ព័ត៌មានផ្សេងៗទៀត
ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដឹកនាំកិច្ចប្រជុំក្រុមការងាររៀបចំពិព័រណ៌ផលិតផលកសិកម្ម ក្នុងព្រះរាជពិធីច្រត់ព្រះនង្គ័ល ឆ្នាំ២០២៣ នៅខេត្តកំពង់ធំ
ចេញផ្សាយ ១៩ មេសា ២០២៣ 3183
នៅព្រឹកថ្ងៃពុធ ទី១៩ ខែមេសា ឆ្នាំ២០២៣នេះ ឯកឧត្តម ឱម គឹមស៊ា រដ្ឋលេខាធិការ និងជាប្រធានក្រុមការងាររៀបចំពិព័រណ៍ផលិតផលកសិកម្ម ក្នុងព្រះរាជពិធីច្រត់ព្រះនង្គ័ល ឆ្នាំ២០២៣ នៅខេត្តកំពង់ធំ បានដឹកនាំកិច្ចប្រជុំមួយ ជាមួយក្រុមការងារ ដើម្បីបែងចែកតួនាទីនិងភារកិច្ចដល់សមាជិកទាំងអស់ ធ្វើយ៉ាងណាឱ្យការរៀបចំពិព័រណ៍ដំណើរការបានរលូនល្អ និងមានប្រសិទ្ធភាពខ្ពស់។
នៅក្នុងការតាំងពិព័រណ៍នាឆ្នាំនេះ ឯកឧត្តមប្រធានក្រុមការងារបានណែនាំដល់សមាជិកទាំងអស់ឱ្យបញ្ចេញសមត្ថភាព និងគំនិតច្នៃប្រឌិតរបស់ខ្លួន សំដៅធ្វើយ៉ាងណាឱ្យស្តង់ពិព័រណ៍នៃក្រសួងកសិកម្ម រុក្ខាប្រមាញ់ និងនេសាទ មានភាពទាក់ទាញ និងល្អប្រសើរជាងឆ្នាំកន្លងទៅ។
សូមជម្រាបជូនថា ព្រះរាជពិធីបុណ្យច្រត់ព្រះនង្គ័លប្រព្រឹត្តទៅក្រោមព្រះរាជធិបតីភាពដ៏ខ្ពង់ខ្ពស់បំផុត នៃព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត នៅថ្ងៃ ៤រោច ខែពិសាខ ត្រូវនឹងថ្ងៃទី០៨ ខែឧសភា ឆ្នាំ២០២៣។ ព្រះរាជពិធីនេះ គឺជាទំនៀមទម្លាប់បវេណីរបស់ខ្មែរតាំងពីអតីតកាល ដែលត្រូវបានប្រារព្ធធ្វើដើម្បីប្រកាសពីដំណើរមកដល់នៃរដូវធ្វើស្រែចម្ការរបស់ប្រជារាស្ត្រ ក៏ដូចជាផ្សងប្រផ្នូលពីភោគផលកសិកម្មនាឆ្នាំខាងមុខ៕
