៈ នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញពិភាក្សាការងារជាមួយអ្នកជំនាញផ្នែកដំណាំមន នៃក្រុមហ៊ុនសិប្បករអង្គរ នៅក្រុងសៀមរាប ខេត្តសៀមរាប។

កិច្ចពិភាក្សានេះ ធ្វើឡើងនៅទីតាំងដីទំហំ ១៥ហិកតា ដែលក្រុមហ៊ុនសិប្បករអង្គរ មានបំណងចង់ដាំដើមមនបន្ថែម ដើម្បីឈានទៅចិញ្ចឹមដង្កូវនាង និងពង្រីកផលិតកម្មសូត្រសម្រាប់ផ្គត់ផ្គង់ដល់រោងតម្បាញ ខណៈតម្រូវការសូត្រខ្មែរពីអតិថិជនមានកំណើនយ៉ាងគំហុក។

តាមរយៈដំណើរទស្សនកិច្ចនិងជំនួបពិភាក្សា៣លើក ក្នុងរយៈពេល៥ខែកន្លងមក និងផ្អែកតាមការឯកភាពជាគោលការណ៍ពីឯកឧត្តមរដ្ឋមន្ដ្រី ឌិត ទីណា ក្រសួងកសិកម្ម រុក្ខាប្រមាញ់ និងនេសាទ នឹងផ្ដល់ការសហការគាំទ្រផ្ដល់ ជំនួយ បច្ចេកទេស និងផ្ដល់ដើមមនដល់ក្រុមហ៊ុន សម្រាប់បម្រើដល់ការដាំដុះបន្ថែមនាពេលអនាគត ។ នៅក្នុងរយៈពេល៥ខែកន្លងមកនេះ លោក យិន ច័ន្ទសុធី អគ្គនាយករងនៃអគ្គនាយកដ្ឋានកសិកម្ម និងក្រុមការងារបច្ចេកទេស បានជួបជាមួយតំណាងក្រុមហ៊ុនសិប្បករអង្គរ និងបានពន្យល់អំពីបច្ចេកទេសនៃការដាំដុះដំណាំមនឱ្យស្របទៅតាមទីតាំងភូមិសាស្ត្រ និងសណ្ឋានដីនៅទីនោះ។ 

ឆ្លើយតបនិងសំណើពីក្រុមហ៊ុនសិប្បករអង្គរ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ រីករាយសហការផ្ដល់ការគាំទ្រក្នុងការបង្កាត់ពូជដង្កូវនាងដើម្បីស្វែងរកពូជថ្មីៗដែលធន់និងអាកាសធាតុ ផ្តល់ទិន្នផលសរសៃសូត្រខ្ពស់។ អគ្គនាយកដ្ឋានកសិកម្មនឹងបន្តធ្វើការជាមួយក្រុមហ៊ុន ដើម្បីផ្ដល់ការបណ្ដុះបណ្ដាលបច្ចេកទេសក្នុងការដាំដុះនិងការការប្រមូលផល ព្រមទាំងសហការដោះស្រាយរាល់បញ្ហាប្រឈមនានាដែលកើតទ្បើង ទាំងពេលនេះ និងពេលអនាគត។

លោកជំទាវ អ៊ឹម រចនា បានគូសបញ្ជាក់ ទៅកាន់តំណាងក្រុមហ៊ុនសិប្បករអង្គរ អំពីការយកចិត្តទុកដាក់របស់ ឯកឧត្តមរដ្ឋមន្ដ្រី ឌិត ទីណា ចំពោះការដាំដើម មន ចិញ្ចឹមដង្កូវនាង និងសិប្បកម្មសូត្រ ដែលជាទំនៀមទម្លាប់ ប្រពៃណីខ្មែរតាំងពីបុរាណកាលមកហើយ។ បើតាមឯកឧត្តមរដ្ឋមន្ដ្រី ការអភិរក្សសិប្បកម្មសូត្រ គឺជាការរួមចំណែកជួយ ថែរក្សា និងផ្សព្វផ្សាយអត្តសញ្ញាណ ព្រមទាំងដួងព្រលឹងជាតិខ្មែរ ទៅកាន់ ប្រជាជននៃពិភពលោក។ លើសពីនេះ វាក៏នឹងជួយផ្ដល់ការងារដល់ប្រជាពលរដ្ឋ នៅក្នុងមូលដ្ឋាន បង្កើនប្រាក់ចំណូល ក៏ដូចជាកាត់បន្ថយ ការចំណាកស្រុក របស់ប្រជាពលរដ្ឋ៕