ព័ត៌មានផ្សេងៗទៀត
បង់ក្លាដែសមានបំណងនាំចូលអង្ករប្រហែល២០ម៉ឺនតោនពីកម្ពុជា
ចេញផ្សាយ ២២ មករា ២០១៨ 3058
ដោយសារតម្រូវការស្បៀង ជាបញ្ហាអាទិភាពបំផុត សម្រាប់ប្រទេសបង់ក្លាដែសដែលនោះ រដ្ឋាភិបាលបង់ក្លាដែស ដែលមានបំណង នឹងនាំចូលអង្ករប្រហែលជាង២០០.០០០តោនពីប្រទេសកម្ពុជានៅពេលខាងមុខ ។
បញ្ហានេះ បានត្រូវលើកឡើង នៅក្នុងជំនួបសម្ដែងការគួរសម រវាងលោកស្រីរដ្ឋមន្ដ្រីការបរទេសបង់ក្លាដែស ឌីពូ ម៉ូនី ជាមួយសម្ដេចតេជោហ៊ុន សែន នាយករដ្ឋមន្ដ្រីកម្ពុជា កាលពីរសៀលថ្ងៃទី២៧ ខែធ្នូ។
ចំណុចនេះ ក៏បានលើកឡើង ដូចគ្នានោះដែរ ខណៈជួបជាមួយលោក រវាងឧបនាយករដ្ឋមន្ដ្រី រដ្ឋមន្ដ្រីការបរទេសកម្ពុជា លោកហោណាំហុង និងឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ។
ក្នុងជំនួបជាមួយសម្ដេចតេជោ ហ៊ុន សែ នលោកស្រីរដ្ឋមន្ដ្រីការបរទេស បានចាត់ទុកកម្ពុជា ជាអធិរាជស្បៀង ហើយបានបង្ហាញក្ដីសប្បាយរីករាយ ពីភាពអធិរាជស្បៀងរបស់កម្ពុជា។
លោកស្រី ក៏បានលើកឡើង ពីការជំរុញកិច្ចសហប្រតិបត្ដិការ រវាងប្រទេសទាំងពីរ ជាពិសេសលើវិស័យកសិកម្ម ហើយនឹងបញ្ជាទិញអង្ករពីកម្ពុជានាពេលឆាប់ៗនេះ។ លោកស្រីឌីពូ ម៉ូនី បានលើកឡើង ពីកិច្ចសហប្រតិបត្ដិការ នៃប្រទេសទាំងពីរ និងបានបញ្ជាក់ថា បង់ក្លាដែសនឹងបញ្ជូនគណៈប្រតិភូមួយក្រុម សិក្សាពីវិស័យកសិកម្ម នៅកម្ពុជាដែលអាចនាំទៅរក ការដាក់ចេញនូវកិច្ចព្រមព្រៀង និងការកសាងម៉ាស៊ីនកិនស្រូវនៅកម្ពុជា ។
ជាការឆ្លើយតប សម្ដេចតេជោ ហ៊ុន សែន បានជំរុញលើកទឹកចិត្ដអ្នកវិនិយោគ នៅបង់ក្លាដែស ឱ្យរកស៊ីនៅកម្ពុជា ពិសេសលើវិស័យកសិកម្ម។ សម្ដេច ហ៊ុន សែន បានបញ្ជាក់ថា ច្បាប់វិនិយោគនៅកម្ពុជា មិនតម្រូវឱ្យអ្នកវិនិយោគបរទេស ចាំបាច់ដាក់ទុនជាមួយអ្នកស្រុកនោះឡើយ ពោលគឺពួកគេអាចវិនិយោគទុន ដោយខ្លួនឯងមួយរយភាគរយបាន។ ថ្នាក់ដឹកនាំបង់ក្លាដែស ក៏បានសុំអញ្ជើញសម្ដេចហ៊ុ សែន ទៅបំពេញទស្សនកិច្ចជាផ្លូវការ នៅប្រទេសបង់ក្លាដែស ហើយនាំសំណើនេះត្រូវបានសម្ដេច ទទួលយកដោយអនុញ្ញាត ឱ្យក្រសួងការបរទេសទាំងពីររៀបចំ និងពិភាក្សាបន្ដពីដំណើរទស្សនកិច្ចខាងលើ ។
ដោយឡែក ក្នុងជំនួបជាមួយលោកឧបនាយករដ្ឋមន្ដ្រីហោ ណាំហុង កាលពីព្រឹកថ្ងៃទី២៧ ខែធ្នូនេះ ចំណុចនេះ ក៏បានលើកឡើងស្រដៀងគ្នានេះដែរ។ បើតាមប្រសាសន៏របស់លោកហោ ណាំហុង បានឱ្យដឹងថា នៅក្នុងជំនួបនាពេលនេះ ភាគីទាំងពីរ បានពិភាក្សាលើបញ្ហាជាច្រើន ក្នុងនោះបានផ្ដោតជាសំខាន់ លើបញ្ហាបង់ក្លាដែស ចង់នាំអង្ករចូលពីកម្ពុជា ក្នុងចំនួននៃការបញ្ជាទិញ ប្រហែលជា២០០.០០០តោន ដើម្បីឆ្លើយតប ទៅនឹងតម្រូវការ ជាអាទិភាព របស់រដ្ឋាភិបាលបង់ក្លាដែស ។ ដោយសារ មានបញ្ហាខ្វះស្បៀងអាហារជាអាទិភាពទី១ បង់ក្លាដែសចង់ធ្វើកិច្ចសហប្រតិបត្ដិការ លើការវិនិយោគខាងផ្នែកកសិកម្ម ដើម្បីផលិតអង្ករនាំចេញពីកម្ពុជា ។
ភាគីទាំងពីរ ក៏បានពិភាក្សាគ្នាផងដែរ ទាក់ទងទៅនឹងការបង្កើតគណៈកម្មការ ចម្រុះមួយរវាងក្រសួងការបរទេស នៃប្រទេសទាំងពីរ ដើម្បីសហប្រតិបត្ដិការគ្នា និងធ្វើការជំរុញការវិនិយោគ និងការពារវិនិយោគ ទៅវិញទៅមកផងដែរ និងបញ្ហាផ្សេងៗទៀត ។
ភាគីកម្ពុជា បានជំរុញឱ្យភាគីបង់ក្លាដែស ពិភាក្សាបន្ថែមទៀត ជាមួយក្រសួងពាណិជ្ជកម្ម របស់កម្ពុជាអំពីការនាំអង្ករចេញ។ លោករដ្ឋមន្ដ្រីការបរទេសកម្ពុជា បានបញ្ជាក់ថា យើងនៅសល់ស្រូវ៣,៨លានតោន សម្រាប់នាំចេញ នៅក្នុងឆ្នាំ២០១០នេះ។ ប៉ុន្ដែយើងខ្វះរោងកិនស្រូវនេះឱ្យទៅជាអង្ករ ។
លោកក៏បាន ស្នើឱ្យភាគីបង់ក្លាដែសមកវិនិយោគ ដើម្បីបង្កើតរោងចក្រកិនស្រូវ។ លោកបានជម្រាបជូនសមភាគី របស់លោកថា ដោយសារយើងខ្វះរោងចក្រកិនស្រូវនេះ ហើយទើបយើងអនុញ្ញាត ឱ្យប្រជាជននាំស្រូវ ទៅលក់នៅតាមព្រំប្រទល់ ដែនជាមួយវៀតណាមនិងថៃ ។
ដោយឡែក នៅក្នុងជំនួប ជាមួយឯកឧត្ដមបណ្ឌិតច័ន្ទ សារុន រដ្ឋមន្ដ្រីកសិកម្ម លោកស្រី ឌីពូ ម៉ូនី បានមានប្រសាសន៏ ថាប្រទេសបង់ក្លាដែសមានចេតនាយ៉ាងខ្លាំងនៅ ក្នុងការធ្វើវិនិយោគ ទៅលើវិស័យកសិកម្មនៅកម្ពុជា ជាពិសេសការជួលដី សម្រាប់ការធ្វើផលិតកម្មតាមកិច្ចសន្យា (Contract Farming)។ ក្រៅពីនោះ បង់ក្លាដែសមានបំណងចង់នាំអង្ករចេញ ពីប្រទេសកម្ពុជា ក្នុងកិច្ចព្រមព្រៀង រយៈពេលវែងមួយ ហើយនៅចំពោះមុខនេះបង់ក្លាដែស នឹងបញ្ជូនមន្ដ្រីមកពិភាក្សា ជាមួយកម្ពុជាដើម្បីធ្វើការនាំចេញអង្ករ ចំនួន២០០រយពាន់តោន។ ជាមួយគ្នានោះដែរបង់ក្លា ដែសមានសកលវិទ្យាល័យកសិកម្ម ជាច្រើនផ្ដោតលើការស្រាវជ្រាវ ដើម្បីអភិវឌ្ឍន៏ ដូច្នេះក្រសួងកសិកម្មកម្ពុជា អាចបញ្ជូននិស្សិត ទៅប្រទេសបង់ក្លាដែស ដើម្បីចូលរួមបណ្ដុះបណ្ដាល ក៏ដូចជាស្រាវជ្រាវផងដែរ ។
ជាការឆ្លើយតប ឯកឧត្ដមបណ្ឌិតច័ន្ទ សារុន បានមានប្រសាសន៏ថា ក្រសួងស្វាគមន៏ជានិច្ច ចំពោះការលើកឡើងខាងលើ ហើយស្នើសុំឱ្យបង់ក្លាដែស បញ្ជូនមន្ដ្រីជំនាញ មកកាន់ប្រទេសកម្ពុជា ដើម្បីពិភាក្សាទៅលើចំណុចខាងលើនេះ ។
នៅក្នុងជំនួបនោះផងដែរ ឯកឧត្ដមបណ្ឌិត ច័ន្ទ សារុន បានជម្រាបជូនឱ្យដឹងថាស្ថានភាព នៃប្រទេសបង់ក្លា ដែសមានសភាពប្រហាក់ប្រហែលគ្នា ដូចជាប្រទេសកម្ពុជាដែរ គឺពឹងផ្អែកទៅលើវិស័យកសិកម្ម ដែលក្នុងនោះផលិតកម្មស្រូវ ជាផលិតកម្មដ៏សំខាន់ ហើយប្រទេសទាំងពីរ ជួបនូវបញ្ហាប្រឈម ដូចជាទឹកជំនន់ គ្រោះរាំងស្ងួត និងសត្វល្អិតបំផ្លាញ ដូច្នេះប្រទេសទាំងពីរ មានសក្ដានុពល ក្នុងកិច្ចសហប្រតិបត្ដិការជាមួយគ្នា ។
ឆ្លៀតក្នុងឱកាសនោះដែរ លោកបានជម្រាបផងដែរថា កម្ពុជាកាលពី៣០ឆ្នាំមុន ជាប្រទេសខ្វះខាតស្បៀងដូចបង់ក្លាដែសដែរ។ ពីឆ្នាំ១៩៧៩-១៩៩៥ គឺខ្វះស្បៀង ប៉ុន្ដែនៅឆ្នាំ១៩៩៦ គឺយើងធានាបាននូវសន្ដិសុខស្បៀង កម្រិតថ្នាក់ជាតិ ហើយនៅរយៈពេលប៉ន្មានឆ្នាំចុងក្រោយនេះ យើងសល់អង្ករ សម្រាប់នាំចេញទៀតផង ។ លោកបានបញ្ជាក់ថា នៅឆ្នាំ២០១០-២០១១ ក្រៅពីធានាបាននូវសន្ដិសុខស្បៀង យើងសល់ស្រូវចំនួន៣,៤លានតោន សម្រាប់បម្រើ ឱ្យការនាំចេញ ហើយទិន្នផលស្រូវ នៅកម្ពុជាមានការកើនឡើងពីមួយឆ្នាំទៅមួយឆ្នាំ ។
ជាមួយគ្នានោះ ឯកឧត្ដមបណ្ឌិតច័ន្ទ សារុន បានចែករំលែក នូវកក្ដាដែលធ្វើឱ្យកម្ពុជាទទួលបានជោគជ័យផងដែរ ដោយឯកឧត្ដមបានជម្រាបថា ចំណុចដែលធ្វើឱ្យជោគជ័យនោះ គឺមានកក្ដា៣យ៉ាង ទី១.កក្ដាដឹកនាំ បានន័យថារាជរដ្ឋាកម្ពុជា ដែលមានសម្ដេចហ៊ុន សែន ជាប្រមុខតែងតែចាត់ទុកវិស័យកសិកម្មជាវិស័យស្នូលដោះស្រាយបានបញ្ហាផ្សេងៗ កាត់បបន្ថយភាពក្រីក្រ និងអភិវឌ្ឍន៏សេដ្ឋកិច្ចជាតិ ។
ជាមួយគ្នានោះ ដើម្បីសម្រេចបានជោគជ័យ រាជរដ្ឋាភិបាលកម្ពុជា មានគោលនយោបាយ ធ្វើឱ្យបានសម្រេចសុខភាព កិច្ចសហប្រតិបត្ដិការល្អ ជាមួយដៃគូអភិវឌ្ឍន៏រួមមានទ្វេភាគី ពហុភាគី និងសហប្រតិបត្ដិការល្អ ជាមួយវិស័យឯកជន ហើយរាជរដ្ឋាភិបាល បានផ្ដោយការយកចិត្ដទុកដាក់ទៅលើការអភិវឌ្ឍន៏ហេដ្ឋារចនាសម្ព័ន្ធជនបទ រួមមានប្រព័ន្ធស្រោចស្រព ផ្លូវលំជនបទដោះស្រាយទីផ្សារជាដើម។
ទី២.កក្ដាបច្ចេកទេស គឺយើងបានផ្ដោតទៅលើការស្រាវជ្រាវ ដើម្បីអភិវឌ្ឍន៏ និងផ្សព្វផ្សាយបំពាក់បំប៉នបច្ចេកទេស ដល់កសិករ គឺយើងខិតខំកែទម្លាប់កសិករពីការផលិតដើម្បីហូប មកជាការផលិត ដើម្បីធ្វើជំនួញ ដើម្បីបង្កើនប្រាក់ចំណូលគ្រួសារ យើងកែទម្លាប់កសិករ ពីការប្រើប្រាស់ពូជស្រូវធ្ងន់ មកពូជស្រូវស្រាលដែលមានទិន្នផលខ្ពស់ យើងកែទម្លាប់កសិករ ពីការប្រើប្រាស់ជីគីមី ងាកមកប្រើជីធម្មជាតិ ដែលមាននៅក្នុងដៃ និងមូលដ្ឋានស្រាប់ និងយើងកែទម្លាប់កសិករ ពីការធ្វើស្រែមួយមុខ ទៅជាការដាំបន្លែបង្ការ ចិញ្ចឹមត្រី ចិញ្ចឹមសត្វ នេះជាការបង្កើនមុខរបរកសិកម្ម ដល់កសិករ និងកក្ដាទី៣ ជាកក្ដារួមផ្សំ គឺរាជរដ្ឋាភិបាល បានជំរុញឱ្យមន្រី្ដចុះមូលដ្ឋាន ចុះដល់កន្លែងផលិតកម្ម ដែលក្រសួងបានដាក់ចុះនូវកម្មវិធីហៅថា "ចុះស្រែជាមួយកសិករ។
កម្ពុជា-បង់ក្លាដេស បានចុះហត្ថលេខា លើកិច្ចព្រមព្រៀង ស្ដីពីពាណិជ្ជកម្មកាលពីឆ្នាំ២០០៦។ ចំណែកការផ្លាស់ប្ដូរពាណិជ្ជកម្ម រវាងកម្ពុជា-បង់ក្លាដេស នៅឆ្នាំ២០០៩ មានតម្លៃជាង១លានដុល្លារអាមេរិច។ កម្ពុជាបាននាំចេញទៅកាន់បង់ក្លាដេស មានចំនួនជាង១,៣លានដុល្លារអាមេរិក។
នេះជាដំណើរទស្សនកិច្ចលើកទី១ មកកាន់ប្រទេសកម្ពុជា របស់លោកស្រីរដ្ឋមន្រី្ដការបរទេស នៃប្រទេសបង់ក្លាដេស ដើម្បីជំរុញការអនុវត្ដន៏កិច្ចព្រមព្រៀងពាណិជ្ជកម្ម រវាងប្រទេសទាំងពីរ ឱ្យបានកាន់តែកើនឡើងថែមទៀត។ ដោយឡែកកាលពីឆ្នាំ២០០១ លោកស្រីនាយករដ្ឋមន្ដ្រីបង់ក្លាដេស ក៏បានមកបំពេញទស្សនកិច្ចផ្លូវការ នៅប្រទេសកម្ពុជាផងដែរ ដើម្បីពង្រឹងនូវទំនាក់ទំនងសហប្រតិបត្ដិការទ្វេភាគី ៕
