ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យលោកជំទាវ Elsa Nury Bauzan Benzano ដែលមាននិវេសនដ្ឋាននៅទីក្រុងគូឡាឡាំពួរ ចូលជួបសម្តែងការគួរសម និង ពិភាក្សាការងារ

ចេញ​ផ្សាយ​ ២ ឧសភា ២០១៨ 3981

នៅទីស្តីការក្រសួងនារសៀលម៉ោង ១៥:០០ ថ្ងៃចន្ទ ១រោច ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី៣០ ខែមេសា ឆ្នាំ២០១៨ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានអនុញ្ញាតឲ្យលោកជំទាវ Elsa Nury Bauzan Benzano ឯកអគ្គរដ្ឋទូតតែងតាំងថ្មីនៃសាធារណរដ្ឋអ៊ុយរ៉ូហ្គាយប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងគូឡាឡាំពួរ ចូលជួបសម្តែងការគួរសម ពិភាក្សាការងារដើម្បីរឹតចំណងកិច្ចសហប្រតិបត្តិការរវាងប្រទេសទាំងពីរក្នុងវិស័យកសិកម្ម។ ជាបឋម ឯកឧត្តមរដ្ឋមន្ត្រីសូមស្វាគមន៍ចំពោះវត្តមានរបស់លោកជំទាវដែលបានទទួលភារកិច្ចបន្ថែមលើការទូតនៅព្រះរាជាណាចក្រកម្ពុជា នាពេលនេះ ហើយបានជម្រាបជូនលោកជំទាវជ្រាបអំពីស្ថានភាពទូទៅនៅកម្ពុជា រួមទាំងការរីកចម្រើនសេដ្ឋកិច្ចជាតិរបស់កម្ពុជា ដែលបានកើតចេញពីធ្វើឲ្យមានសុខសន្តិភាព ស្ថេរភាពសង្គម គ្របដណ្តប់ទូទាំងប្រទេស និងការទទួលបានវឌ្ឍនភាពនៃវិស័យកសិកម្មយ៉ាងល្អប្រសើរ និងគួរជាទីមោទនក្នុងរយៈពេលប៉ុន្មានឆ្នាំកន្លងមកនេះ។ ឯកឧត្តមរដ្ឋមន្ត្រីក៏បានគួសបញ្ជាក់ពីសក្តានុពលនៃវិស័យកសិកម្មកម្ពុជា។

បច្ចុប្បន្នផលិតផលកសិកម្មមិនត្រឹមតែសម្រាប់ផ្គត់ផ្គងសន្តិសុខស្បៀងក្នុងប្រទេសប៉ុណ្ណោះទេ ប៉ុន្តែថែមទាំងសម្រាប់ធ្វើពាណិជ្ជកម្ម និងការនាំចេញផងដែរ។ ក្នុងការជួបសំណេះសំណាលនេះជំទាវអ៊ុយរ៉ូហ្គាយ បានបង្ហាញពីសក្តានុពលវិស័យកសិកម្មអ៊ុយរ៉ូហ្គាយ ជាពិសេសការចិញ្ចឹមគោយកសាច់ និងទឹកដោះ ជាលក្ខណៈពាណិជ្ជកម្ម។ ទន្ទឹមនឹងនេះភាគីទាំងពីរមានក្តីសង្ឃឹមនិងជឿជាក់ថានឹងមានកិច្ចសហប្រតិបត្តិការល្អជាមួយគ្នាដើម្បីអភិវឌ្ឍវិស័យកសិកម្មតាមរយៈការផ្លាស់ប្តូរបទពិសោធន៍ ការធ្វើទស្សនកិច្ចរបស់មន្រ្តីជំនាញ់ និងការធ្វើពាណិជ្ជកម្មរួមគ្នា។ ជំនួបពិភាក្សានេះត្រូវបានបញ្ចប់ក្នុងមានលក្ខណៈស្និតស្នាល មិត្តភាព និងសហប្រតិបត្តិការល្អ។