ឯកឧត្តមរដ្ឋមន្ត្រី ឌិត ទីណា អញ្ជើញដឹកនាំកិច្ចប្រជុំពិនិត្យលើគម្រោងសំណើ ស្តីពីការកសាងទំនាក់ទំនងរវាងការស្រាវជ្រាវ អប់រំ ការផ្សព្វផ្សាយកសិកម្មតាមរយៈការអភិវឌ្ឍស្ថាប័ន និងធនធានមនុស្ស

ចេញ​ផ្សាយ​ ១១ មករា ២០២៤ 19009

នៅព្រឹកថ្ងៃទី១១ ខែមករា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចូលរួមប្រជុំពិនិត្យលើគម្រោងសំណើ ស្តីពីការកសាងទំនាក់ទំនងរវាងការស្រាវជ្រាវ អប់រំ ការផ្សព្វផ្សាយកសិកម្មតាមរយៈការអភិវឌ្ឍស្ថាប័ន និងធនធានមនុស្ស  នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងកិច្ចប្រជុំនេះ ឯកឧត្តមរដ្ឋមន្ត្រី បានណែនាំថាការផ្សព្វផ្សាយត្រូវមានភាពត្រឹមត្រូវ និងពិតប្រាកដទៅដល់សហគមន៏កសិកម្ម និងកសិករ ដោយមិនផ្សព្វផ្សាយបច្ចេកទេសដែលខុសនោះទេ។ លើសពីនេះទៅទៀត ការផ្សព្វផ្សាយត្រូវប្រកបដោយក្រមសីលធម៌ និងវិជ្ជាជីវៈត្រឹមត្រូវ ព្រមទាំងមានការវាយតម្លៃគ្រប់ជ្រុងជ្រោយ និងចំទិសដៅ។

ជាមួយគ្នានេះដែរ ឯកឧត្តមរដ្ឋមន្ត្រី បានគូសបញ្ជាក់ថា យើងត្រូវមានភាពម្ចាស់ការក្នុងការគ្រប់គ្រង  និងមានការរៀបចំផែនការអោយបានត្រឹមត្រូវច្បាស់លាស់ ដើម្បីសំរេចការងារបានជោគជ័យ។

សូមជម្រាបជូនថា គម្រោងសំណើខាងលើនេះ មានរយៈពេល ៥ឆ្នាំ ជាកិច្ចសហការរវាងសាកលវិទ្យាល័យភូមិន្ទកសិកម្ម (RUA) និង KOICA ដែលមានគោលបំណងកសាងទំនាក់ទំនងរវាងការស្រាវជ្រាវអប់រំ និងផ្សព្វផ្សាយកសិកម្ម តតាមរយៈអភិវឌ្ឍស្ថាប័ន និងធនធានមនុស្ស៕