ព័ត៌មានផ្សេងៗទៀត
ឯកឧត្តមបណ្ឌិត អ៊ុក រ៉ាប៊ុនជួបសវនាការជាមួយ ឯកឧត្តម Masatoshi SATA ប្រធានគណៈកម្មាធិការអភិរក្សធម្មជាតិជប៉ុន
ចេញផ្សាយ ២៥ មករា ២០១៨ 3204
ឯកឧត្តមបណ្ឌិតអ៊ុករ៉ាប៊ុនរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានទទួលជួបសវនាការជាមួយឯកឧត្តម Masatoshi SATA ប្រធានគណៈកម្មាធិការអភិរក្សធម្មជាតិរបស់សហព័ន្ធពាណិជ្ជកម្មជប៉ុន និងសហការីក្នុងគោលបំណងផ្លាស់ប្តូរទស្សនៈជាមួយរាជរដ្ឋាភិបាលកម្ពុជាលើគោលនយោបាយ និងការអភិរក្សព្រៃឈើកម្ពុជាក៏ដូចជាការអភិរក្សបរិស្ថានកសិកម្មនៅកម្ពុជា។ ឯកឧត្តមបណ្ឌិតរដ្ឋមន្ត្រីបានថ្លែងអំណរគុណនិងវាយតម្លៃខ្ពស់លើកិច្ចសហប្រតិបត្តិការលើគ្រប់វិស័យកន្លងមកចំពោះប្រទេសជប៉ុនក្នុងការចូលរួមចំណែកក្នុងការអភិវឌ្ឍសេដ្ឋកិច្ចស្ថេរភាពសង្គមនិងសន្តិភាពជូនប្រទេសកម្ពុជាតាមរយៈអង្គការក្រៅរដ្ឋាភិបាលវិនិយោគពីវិស័យឯកជនរដ្ឋាភិបាលជប៉ុននិងប្រជាជនជប៉ុន។ សូមជម្រាបជូនថាកិច្ចសវនាការនេះបានប្រព្រឹត្តទៅនៅទីស្តីការក្រសួងកសិកម្ម រុក្ខាប្រមាញ់ និងនេសាទនាល្ងាចថ្ងៃទី១០ ខែតុលា ឆ្នាំ២០១៤។
ជាការឆ្លើយតបឯកឧត្តមMasatoshi SATA បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើររបស់រាជរដ្ឋាភិបាលកម្ពុជាកន្លងមក។ឯកឧត្តមបានជំរាបជូនដំណើរទស្សនកិច្ចទៅស្រុកជីក្រែងខេត្តសៀមរាបក្នុងគោលបំណងចុះពិនិត្យ និងវាយតម្លៃគម្រោងរបស់អង្គការ JVC ដែលទទួលជំនួយពីគណៈកម្មាធិការអភិរក្សធម្មជាតិរបស់សហព័ន្ធពាណិជ្ជកម្មជប៉ុន(Keidanren) ដែលមានសកម្មភាពផ្តោតទៅលើការទប់ស្កាត់ការបាត់បង់ធនធានព្រៃឈើជលផលនៅតំបន់ទន្លេសាប និងជាពិសេសពិនិត្យទៅលើលទ្ធភាពនៃការកែច្នៃម្ហូបអាហាររបស់ប្រជាពលរដ្ឋនៅក្នុងតំបន់នោះ។ ឯកឧត្តមបានសង្កេតឃើញថាសកម្មភាពគម្រោងមានដំណើរការល្អដោយមានការចូលរួមយ៉ាងសកម្មពីប្រជាជនកម្ពុជានៅទីនោះលើសកម្មភាពអភិរក្សធនធានធម្មជាតិប្រកបដោយស្ថេរភាព និងការជម្រុញឧស្សាហកម្មកែច្នៃម្ហូបអាហារឲ្យមានប្រសិទ្ធភាព។ ឯកឧត្តមក៏បានសំណូមពរឲ្យប្រទេសកម្ពុជាក៏ដូចជាក្រសួងកសិកម្ម រុក្ខាប្រមាញ់ និងនេសាទជួយសហការ និងគាំទ្រថែមទៀតដើម្បីអោយគម្រោងនេះទទួលបានជោគជ័យ។
ឯកឧត្តមបណ្ឌិតរដ្ឋមន្ត្រីមានសេចក្តីរីករាយទទួលយកសំណូមពរខាងលើ និងបានកត់សម្គាល់ថាប្រជាកសិករកម្ពុជានៅតំបន់គម្រោងបានផ្សារភ្ជាប់ជីវិតរស់នៅប្រចាំថ្ងៃរបស់ខ្លួនតាមរយៈគម្រោង និងបានជួយរួមចំណែកការគ្រប់គ្រងធនធានព្រៃឈើ និងជលផលជាមួយរាជរដ្ឋាភិបាលកម្ពុជា។ ឯកឧត្តមបណ្ឌិតរដ្ឋមន្ត្រីបានជម្រាបជូនយ៉ាងច្បាស់អំពីយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលពាក់ព័ន្ធនឹងការគ្រប់គ្រងធនធានធម្មជាតិប្រកបដោយចីរភាពសំដៅរក្សា“តុល្យភាពរវាងការអភិវឌ្ឍ និងការអភិរក្ស”ពិសេសលើកម្ពស់វិភាគទាននៃធនធានធម្មជាតិចំពោះការអភិវឌ្ឍវិស័យកសិកម្មដោយបានគូសបញ្ជាក់ទៅលើការជម្រុញអនុវត្តកម្មវិធីព្រៃសហគមន៍ការត្រួតពិនិត្យតាមដានការធ្វើអាជីវកម្មព្រៃឈើការអនុវត្តច្បាប់ព្រៃឈើ និងការអនុវត្តវិធានការម៉ឺងម៉ាត់ចំពោះបទល្មើសព្រៃឈើការពង្រឹងប្រសិទ្ធភាពគ្រប់គ្រងព្រៃបម្រុងការធានាគម្របបៃតងការអភិរក្សព្រៃឈើ និងសត្វព្រៃការអនុវត្តស៊ីជម្រៅនូវកំណែទម្រង់ឡូតិ៍នេសាទការធានាចីរភាពនៃធនធានជលផល និងការរក្សាចីរភាពប្រព័ន្ធអេកូឡូស៊ីដើម្បីធានាគុណភាពដី និងចីរភាពនៃប្រភពទឹកក្នុងគោលបំណងធានាចីរភាពនៃកំណើនសេដ្ឋកិច្ចជាតិនិងលើកកម្ពស់ជីវភាពរស់នៅរបស់ប្រជាជននៅតំបន់ជនបទ។
ឯកឧត្តមបណ្ឌិតរដ្ឋមន្ត្រីបានជម្រាបផងដែរអំពីយុទ្ធសាស្ត្ររបស់រាជរដ្ឋាភិបាលទៅលើការបង្កើនផលិតភាពពីពិធភាវូបនីយកម្ម និងពាណិជ្ជកម្មកសិកម្មការលើកកម្ពស់ការចិញ្ចឹមសត្វ និងវារីវប្បកម្មនិងការអនុវត្តគោលនយោបាយស្តីពីការបង្កើនផលិតកម្មដំណាំស្រូវនិងការនាំចេញអង្កររបស់រាជរដ្ឋាភិបាល។ បច្ចុប្បន្នផលិតកម្មកសិកម្មនៅកម្ពុជាកំពុងឈានពីការផ្គត់ផ្គង់ខ្លួនឯងទៅការនាំចេញទៅក្រៅប្រទេសស្ទើរតែគ្រប់ផលិតផលកសិកម្មដែលជាក់ស្តែងក្រសួងកសិកម្ម រុក្ខាប្រមាញ់ និងនេសាទកំពុងខិតខំធ្វើយ៉ាងណាឲ្យផលិតផលកសិកម្មជាពិសេសអង្ករដែលផលិតបានមានគុណភាព និងក្លាយជាទំនិញដែលមានគុណភាពខ្ពស់អាចលក់លើទីផ្សារអន្តរជាតិនិងលើទីផ្សារក្នុងតំបន់។ ឯកឧត្តមបណ្ឌិតរដ្ឋមន្ត្រីស្នើឲ្យសហគមន៍បរទេសជាពិសេសតាមរយៈប្រតិភូជប៉ុនជួយផ្តល់បច្ចេកទេសកសិកម្ម និងជម្រុញឲ្យមានការវិនិយោគលើការងារកសិកម្មបន្ថែមទៀតពីប្រទេសជប៉ុនដើម្បីជម្រុញឲ្យផលិតផលកសិកម្ម កម្ពុជាមានការទទួលស្គាល់ពីទីផ្សារអន្តរជាតិនិងសំណូមពរឲ្យប្រទេសជប៉ុនជួយរកទីផ្សារសម្រាប់អង្ករកម្ពុជាផងដែរ។
កិច្ចសវនាការបានប្រព្រឹត្តទៅក្នុងបរិយាកាសរីករាយស្និទ្ធស្នាលនិងកិច្ចសហប្រតិបត្តិការខ្ពស់៕
