Other News
ឯកឧត្តម ប្រាក់ ដាវីដ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញទទួលជួបពិភាក្សាការងារជាមួយ ក្រុមហ៊ុនដៃគូសហការកូរ៉េ ដែលចង់ស្វែងយល់ពីផលិតផលសក្តានុពលកសិកម្មកម្ពុជា
ចេញផ្សាយ ២៩ មករា ២០២៤ 2104
នៅថ្ងៃទី២៦ ខែមករា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការី បានអញ្ជើញទទួលជួបពិភាក្សាការងារជាមួយលោក Kim Moon Baik អនុប្រធានសមាគម Korean Senior Citizens Association of Cambodia និងក្រុមហ៊ុនដៃគូសហការកូរ៉េ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នៅក្នុងជំនួប ឯកឧត្តម ប្រាក់ ដាវីដ បានសម្តែងការស្វាគមន៍ និងរីករាយ ដែលក្រុមហ៊ុនកូរ៉េ មានបំណងចង់ធ្វើការស្វែងយល់ពី សក្តានុពលផលិតផលកសិកម្មកម្ពុជាដោយទទួលនូវអនុសាសន៍ណែនាំពីក្រសួងកសិកម្ម ធ្វើយ៉ាងណាឱ្យការវិនិយោគនេះ ស្រប តាមគោលនយោបាយរបស់រាជរដ្ឋាភិបាលនិង ក្រសួងកសិកម្ម រុក្ខាប្រមាញ់ និងនេសាទ ។
នៅក្នុងកិច្ចពិភាក្សានោះ ភាគីក្រុមហ៊ុនបានបង្ហាញ ចំណាប់ អារម្មណ៍ ទៅលើផលិតផលសក្តានុពលរបស់កម្ពុជា មានដូចជា៖ ម្រេច ស្វាយសម្ងួត ចេកឆាប ជាពិសេសល្ង (ប្រេងល្ង) វារីវប្បកម្ម ដើមគកែច្នៃ និងដើមកៅស៊ូកែច្នៃជាដើម ។ បន្ថែមពីលើនេះ ភាគី ក្រុមហ៊ុនបានកោតសរសើរពីផលិតផល កសិកម្មកម្ពុជា ដែលមានគុណភាពខ្ពស់ រសជាតិឆ្ងាញ់ ធ្វើឱ្យប្រជាជនកូរ៉េចូលចិត្តបរិភោគ។ ដោយមើលឃើញពីសក្តា នុពលវិនិយោគ ទាំងនេះហើយ ក្រុមហ៊ុនមានបំណងមិនត្រឹមតែ ចង់នាំចូល ទៅកាន់ទីផ្សារកូរ៉េប៉ុណ្ណោះទេ ថែមទាំងចង់ពង្រីកការ នាំចូល ផលិតផលកសិកម្មកម្ពុជាទៅកាន់ទីផ្សារជប៉ុន និងទីផ្សារចិនផងដែរ។
ជាការឆ្លើយតប ឯកឧត្តមប្រាក់ ដាវីដ បានថ្លែងអំណរគុណដល់ ក្រុមហ៊ុនកូរ៉េ ដែលបានមើលឃើញនូវសក្តានុពលនៃដំណាំ កសិកម្ម របស់កម្ពុជាសម្រាប់ធ្វើការកែច្នៃ និងនាំចេញ ដែលអាច ទទួលបាន នូវអត្ថប្រយោជន៍ជាច្រើនក្រោមក្របខណ្ឌកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ កម្ពុជា-ចិន និងពិសេស កិច្ចព្រមព្រៀងRCEP ។
ជាមួយគ្នានោះ ឯកឧត្តមបានណែនាំឱ្យក្រុមហ៊ុនបន្តការសិក្សា និងវិភាគ សេដ្ឋកិច្ច លើដំណាំកសិកម្ម មួយចំនួន ជាពិសេសដំណាំល្ង ។ បន្ទាប់ពីធ្វើការសាកល្បង ប្រសិនបើជោគជ័យ និងមានផលចំណេញ សេដ្ឋកិច្ចខ្ពស់ ជាងដំណាំផ្សេងៗ នោះក្រសួងកសិកម្ម នឹងបន្តធ្វើការសម្របសម្រួលបន្ថែមឱ្យគម្រោងនេះអាចផ្សារភ្ជាប់ជាមួយ សហគមន៍កសិកម្មបែបថ្មីនៅកម្ពុជា ។ ក្រសួងក៏បានលើកទឹកចិត្តដល់ក្រុមហ៊ុនក្នុងការស្វែងរកដៃគូដែលមានដីសមស្រប ដើម្បីអភិវឌ្ឍន៍គម្រោងកសិកម្មរបស់ខ្លួននៅកម្ពុជា៕
